Gigtarfélag Íslands fagnar 50 ára afmæli sínu þessa dagana og veislan nær hápunkti með tónleikum í Grafarvogskirkju næstkomandi laugardag. Framkvæmdastjóri félagsins er Hvergerðingurinn Stefán Magnússon. Hann er þekktur fyrir að hafa mörg járn í eldinum og um síðustu helgi var hann kjörinn varaformaður ÖBÍ réttindasamtaka á aðalfundi samtakanna.
Fullt nafn: Stefán Magnússon.
Fæðingardagur, ár og staður: 29. apríl 1976, í Hveragerði.
Fjölskylduhagir: Ég á tvö eldgömul börn. Júlíus Óli, 28 ára og Ragnheiður María, 22 ára.
Hverra manna ertu: Ég er sonur Magga og Heiðu og alinn upp í Garðyrkjustöðinni Grósku.
Menntun: Ég er fáránlega mikið menntaður miðað við hvað mér fannst leiðinlega erfitt að læra. Ég útskrifaðist sem íþróttakennari frá Laugarvatni 1999 og svo kláraði ég MBA námið frá HR 2021.
Atvinna: Það er hellings vinna hjá mér að tapa ekki geðheilsunni í þessari haustrigningu en annars er ég framkvæmdastjóri Gigtarfélags Íslands og varaformaður ÖBÍ réttindasamtaka.
Besta bók sem þú hefur lesið: Forðist okkur eftir snillinginn Hugleik Dagsson.
Uppáhalds sjónvarpsþáttur: Það besta sem ég hef séð er Queen’s Gambit og svo auðvitað allur Narcos pakkinn.
Hvaða bíómynd getur þú horft á aftur og aftur: Lord of The Rings er jólapakkinn minn ár eftir ár.
Te eða kaffi: Ég tengi ekkert við te, það minnir mig bara á Dracula brandara sem ég ætla ekki að segja hér. Ég elska gott kaffi en drekk ekki mikið af því.
Uppáhalds árstími: Þegar lífið er gott þá skiptir ekki máli hvaða árstími er. Ég er alinn upp í gróðurhúsi og er því ekki mikill aðdáandi skítaveðurs og kann alltaf best við mig þegar veðrið er rólegt.
Besta líkamsræktin: Ég elska útihlaup en svo finnst mér líka rosalega notalegt að fara í göngutúr með góða hljóðbók í gangi.
Hvaða rétt ertu bestur að elda: Ég ætla ekki að gorta en ég geri magnaða hluti á grillinu. (Þeir sem fatta hvaðan þessi setning er komin fá Kjörís hlunk í verðlaun).
Við hvað ertu hræddur: Ég var í mjög mörg ár hræddur við ansi margt og með hörmungarhyggju á háu stigi. Í dag eru það margir af þessum „leiðtogum“ sem hræða mig.
Klukkan hvað ferðu á fætur: Ég er vaknaður 6:30 og reyni að gefa mér smá stund að skrúfa hausinn á mig áður en ég fer inn í daginn.
Hvað gerir þú til að slaka á: Hlusta á notalega tónlist, fer í göngutúr, jafnvel tek smá sjónvarpsgláp, fer bara eftir því hvernig hausinn er stemmdur.
Hvað finnst þér vanmetið: Tónlistarsmekkurinn minn er vanmetinn.
En ofmetið: Ísrael.
Hvaða lag kemur þér alltaf í stuð: Sviksemi með HAM.
Besta lyktin: Besta lyktin er af ferska loftinu í Hveragerði.
Bað eða sturta: Alltaf sturta, hef ekki þolinmæði í bað.
Leiðinlegasta húsverkið: Eins og mér finnst gaman að elda þá er jafn leiðinlegt að ganga frá eftir matinn, nema að ég setji einhverja djöflatónlist á fóninn sem keyrir mig áfram til að klára þetta.
Besta ráð sem þér hefur verið gefið: Það opnuðust víddir og gáttir í hausnum á mér þegar ég lærði það að ég stýri ekki hegðun annarra.
Nátthrafn eða morgunhani: Ég er algjör morgunhæna og fátt notalegra en að vakna snemma og eiga smá tíma í rólegheitum með Sigurrós í græjunum og sterkan kaffi á kantinum.
Fallegasti staður sem þú hefur komið á: Neskaupstaður.
Hvað fer mest í taugarnar á þér: Á slæmum degi er ég gamli kallinn að öskra á skýin svo ég get mjög oft farið í taugarnar á sjálfum mér. En ég er farinn að þekkja mig vel og gamli mætir sjaldan í dag.
Neyðarlegasta atvik sem þú hefur lent í: Ég hef of oft misst út úr mér hluti sem voru ekki viðeigandi og það er eitthvað sem ég er ekki stoltur af. En að vera með svona haus sem framkvæmir fyrst og hugsar svo þá er kannski ekki við öðru að búast.
Hvað ætlaðir þú að verða þegar þú yrðir stór: Ég ákvað það snemma á lífsleiðinni að mig langaði að hjálpa til og gera gagn og tengdi það mikið við krakka í kringum mig sem áttu erfitt og lífið að sparka í endalaust. Mér fannst það því ágætis pæling að gerast kennari og geta þá verið til staðar fyrir nemendur sem þurftu spjall og hvatningu og bara einhvern til að hlusta á sig.
Fyndnasta manneskja þú veist um: Bjarni Ben þegar hann er að segja mér hver lausnin sé, hahahahahahahahaha…
Ef þú fengir að vera einhver annar í einn dag hver þá: Ég væri til í að vera Kobbi vinur minn í einn dag. Hann segist vakna alla daga eins og Indiana Jones og ég væri bara svo til í að prufa það.
Hvaða samfélagsmiðil notar þú mest: Ég er mikið á fésinu og svo líka á Instagram.
Ef þú værir alvaldur í einn dag: Þá fengi ég Ricky Gervais til að vera með 24 klst standup predikun yfir mannfólkinu. Ricky er svo stórkostlega góður í að vera bestur og réttstæður.
Eitthvað sem fæstir vita um þig: Ég er stúdent frá Menntaskólanum að Laugarvatni þó ég sé ekki á útskriftarmyndinni. Ég útskrifaðist um haustið útaf sottlu sem skeði.
Mesta afrek í lífinu: Að vera lifandi og brosandi í dag. Mér finnst það vel gert hjá mér. Svo er ég afskaplega stoltur af börnunum mínum. Þau eru vel heppnuð og ég vona svo að lífið verði með þeim í liði.
Ef þú mættir ferðast fram eða aftur í tímann, hvert myndir þú þá fara: Ég myndi skella mér á Söngvakeppni framhaldsskólanna fyrir sirka 26 árum síðan og benda Gylfa vini mínum á að nota aðeins minna af varaglossi. Svo myndi ég horfa á hann og Róslaugu syngja lagið Orginal sem er það besta sem hefur sést í þessari keppni.
Lífsmottó: Það er bannað að vera fáviti!!!
Hvað ætlar þú að gera um næstu helgi: Á laugardaginn 10. október kl. 14:30 ætla ég að halda upp á 50 ára afmæli Gigtarfélagsins með tónleikum í Grafarvogskirkju. Þar koma fram Jónas Sig, Sigga Toll, Stebbi Jak, Ágústa Eva og Kór Menntaskólans að Laugarvatni.
Það er frítt inn og allir velkomnir að koma og fagna með okkur.
Sendu okkur tilnefningu að Sunnlendingi vikunnar á netfrett@sunnlenska.is