Menningarmánuðurinn október er runninn upp í Sveitarfélaginu Árborg og kennir þar margra grasa. Á Byggðasafni Árnesinga á Eyrarbakka verður líf og fjör allan mánuðinn þar sem boðið verður upp á skapandi smiðju, fræðslufyrirlestur og sérstaka leiðsögn um safnið. Lýður Pálsson, safnstjóri, er Sunnlendingur vikunnar að þessu sinni.
Fullt nafn: Lýður Pálsson.
Fæðingardagur, ár og staður: Fæddur 30. júní 1966 á Sjúkrahúsinu á Selfossi.
Fjölskylduhagir: Ég á tvö dásamleg uppkomin börn, tengdason og eitt barnabarn. Yndislega kærastan mín heitir Sigurbjörg Þórunn Óskarsdóttir.
Hverra manna ertu: Foreldrar mínir voru Páll Lýðsson (1936-2008) og Elínborg Guðmundsdóttir (1937-2022). Pabbi af grónum sunnlenskum ættum en mamma Húnvetningur og Strandamaður. Pabbi og mamma kynntust í Menntaskólanum að Laugarvatni og bjuggu alla tíð í Litlu-Sandvík þar sem ég ólst upp.
Menntun: Grunnskóli á Selfossi. Stúdent frá FSu 1986. BA í sagnfræði 1990 ásamt kennsluréttindum, MA í hagnýtri menningarmiðlun 2014 og viðbótardiplóma í safnafræði 2023. Allt mitt háskólanám frá Háskóla Íslands. Hef einnig farið á ótal námskeið einkum tengt sögu Árnessýslu og faglegu starfi safna.
Atvinna: Safnstjóri Byggðasafns Árnesinga. Hóf þar störf 1. júní 1992 og ætlaði reyndar aðeins að vera þar í eitt ár. En svo var meiri eftirspurn eftir mér á safninu en ég hugði og er nú farinn að telja niður til starfsloka. Að morgni hlakka ég til hvers vinnudags og allra fjölbreyttu verkefnanna við safnið. Skemmtilegast auðvitað að messa yfir gestum safnsins fróðleik um safnið, Húsið og héraðið þar sem í raun aðalspurningin er þessi: Hvaðan komum við, afhverju erum við hérna og hvert förum við?
Besta bók sem þú hefur lesið: Þessi spurning er erfið! Ég les mikið og í raun hefur engin skarað framúr en eftirminnilegar eru Njála eftir óþekktan höfund, Nafn rósarinnar eftir Umberto Eco og Sjálfstætt fólk eftir Halldór Laxness.
Uppáhalds sjónvarpsþáttur: Gísli Marteinn – segir Sibba og eflaust er það rétt hjá henni! Lásý svar!
Hvaða bíómynd getur þú horft á aftur og aftur: Apocalypse Now – ótrúleg mynd og einnig sagan á bak við gerð þessarar stórmyndar sem skartar leikurum eins og Martin Sheen, Robert Duvall og Marlon Brando. Leikstjórinn snillingurinn Francis Ford Coppola er engum líkur!
Te eða kaffi: Það er kaffi.
Uppáhalds árstími: Ætli það sé ekki vorið.
Besta líkamsræktin: Hádegispúl hjá World Class. Ekkert sérstök líkamsrækt svo sem en félagsskapurinn er frábær: Að stórum hluta kallar á mínum aldri. Af hverju kemur Gummi Kalli ekki?
Hvaða rétt ertu bestur að elda: Vatnsdeigsbollur! Prófið að gúggla „Vatnsdeigsbollur Lýðs“! Ég er ekki mikill kokkur og læt gjarnan aðra um að elda.
Við hvað ertu hræddur: Að missa nákominn.
Klukkan hvað ferðu á fætur: 7:50.
Hvað gerir þú til að slaka á: Kíkja á netmiðla. Eða hlusta á tónlist.
Hvað finnst þér vanmetið: Fjölskyldan.
En ofmetið: Orkudrykkir.
Hvaða lag kemur þér alltaf í stuð: Where Streets Have No Name með Jútú.
Besta lyktin: Nýslegið gras.
Bað eða sturta: Sturta.
Leiðinlegasta húsverkið: Ekkert húsverk er leiðinlegt!
Besta ráð sem þér hefur verið gefið: Að leggja sig allan fram, gera sitt besta og vinna hvert verkefni af alúð og áhuga. Björn heitinn Björnsson hagfræðingur og bankastjóri Íslandsbanka kenndi mér þetta góða lífsráð þegar ég var unglingur en við vorum saman á sænskunámskeiði í Norður-Svíþjóð sumarið 1982.
Nátthrafn eða morgunhani: Nátthrafn.
Fallegasti staður sem þú hefur komið á: Sumarið 2025 komst ég í fyrsta sinn í Veiðivötn. Ótrúlega fallegt þar. En margir aðrir staðir eru eftirminnilegir sökum fegurðar. Af erlendum stöðum finnst mér Barcelona falleg borg með svo flottum arkitektúr.
Hvað fer mest í taugarnar á þér: Frekja og tilætlunarsemi.
Neyðarlegasta atvik sem þú hefur lent í: Jeminn eini! Hvar á ég að byrja? Ég held að ég sleppi þessari spurningu! Sorrý! Eða jú: Það er neyðarlegt að vera Sunnlendingur vikunnar!!!!
Hvað ætlaðir þú að verða þegar þú yrðir stór: Bóndi.
Fyndnasta manneskja þú veist um: Mér fannst pabbi minn fyndinn og hann sá tilveruna oft í kómísku ljósi. Við unnum mikið saman í fræðimennskunni og voru það gjöfular stundir. Ég sakna pabba alla daga.
Ef þú fengir að vera einhver annar í einn dag hver þá: Ingólfur Arnarson landnámsmaður á óspilltu landi. Hvernig datt honum í hug að setjast að á ljótasta stað landsins?
Hvaða samfélagsmiðil notar þú mest: Facebook.
Ef þú værir alvaldur í einn dag: Ég myndi afsala mér völdum til gáfaðra og friðsamra einstaklinga. Völd fara illa með mig.
Eitthvað sem fæstir vita um þig: Hvað ég er viðkvæm sál.
Mesta afrek í lífinu: Börnin auðvitað.
Ef þú mættir ferðast fram eða aftur í tímann, hvert myndir þú þá fara: Ég myndi gjarnan vilja vera með Snorra Sturlusyni í Reykholti á 13. öld og kynnast þessum mikla ritsnillingi og stjórnmálamanni.
Lífsmottó: Komdu fram við fólk af þeirri virðingu, hlýju og vinsemd sem þú vilt sjálfur njóta.
Hvað ætlar þú að gera um helgina: Taka þátt í Rollusmiðju! Ég ætla í fjárhúsið fyrir norðan Húsið á Eyrarbakka og þæfa rollu úr ull. Þetta er liður í metnaðarfullri menningardagskrá Árborgar í október en Byggðasafn Árnesinga tekur þátt í því með margvíslegum hætti.
Sendu okkur tilnefningu að Sunnlendingi vikunnar á netfrett@sunnlenska.is