Björgvin Örn Eggertsson, brautarstjóri skógar og náttúru í Garðyrkjuskólanum á Reykjum – FSu, hlaut á dögunum hvatningarverðlaun skógræktar 2026. Verðlaunin voru formlega veitt á Alþjóðlegum degi skóga, þann 21. mars. Björgvin hefur starfað við skógrækt alla sína starfsævi, nýskógrækt og umhirðu eldri skóga. Hann hefur séð um og kennt á fjölda annarra námskeiða á sínu fagsviði og alla tíð verið ötull við að miðla af reynslu sinni og þekkingu. Það eru Skógræktarfélag Íslands, Land og skógur og Bændasamtök Íslands sem standa að verðlaununum.
Fullt nafn: Björgvin Örn Eggertsson.
Fæðingardagur, ár og staður: 7. ágúst 1966 í Reykjavík.
Fjölskylduhagir: Giftur konu frá Selfossi, Vilborgu Eiríksdóttur og eigum við þrjá syni, Eirík Raphael Elvy sem ég fékk í forgjöf, Eggert Elí og Rúnar Ísak.
Hverra manna ertu: Sonur Heiðrúnar S. Magnúsdóttur úr Jökulsárhlíð og Eggerts Ólafssonar Guðmundssonar úr Reykjavík. Þau bjuggu í Garðabæ á mínum uppvaxtarárum.
Menntun: Skógarskóli í Noregi þar sem trjáfellingar grunnur minn var lagður. Síðar fór ég með fimm manna fjölskyldu til Finnlands í fjögur ár þar sem ég lærði skógfræði. Lærði svo síðar umhirðu og fellingu trjáa í þröngum aðstæðum með trjáklifri, trjásnyrtir sem er kallað á slæmu máli arboristi.
Atvinna: Brautarstjóri brautarinnar skógur og náttúra í Garðyrkjuskólanum á Reykjum – FSu. Einnig sé ég um Endurmenntun Græna geirans sem halda stök námskeið fyrir fagfólk og áhugafólk í garðyrkjutengdum fögum og skógrækt, sem og námskeiðaraðir eins og Grænni skóga í samvinnu við atvinnulífið. Sinni líka ráðgjöf og grisjun fyrir ýmsa.
Besta bók sem þú hefur lesið: Er ekki mikill lestrahestur, en góðar fræðibækur hafa nýst mér vel.
Uppáhalds sjónvarpsþáttur: Fréttir og veður á RÚV eru alltaf í uppáhaldi en geta verið þreytandi þegar hörmungar og skítaveður yfirtaka þættina.
Hvaða bíómynd getur þú horft á aftur og aftur: Sódóma og Líf myndirnar.
Te eða kaffi: Drekk aðallega kaffi, kannski stundum fullmikið.
Uppáhalds árstími: Þar sem atvinna mín tengist náttúrunni mjög mikið finnst mér að allir árstímar hafi sinn sjarma. Upplifun í skógi að vori, sumri, hausti eða vetri er gjörólík.
Besta líkamsræktin: Skógarhögg, snyrting og felling trjáa í trjáklifri.
Hvaða rétt ertu bestur að elda: Mér er helst ekki hleypt í eldamennskuna enda er konan mín listakokkur. En þegar ég fæ að spreyta mig elda ég hakk og spaghetti.
Við hvað ertu hræddur: Er ekki hræddur.
Klukkan hvað ferðu á fætur: Vakna virka daga um kl 6:30, en síðar um helgar.
Hvað gerir þú til að slaka á: Fer út að ganga í skóglendi og fer í sánu sem ég nota mikið sérstaklega eftir líkamlega krefjandi daga í vinnunni.
Hvað finnst þér vanmetið: Gönguferðir í skóglendi.
En ofmetið: Orkudrykkir.
Hvaða lag kemur þér alltaf í stuð: In the Shadows með The Rasmus.
Besta lyktin: Fjallaþinur í skóglendi fyrri part sumars er eitt af því magnaðasta sem til er, þá virkjast fleiri skilningarvit þegar ilmurinn slær fyrir vitin.
Bað eða sturta: Fer meira í sturtu.
Leiðinlegasta húsverkið: Ekkert, hugsa aldrei um þau sem slík.
Besta ráð sem þér hefur verið gefið: Þrjú bestu; Ingvi Þorkelsson kennari í Garðaskóla hvatti mig til að fara í sveit á Reykjum á Skeiðum sem lagði grunn að minni framtíð. Böðvar Guðmundsson skógarvörður ýtti mér til Noregs í skóla og Jóhanna Róberts og Björn B. Jónsson Finnlandsfarar hvöttu mig til að fara í skógræktarnám í Finnlandi.
Nátthrafn eða morgunhani: Ég er meiri morgunhani en er liðtækur fram eftir í góðu teiti.
Fallegasti staður sem þú hefur komið á: Þeir eru margir hér á landi; Borgarfjörður eystri, Veiðivötn og Þórsmörk.
Hvað fer mest í taugarnar á þér: Óheiðarleiki og undirferli.
Neyðarlegasta atvik sem þú hefur lent í: Slæm mismæli á útskrift nemenda á námskeiðaröð Grænni skóga, námskeið sem ég stýri við Garðyrkjuskólann.
Hvað ætlaðir þú að verða þegar þú yrðir stór: Ruslakarl.
Fyndnasta manneskja sem þú veist um: Margir góðir.
Ef þú fengir að vera einhver annar í einn dag hver þá: Ég er sáttur í eigin skinni.
Hvaða samfélagsmiðil notar þú mest: Smá snapp, annars ekkert.
Ef þú værir alvaldur í einn dag: Stoppa þetta Trump fyrirbæri.
Eitthvað sem fæstir vita um þig: Ég var góður í spretthlaupi og keppti með Skeiðamönnum í boðhlaupi þegar ég var í sveit á Reykjum á Skeiðum.
Mesta afrek í lífinu: Fjölskylda mín, konan og strákarnir.
Ef þú mættir ferðast fram eða aftur í tímann, hvert myndir þú þá fara: Fram í tímann, ca. 40 ár og sjá afkomendur mína.
Lífsmottó: Lifa lífinu lifandi.
Hvað ætlar þú að gera um helgina: Eiga góða kvöldstund með nánustu fjölskyldu og aðstoða son við flutninga.
Sendu okkur tilnefningu að Sunnlendingi vikunnar á netfrett@sunnlenska.is