Menningarmánuðurinn október er nú haldinn hátíðlegur í Sveitarfélaginu Árborg í sautjánda sinn. Allan mánuðinn eru í boði fjölbreyttir viðburðir fyrir alla aldurshópa; Tónleikar, opin hús, sýningar, sögukvöld, listasmiðjur og margt fleira. Hera Fjölnisdóttir hefur í nægu að snúast þennan mánuðinn en hún er viðburðastjóri og verkefnastjóri miðlunar í menningardeild Sveitarfélagsins Árborgar.
Fullt nafn: Hera Fjölnisdóttir.
Fæðingardagur, ár og staður: 20. júní 1989 í Reykjavík.
Fjölskylduhagir: Ég er gift honum Guðmundi Þór og börnin okkar eru Kría 7 ára og Gunnar Fálki 3 ára. Svo er Salka heimiliskötturinn okkar í miklu uppáhaldi hjá öllum.
Hverra manna ertu: Ég ólst upp í Hafnarfirði og Fljótshlíð, er með sterka tengingu við Vestfirði og bjó í fimm ár í London áður en ég flutti á Eyrarbakka þar sem ég hef nú búið í níu ár. Ég ólst upp hjá mömmu minni Arndísi og pabba mínum Fjölni. Ég sótti mikið í ömmur mínar þrjár sem barn. Amma Nína kynnti mig fyrir leikhúsinu og amma Vala kenndi mér jóga. Það er svo mikið af fólki og stöðum sem mótar eina manneskju.
Menntun: Öldutúnsskóli, Fljótshlíðarskóli og Hvolsskóli. Stúdent frá MH. Fór til London í rússneskan leiklistarskóla og er með BA gráðu þaðan í leiklist og leikstjórn. Búin að taka marga áfanga í bókmenntafræði og er að klára lokaverkefni í MA námi í Ritlist við HÍ. Svo fór ég í Aerial jógakennaranám í fyrra. Hef passað mig að mennta mig í því sem mér finnst skemmtilegt og það hefur reynst vel.
Atvinna: Viðburðastjóri og verkefnastjóri miðlunar í Menningardeild Árborgar.
Besta bók sem þú hefur lesið: Purpuraliturinn eftir Alice Walker og Jane Eyre eftir Charlotte Bronte.
Uppáhalds sjónvarpsþáttur: Ég horfi ekki nógu mikið á góða þætti en þegar ég vil slökkva á mér þá horfi ég t.d. á Love Island. Var mjög hrifin af þáttunum Girls og var að frétta að það kemur ný sería á næsta ári.
Hvaða bíómynd getur þú horft á aftur og aftur: Á ekki mynd sem ég horfi aftur og aftur á, finnst ég enn eiga eftir að sjá svo rosalega margar myndir. Mín uppáhalds er þó Promising young woman – hún er skylduáhorf – en ég get alltaf horft á Grease ef það er í boði.
Te eða kaffi: Bæði – drekk meira kaffi en elska líka gott te.
Uppáhalds árstími: Sumarið, lífið mætti vera ein stór tjaldútilega fyrir mér.
Besta líkamsræktin: Aerial yoga – sem við erum svo heppin að geta iðkað hjá Yogasálum á Selfossi. Það er bara ekkert sem jafnast á við það.
Hvaða rétt ertu best að elda: Er ekki mikið í eldhúsinu og elda sjaldan það sama – en ég get gert mjög góða tómatsúpu ef ég nenni. Sem er ekki oft.
Við hvað ertu hrædd: Að missa.
Klukkan hvað ferðu á fætur: Ég vildi óska að það væri klukkan 6 en því miður þá er það klukkan 7 með herkjum.
Hvað gerir þú til að slaka á: Horfi á hafið og fylgist með töfrum himinhvolfsins. Undrast alla daga yfir mismunandi tilbrigðum sólarlagsins og hafsins. Það eru forréttindi að búa við sjóinn.
