Þessi spurning er upphaflega komin frá mér

Egill Bjarnason, blaðamaður frá Selfossi, var að gefa út sína fyrstu bók, How Iceland Changed the World. Það er bókaútgáfan Penguin Random House sem gefur hana út en í bókinni er farið yfir þá ósögðu atburðarás sem varð til þess að ein örsmá eyja í miðju Atlantshafi hefur mótað heiminn í aldaraðir. Þetta er fyrsta bók Egils en hann hefur að undanförnu skrifað greinar fyrir Associated Press, The New York Times, National Geographic og fleiri erlenda miðla.

Fullt nafn: Egill Bjarnason.
Fæðingardagur, ár og staður: 13. febrúar 1988, Reykjavík.
Fjölskylduhagir: Vísitölufjölskylda með tvö börn og fresskött sem heitir óvart Ronja.
Menntun: Allt sem ég kann, lærði ég í FSu.
Atvinna: Blaðamaður.
Besta bók sem þú hefur lesið: Hvað segirðu? Besta bók sem þú hefur skrifað? Ég var einmitt að skrifa mína fyrstu!
Uppáhalds sjónvarpsþáttur: Succession, Saturday Night Live og Landinn.
Hvaða bíómynd getur þú horft á aftur og aftur: Horfi miklu frekar á íslenskar bíómyndir tvisvar. Veit ekki alveg afhverju.
Te eða kaffi: Kaffi þó ég tilkynni reglulega að ég ætli framvegis einungis að drekka te.
Uppáhalds árstími: Veturinn. Veldur aldrei vonbrigðum.
Besta líkamsræktin: Hlaup.
Hvaða rétt ertu bestur að elda: Plokkara.
Við hvað ertu hræddur: Múgæsing.
Klukkan hvað ferðu á fætur: Þegar kallið kemur frá yngsta syninum. Yfirleitt um sex.
Hvað gerir þú til að slaka á: Leggst í grasið og sofna.
Hvað finnst þér vanmetið: Að leggjast í grasið og sofna.
En ofmetið: Garðsláttur.
Hvaða lag kemur þér alltaf í stuð: Konan mín er frá Húsavík og hennar þjóðsöngur er “Husavik” í flutningi Molly Sanden. Alla morgna.
Besta lyktin: Er af birkiskógi.
Bað eða sturta: Sund.
Leiðinlegasta húsverkið: Að skúra.
Besta ráð sem þér hefur verið gefið: Kláraðu bókina.
Nátthrafn eða morgunhani: Sennilega nátthrafn í eðli mínu.
Fallegasti staður sem þú hefur komið á: Strendur Sierra Leone, Big Sur í Kaliforníu og hálendi Íslands. Helst á reiðhjóli með tjald og prímus.
Hvað fer mest í taugarnar á þér: Snjómokstur, blaðamannafundir, skriffinnska, langir tölvupóstar, sviðsmyndir, hraðakstur innanbæjar, grímuskylda, fyrirsagnir með gæsalöppum, útvarpsauglýsingar, Svíþjóð, lúpína, refaskyttur, Kúlugúbbar (barnaefni með talandi fiskum), tekjuskattur, rafskutlur, Garðabær, sunnudagar, heimsmarkaðsverð á áli, IKEA, „eigðu góðan dag“.
Neyðarlegasta atvik sem þú hefur lent í: Fyrir blaðamann eru staðreyndavillur alltaf neyðarlegar.
Hvað ætlaðir þú að verða þegar þú yrðir stór: Kokkur.
Fyndnasta manneskja sem þú veist um: Mamma gaf út ljóðabók í fyrra sem var merkilega fyndin.
Ef þú fengir að vera einhver annar í einn dag hver þá: Sonur minn, ellefu mánaða. Ég vil vita hvernig hann hugsar.
Hvaða samfélagsmiðil notar þú mest: Strava. En ég er að reyna eignast fleiri vini á Goodreads.
Ef þú værir alvaldur í einn dag: Myndi ég frelsa Palestínu.
Eitthvað sem fæstir vita um þig: Ég vann lengi á Sunnlenska fréttablaðinu – fyrir tíma vefmiðilsins – og sá þá um þennan Sunnlendings-dálk. Nákvæmlega þessi spurning er upphaflega komin frá mér.
Mesta afrek í lífinu: Ég borðaði eitt sinn, einn og óstuddur, melónu á stærð við hausinn á mér.
Ef þú mættir ferðast fram eða aftur í tímann, hvert myndir þú þá fara: Ég færi aftur til Móðuharðinda. Atburður sem ekki er hægt að skilja til fulls nema frá fyrstu hendi.
Lífsmottó: Lífið er stutt.
Hvað ætlar þú að gera um næstu helgi: Kynna nýútkomna bók og hlaupa hálf-maraþon í Mývatnssveit.