Selfyssingurinn Gunnar Sigurðsson var á dögunum kjörinn formaður Félags vélstjóra og málmtæknimanna, sem er meðal stærstu stéttar- og fagfélaga landsins. Fjórir félagar voru í formannsframboði og sigraði Gunnar kosninguna með yfirburðum, hlaut 53,91 prósent atkvæða. Gunnar hefur áratuga reynslu af störfum til sjós og lands og hefur setið síðastliðin tvö ár í stjórn VM.
Fullt nafn: Gunnar Sigurðsson.
Fæðingardagur, ár og staður: 21. febrúar 1970 á Selfossi.
Fjölskylduhagir: Giftur Lilju Ólafsdóttur og eigum tvo syni; Gauta Þór, fæddur 2002 og Kristinn Gunnar, fæddur 2005.
Hverra manna ertu: Sonur Sigurðar Sigurjónssonar og Elísabetar Guðmundsdóttur, búsett á Selfossi.
Menntun: Vélstjóri.
Atvinna: Sölumaður hjá Íslyft ehf og nú verðandi formaður VM Félags vélstjóra og málmtæknimanna.
Besta bók sem þú hefur lesið: Ég get nú ekki sagt að ég sé mikill lestrarhestur en ég hafði gaman af Njálu þegar ég fór aftur í skóla eftir langt hlé.
Uppáhalds sjónvarpsþáttur: Horfi mest á fótbolta.
Hvaða bíómynd getur þú horft á aftur og aftur: Er ekki mikill bíómyndakall þannig að mér dettur ekki í hug nein sérstök mynd en hef mest gaman af rómantískum gamanmyndum.
Te eða kaffi: Kaffi, er mikill kaffikall og starta yfirleitt deginum með þremur bollum.
Uppáhalds árstími: Sumarið.
Besta líkamsræktin: Labba með hundinn.
Hvaða rétt ertu bestur að elda: Lítill kokkur en geri fínar kótelettur í raspi.
Við hvað ertu hræddur: Mýs og rottur.
Klukkan hvað ferðu á fætur: Fer yfirleitt á fætur 6:45 en er svo sem ekki mikill morgunhani og væri alveg til að þurfa ekki að fara á fætur fyrr en milli 8-9.
Hvað gerir þú til að slaka á: Skrolla í símanum.
Hvað finnst þér vanmetið: Góður svefn.
En ofmetið: Orkudrykkir. Kaffið er bara best.
Hvaða lag kemur þér alltaf í stuð: Stayin’ Alive.
Besta lyktin: Af nýslegnu grasi og nýveiddri loðnu.
Bað eða sturta: Bað.
Leiðinlegasta húsverkið: Þvottur, enda sér konan mín oftast um hann.
Besta ráð sem þér hefur verið gefið: Að hætta að reykja.
Nátthrafn eða morgunhani: Nátthrafn en þegar aldurinn fór að færast yfir þá er morgunhaninn að taka yfir.
Fallegasti staður sem þú hefur komið á: Hornstrandir.
Hvað fer mest í taugarnar á þér: Óheiðarleiki og hroki.
Neyðarlegasta atvik sem þú hefur lent í: Allt of mörg neyðarleg atvik og erfitt að gera upp á milli þeirra.
Hvað ætlaðir þú að verða þegar þú yrðir stór: Smiður.
Fyndnasta manneskja þú veist um: Jón Gnarr.
Ef þú fengir að vera einhver annar í einn dag hver þá: Ég myndi vilja vera Arne Slot og hætta með Liverpool.
Hvaða samfélagsmiðil notar þú mest: Facebook og Snapchat.
Ef þú værir alvaldur í einn dag: Er það ekki bara að stuðla að heimsfriði?
Eitthvað sem fæstir vita um þig: Er ¼ Færeyingur og stoltur af því.
Mesta afrek í lífinu: Börnin mín og að drífa mig í aftur í nám á gamalsaldri.
Ef þú mættir ferðast fram eða aftur í tímann, hvert myndir þú þá fara: Ég myndi vilja fara 100 ár fram í tímann, ég er forvitinn að sjá hvernig hlutirnir þróast.
Lífsmottó: Aldrei of seint að læra og breyta til og áfram veginn.
Hvað ætlar þú að gera um helgina: Skella mér til Vestmannaeyja með konunni minni og vinum og fara á Hljómey.
Sendu okkur tilnefningu að Sunnlendingi vikunnar á netfrett@sunnlenska.is