Hvað finnst þér vanmetið: Augnsamband.
En ofmetið: Græðgi.
Hvaða lag kemur þér alltaf í stuð: Believe með Cher.
Besta lyktin: Frostlykt í algjöru logni. Og útiþvottur, það er himnesk lykt.
Bað eða sturta: Helst bara sund. En sturta og bað er bæði næs.
Leiðinlegasta húsverkið: Ég er ekkert mjög hrifin af húsverkum. Finnst gaman að tæma óhreinatauskörfuna og þvo eins og brjálæðingur en á mjög erfitt með að ganga síðan frá þvottinum.
Besta ráð sem þér hefur verið gefið: Fólk eyðir nánast engum tíma í að hugsa um þig. Við erum öll bara að hugsa um okkur sjálf svona 99% dagsins þannig að það er algjör óþarfi að velta sér upp úr því hvað öðrum finnst um þig.
Nátthrafn eða morgunhani: Meiri nátthrafn í eðli mínu.
Fallegasti staður sem þú hefur komið á: Dýrafjörður.
Hvað fer mest í taugarnar á þér: Mér finnst erfitt þegar fólk segir ekki það sem það meinar.
Neyðarlegasta atvik sem þú hefur lent í: Það þarf eiginlega mikið til að ég fari hjá mér, það eru helst einhver bernskubjánalæti sem ég ætti að skammast mín fyrir en voru kannski neyðarlegri fyrir pabba minn lögreglumanninn heldur en mig sjálfa.
Hvað ætlaðir þú að verða þegar þú yrðir stór: Leikkona.
Fyndnasta manneskja þú veist um: Rebekka Magnúsdóttir tiktok stjarna og vinkona mín er mjög fyndin.
Ef þú fengir að vera einhver annar í einn dag hver þá: Ég myndi vilja prufa að vera í annarri vídd, sem huldukona eða einhver sem farinn úr þessari jarðvist. Fá skilning í það sem er handan okkar, hvað og hvort.
Hvaða samfélagsmiðil notar þú mest: Vinnan mín krefst þess að ég er mikið á Instagram og Facebook. Tiktok reyni ég að forðast því þar týnist tíminn.
Ef þú værir alvaldur í einn dag: Ég myndi vilja að við fengjum öll meiri samkennd og skilning gagnvart fólki sem er ólíkt okkur. Einnig myndi ég snúa við hamfarahlýnun og gefa stríðshrjáðum þjóðum frelsi frá pynturum sínum.
Eitthvað sem fæstir vita um þig: Ég er mjög góð/var mjög góð í íslenskri glímu þökk sé Óla Elí íþróttakennara.
Mesta afrek í lífinu: Að fara í kalt bað kvölds og morgna í fjögur ár í leiklistarnáminu. Og að fæða tvö börn um fæðingarveginn án deyfingar, það var ólýsanlega vont í bæði skiptin og ég ætla ekki að gera það aftur.
Ef þú mættir ferðast fram eða aftur í tímann, hvert myndir þú þá fara: Ég myndi vilja vera á 18. eða 19. öld í Englandi að dansa períódu dansa og vingast við Jane Austen og systurnar Bronte.
Lífsmottó: Að fylgja innsæinu og gera sitt besta. Að njóta og elska.
Hvað ætlar þú að gera um helgina: Á laugardaginn ætla ég að fara á Listaflakk um Árborg í tilefni af menningarmánuðinum október og reyna að skoða sem flestar vinnustofur listamanna í sveitarfélaginu. Á sunnudaginn langar mig að hlusta á hana Lindu Ásdísar segja frá Grænlandi á Byggðasafninu. Hver veit nema dóttir mín nái líka að draga mig á Birgittu Haukdal á bókasafninu.
Sendu okkur tilnefningu að Sunnlendingi vikunnar á netfrett@sunnlenska.is