Rökkvi Hljómur Kristjánsson rakaði til sín verðlaunum fyrir frábæran námsárangur þegar Landbúnaðarháskóli Íslands brautskráði nemendur sína fyrr í mánuðinum. Rökkvi Hljómur lauk búfræðiprófi með glæsilega einkunn, 9,41 og fékk verðlaun fyrir góðan árangur í bútæknigreinum, góðan árangur í búfjárræktargreinum og frábæran árangur á búfræðiprófi. Auk þess fékk hann viðurkenningu frá Minningarsjóði Hjartar Snorrasonar og Ragnheiðar Torfadóttur fyrrum skólastjórahjóna á Hvanneyri fyrir góðan árangur í námsdvöl sinni við skólann.
Fullt nafn: Rökkvi Hljómur Kristjánsson.
Fæðingardagur, ár og staður: 5. júlí 1995 á Selfossi.
Fjölskylduhagir: Fjarskalega góðir. Ég og kærastan mín búum inni á foreldrum hvors annars á víxl.
Hverra manna ertu: Ég er sonur Guðrúnar Auðar Haraldsdóttur og Kristjáns Gíslasonar sem búa í Hólum á Rangárvöllum. Ég er ættaður frá Næfurholti á Rangárvöllum í móðurætt og Vindási í Landsveit í föðurætt. Ég er svo bæði af Víkingslækjarætt og Lækjarbotnaætt.
Menntun: Ég er stúdent frá Fjölbrautaskóla Suðurlands og búfræðingur frá Landbúnaðarháskólanum á Hvanneyri.
Atvinna: Ég vinn við búskap.
Besta bók sem þú hefur lesið: Saltkrákan eftir Astrid Lindgren.
Uppáhalds sjónvarpsþáttur: Ætli það væri ekki helst bara Mr. Bean.
Hvaða bíómynd getur þú horft á aftur og aftur: Ég hef lúmskt gaman af Hringadróttinssögu myndunum.
Te eða kaffi: Kaffi.
Uppáhalds árstími: Sennilega haustið, eða svosem bara allt nema veturnir.
Besta líkamsræktin: Baggahirðing í góðu veðri.
Hvaða rétt ertu bestur að elda: Ég er seigur að sjóða egg.
Við hvað ertu hræddur: Hunangsflugur.
Klukkan hvað ferðu á fætur: Þessa dagana hef ég verið að vakna svona á milli 2 og 3 yfir allt öðrum fótboltaleik en ég sofnaði út frá. Annars bara þegar ég þarf þess.
Hvað gerir þú til að slaka á: Ég lækka í karlakórnum sem er að syngja undir hjá Skálmöld í undirleiknum í hausnum á mér og reyni að rekja Sokkukynið aftur í gömlu Grá-Sokku.
Hvað finnst þér vanmetið: Mjólk.
En ofmetið: Áfengi.
Hvaða lag kemur þér alltaf í stuð: Vor í dal með Karlakórnum Vísi.
Besta lyktin: Erfitt að gera upp á milli fyrsta lambsins um vorið og fyrsta sláttarins að sumrinu.
Bað eða sturta: Sturta.
Leiðinlegasta húsverkið: Ég og þvottavélar erum ekki vinir.
Besta ráð sem þér hefur verið gefið: Að gera sig ekki ómerkilegan fyrir eitthvað ómerkilegt.
Nátthrafn eða morgunhani: Frekar nátthrafn hugsa ég.
Fallegasti staður sem þú hefur komið á: Ég kann mjög vel við mig inni í Rangárbotnum.
Hvað fer mest í taugarnar á þér: Tækniörðugleikar.
Neyðarlegasta atvik sem þú hefur lent í: Ég held nú að ég verði sjaldan illa vandræðalegur. Man þó eftir því þegar frænka mín kom með nýjan kærasta í heimsókn og ég var búinn að spjalla lengi við hann þegar ég áttaði mig á því að þetta væri ekki bróðir hennar (sem mér til varnar ég hafði ekki séð árum saman).
Hvað ætlaðir þú að verða þegar þú yrðir stór: Sennilega sæðingahrútur.
Fyndnasta manneskja þú veist um: Hér held ég að ég verði að nefna Mikael Jens Halldórsson.
Ef þú fengir að vera einhver annar í einn dag hver þá: Ég hugsa að ég myndi vilja vera kærastan mín til að reyna að átta mig á því hvað í ósköpunum það er sem hún sér við mig.
Hvaða samfélagsmiðil notar þú mest: Líklega Feisbúkk.
Ef þú værir alvaldur í einn dag: Þá myndi ég koma böndum á flugferðir einstaklinga á milli landa til annars en nauðsynja. Takmarka þessar almennu þvælingsferðir fólks niður í svona fjögur flug um ævina.
Eitthvað sem fæstir vita um þig: Það að ég á tvær mannhæðarháar eikur.
Mesta afrek í lífinu: Ætli það gæti ekki bara verið að ná andanum þegar ég fæddist.
Ef þú mættir ferðast fram eða aftur í tímann, hvert myndir þú þá fara: Ég hugsa að ég myndi reyna að fara aftur til 1960 til að reyna að komast á tónleikana með Paul Robeson þar sem hann söng fyrir verkamenn sem voru við byggingu á óperuhúsinu í Sydney.
Lífsmottó: Sól í heiði!
Hvað ætlar þú að gera um helgina: Ég held að ég sé að fara í tvöfalt þrítugsafmæli, það er að segja ef ekki verður þurrkur.
Sendu okkur tilnefningu að Sunnlendingi vikunnar á netfrett@sunnlenska.is