Rangárþing ytra og Rangárþing eystra standa fyrir glæsilegri fjölmenningarhátíð laugardaginn 9. maí í íþróttahúsinu á Hellu. Hátíðin er opin öllum og verður sannkölluð veisla fyrir skynfærin þar sem íbúar og gestir fá tækifæri til að kynnast fjölbreyttri menningu frá ólíkum heimshornum. Magdalena Przewlocka er formaður fjölmenningarráðs Rangárþings ytra.
Fullt nafn: Magdalena Przewłocka.
Fæðingardagur, ár og staður: Ég er fædd 6. júní árið 1979 í Białystok í Póllandi.
Fjölskylduhagir: Ég er gift Paweł Przewłocki og við eigum saman tvær dætur Ewu sem er 24 ára og Martynu sem verður 15 ára í nóvember og auðvitað hundinn Nölu 8 ára.
Hverra manna ertu: Foreldrar mínir eru Irena Gołębiewska og Zbigniew Gołębiewski svo er eldri systir mín Marta sem býr í Póllandi.
Menntun: Ég er með masters gráðu í stærðfræði frá Háskóla í Póllandi, kennsluréttindi í grunn- og framhaldsskóla og er að klára díplómunám í HÍ Menntun fyrir alla.
Atvinna: Ég starfa sem kennari í Grunnskólanum Hellu. Ég kenni stærðfræði á elsta- og miðstigi ásamt því að vera umsjónarkennari 10. bekkjar. Ég er stigstjóri á elsta stigi og sé um félagslíf unglingana með nemendaráðinu sem mér finnst sérstaklega skemmtilegt. Auk þess kenni ég íslensku fyrir innflytjendur í Fræðsluneti Suðurlands en ég er í árspásu vegna náms.
Besta bók sem þú hefur lesið: Mér finnst mjög gaman að lesa og hef lesið margar bækur, oftast spennu- og glæpasögur. Ég á ekki eina uppáhaldsbók en bók sem kemur oft upp í huga minn er The Alchemist eftir Paulo Coelho og mér hefur alltaf fundist spennandi að lesa bækur eftir Stephen King, Graham Masterton og Agatha Christie.
Uppáhalds sjónvarpsþáttur: Criminal Minds og Alternatywy 4.
Hvaða bíómynd getur þú horft á aftur og aftur: The Silence of the Lambs, Seven Pounds og Die Hard.
Te eða kaffi: Kaffi allan daginn.
Uppáhalds árstími: Mér finnst vorið í Póllandi mjög fallegt og litríkt, jólatíminn á Íslandi kósý þegar jólaljós, kertaljós og stjörnur í gluggum skapa notalega stemningu en uppáhalds árstíminn er samt sumarið sem er tími ferðalaga.
Besta líkamsræktin: Besta líkamsræktin finnst mér vera zumba, þar sem er alltaf stuð og gleði, og nýlega uppgötvaði ég líka brennó, sem mér finnst bæði skemmtileg og góð æfing.
Hvaða rétt ertu best að elda: Mér finnst ekki mjög gaman að elda en ég er frekar góð í að elda pólskan mat.
Við hvað ertu hrædd: Mér finnst skordýr ógeðsleg en stundum hræðir mig ástandið í heiminum núna.
Klukkan hvað ferðu á fætur: Ég er oftast fyrst á fætur heima og vakna yfirleitt um klukkan sex.
Hvað gerir þú til að slaka á: Ég fer í bað með kerti og bók.
Hvað finnst þér vanmetið: Daglegt þakklæti, að kunna að meta litlu hlutina.
En ofmetið: TikTok.
Hvaða lag kemur þér alltaf í stuð: It’s My Life með Bon Jovi.
Besta lyktin: Fyrsta kaffið úr vélinni minni á morgnana og ilmurinn af garðasýrenu sem minnir mig á Pólland.
Bað eða sturta: Bað allan daginn en sturta er líka ágæt.
Leiðinlegasta húsverkið: Að elda og ganga frá þvotti sérstaklega para saman sokka.
Besta ráð sem þér hefur verið gefið: Mamma mín var alltaf að benda mér á að vera fjárhagslega sjálfstæð og fylgja minni sannfæringu.
Nátthrafn eða morgunhani: Morgunhani.
Fallegasti staður sem þú hefur komið á: Á Íslandi finnst mér Landmannalaugar vera fallegastir, í Póllandi væri það gamli bærinn í Kraká en af öllum ferðalögum sem ég hef farið í myndi ég helst velja Ítalíu, Verona og La Spezia.
Hvað fer mest í taugarnar á þér: Óheiðarleiki og leti en verst finnst mér þegar ég er nýbúin að kaupa inn og ísskápurinn er fullur og þá koma stelpurnar mínar, opna ísskápinn og segja: Það er ekkert til að borða heima.
Neyðarlegasta atvik sem þú hefur lent í: Það eina sem mér dettur í hug núna er þegar ég setti óvart dísel á bensínbíl og varð hissa þegar bíllinn stoppaði. Ég hafði haft ökuskírteinið í stuttan tíma og frændi minn kom mér til bjargar því ég vissi ekki hvað ég átti gera. Síðan þá tjekka ég yfirleitt tvisvar hvað ég er að setja á bílinn.
Hvað ætlaðir þú að verða þegar þú yrðir stór: Fyrst vildi ég verða fornleifafræðingur, sálfræðingur í smá stund svo kennari.
Fyndnasta manneskja þú veist um: Mágkona mín þegar hún segir frá atvikum sem hún hefur lent í.
Ef þú fengir að vera einhver annar í einn dag hver þá: Mér finnst ágætt að vera ég sjálf. En ef ég á að velja þá kannski 10 ára barn í sumarfríi sem leikur sér allan daginn og hefur enga áhyggjur sem væri geggjað. Eða bara Trump, svo að ég gæti strax sagt af mér embætti.
Hvaða samfélagsmiðil notar þú mest: Ég nota aðallega Snapchat og Facebook, stundum Instagram.
Ef þú værir alvaldur í einn dag: Auðvitað heimsfriður. Ég myndi stöðva þessa stríðs- og ójafnréttisvitleysu um allan heim.
Eitthvað sem fæstir vita um þig: Við skulum láta sem fæsta vita af þessu.
Mesta afrek í lífinu: Dætur mínar fyrst, svo að ég lærði íslensku og fékk vinnu sem kennari á Íslandi og gerði það á tveimur árum.
Ef þú mættir ferðast fram eða aftur í tímann, hvert myndir þú þá fara: Ég myndi vilja fara aftur í tímann þegar afi minn lifði, til að geta eytt með honum smá tíma. Ég væri líka til að sjá hvernig lífið var á æsku- og unglingsárum mömmu minnar. Það væri líka gaman að stökkva aðeins til sjöunda áratugsins, eða jafnvel tuttugasta áratugsins, til að upplifa stemninguna á þeim tímum. Einn dagur dugar alls ekki.
Lífsmottó: Hver aldur hefur sinn rétt.
Hvað ætlar þú að gera um helgina: Ég ætla að taka þátt í Fjölmenningahátíðinni á Hellu með fjórum pólskum vinkonum mínum, þar sem við ætlum að kynna menningu okkar, bjóða upp á pólskan mat til að smakka, sýna myndir frá Póllandi og spila pólska tónlist. Ég hlakka mjög til.
Sendu okkur tilnefningu að Sunnlendingi vikunnar á netfrett@sunnlenska.is