Einn af sigurvegurum sveitarstjórnarkosninganna á Suðurlandi um síðustu helgi var T-listinn í Bláskógabyggð. Fjórðu kosningarnar í röð fékk T-listinn fimm sveitarstjórnarfulltrúa af sjö. Helgi Kjartansson, oddviti Bláskógabyggðar, hefur verið oddviti listans frá árinu 2010 og oddviti Bláskógabyggðar frá árinu 2014, og af núverandi sveitarstjórnarmönnum á Suðurlandi er hann einn af þeim sem á hvað lengstan feril á sveitarstjórnarstiginu.
Fullt nafn: Helgi Kjartansson.
Fæðingardagur, ár og staður: Ég er fæddur á Selfossi, 2. nóvember 1971.
Fjölskylduhagir: Ég er giftur Sylvíu Sigurðardóttur frá Vatnsleysu, við eigum þrjú börn á aldrinum 23, 20 og 16 ára. Svo eigum við einn tengdason.
Hverra manna ertu: Ég er alinn upp í Haga í Grímsnesi þar sem hluti af mínum afkomendum er ættaður frá, á einnig ættir að rekja upp í Laugardal og undir Eyjafjöllin.
Menntun: Ég er menntaður íþróttakennari, og útskrifaðist frá íþróttakennaraskólanum á Laugarvatni árið 1996.
Atvinna: Ég starfa sem íþróttakennakennari við Reykholtsskóla, svo hef ég verið í hlutastarfi sem oddviti Bláskógabyggðar síðustu 12 ár.
Besta bók sem þú hefur lesið: Ég er nú ekki mikill lestrarhestur á bækur, veit að ég þarf að bæta í á því sviðinu. Ætli besta bók sem ég hef lesið sé ekki Saga Ungmennafélags Biskupstungna. Þó að ég lesi ekki mikið af bókum að þá les ég mikið af allsskonar gögnum
tengt oddvitastarfinu.
Uppáhalds sjónvarpsþáttur: Fréttir og íslenskir þættir tengdir mannlífinu í landinu.
Hvaða bíómynd getur þú horft á aftur og aftur: Dumb and Dumber er mynd sem ég get horft á aftur og aftur, þetta er algjör snilldar bíómynd
Te eða kaffi: Fyrir nokkrum árum þá var ég meiri temaður en síðustu árin hefur kaffið komið sterkt inn. Þetta eru sirka tveir kaffibollar á dag hjá mér, þannig að ég er frekar hófstilltur í kaffidrykkjunni.
Uppáhalds árstími: Sumarið er minn uppáhalds árstími, langir dagar og bjartar nætur er eitthvað sem mér líkar vel við.
Besta líkamsræktin: Þessa stundina finnst mér ganga og hjólreiðar vera besta líkamsræktin, þetta tvennt hentar mér a.m.k. best. Svo finnst mér alltaf gott að synda.
Hvaða rétt ertu bestur að elda: Ég er nú frekar í einföldu réttunum, krakkarnir eru amk mjög ánægð með hakk og grýtu, svo er ég líka góður í að elda íslenska þjóðlega rétti.
Við hvað ertu hræddur: Það er helst að eitthvað komi fyrir mína ástvini.
Klukkan hvað ferðu á fætur: Yfirleitt fer ég á fætur um kl. 6:00 á morgnana, hef alltaf átt létt með að vakan snemma. Nota morgnana helst til að undirbúa mig fyrir daginn.
Hvað gerir þú til að slaka á: Eftir langan og erilsaman dag finnst mér gott að fara út í skemmu og dunda við eitthvað eða setjast út í gróðurhús og hlusta á náttúruhljóðin.
Hvað finnst þér vanmetið: Gömlu góðu gildin.
En ofmetið: Það er lífsgæðakapphlaupið. Það skiptir engu þegar upp er staðið.
Hvaða lag kemur þér alltaf í stuð: Það eru nú helst lögin með Sálinni hans Jóns míns, ætli það sé þá ekki helst lagið Vængjalaus, það kemur mér alltaf í gott stuð.
Besta lyktin: Lyktin af nýslegnu grasi og af trjágróðri.
Bað eða sturta: Ég er meira fyrir sturtu, ætli það sé ekki vegna þess að ég hef ekki farið í baðkar í ansi mörg á en mér finnst alltaf gott að fara í pottinn og slaka á.
Leiðinlegasta húsverkið: Ætli það sé ekki að skúra gólfin, ég sé um það á mínu heimili, mætti standa mig betur en vona að það hafi sloppið hingað til.
Besta ráð sem þér hefur verið gefið: Það er að kurteisin kostar ekki neitt. Þetta er ráð sem mér var gefið þegar ég var ungur og hef reynt að tileinka mér síðan.
Nátthrafn eða morgunhani: Ég er meiri morgunhani, það er oft gott að vakna snemma á morgnana og koma einhverju í verk og skipuleggja daginn.
Fallegasti staður sem þú hefur komið á: Það eru Þingvellir, ótrúlega fallegur staður og það er alltaf eitthvað fallegt sem maður sér í hvert skipti.
Hvað fer mest í taugarnar á þér: Það er neikvæðni og bölmóður, það er eitthvað sem fer í taugarnar á mér.
Neyðarlegasta atvik sem þú hefur lent í: Ætli sé ekki best að ég sleppi að segja frá því, haha…
Hvað ætlaðir þú að verða þegar þú yrðir stór: Ég mað það nú ekki, held að það hafi verið smiður og bílstjóri en hvorugt varð að veruleika, en mér finnst gaman að smíða og vera að ditta að hlutunum.
Fyndnasta manneskja þú veist um: Þegar ég var ungur þá var það Laddi en í dag er það Ari Eldjárn. Svo er konan mín ótrúlega fyndin.
Ef þú fengir að vera einhver annar í einn dag hver þá: Ég vildi fá að vera konan mín, svo ég viti hvernig er að búa með mér, ég trúi ekki öllu sem hún segir um mig.
Hvaða samfélagsmiðil notar þú mest: Það er Facebook sem ég nota mest, veit að þetta er ofmetinn miðill en samt er maður að nota hann.
Ef þú værir alvaldur í einn dag: Það væri að koma á friði í heiminum, stríð og ófriður skila engu, því væri upplagt að koma á friði.
Eitthvað sem fæstir vita um þig: Ég hef skrifað bók sem var gefin út fyrir nokkrum árum. Get nú samt ekki sagt að ég sé rithöfundur.
Mesta afrek í lífinu: Ég held að það sé óhætt að segja að eignast góð og heilbrigð börn, held að afrekin verði ekki meiri en það.
Ef þú mættir ferðast fram eða aftur í tímann, hvert myndir þú þá fara: Ég held að ég færi aftur í tímann alveg að landnámi held að það væri fróðlegt að sjá og fylgjast með landnámsmönnunum.
Lífsmottó: Koma fram við náungann eins og ég vil að komið sé fram við mig.
Hvað ætlar þú að gera um helgina: Ég verð í Finnlandi um helgina að fylgjast með kvennalandsliði U16 í knattspyrnu. Dóttir mín er í liðinu og við hjónin ætlum að fylgjst með og hvetja liðið til dáða. Eins ætlum við að skoða Finnland og njóta þess sem það hefur upp á að bjóða.
Sendu okkur tilnefningu að Sunnlendingi vikunnar á netfrett@sunnlenska.is