Halldór Stefán Haraldsson var á dögunum ráðinn nýr framkvæmdastjóri Ungmennafélags Selfoss. Framkvæmdastjórn félagsins sá um ráðningarferlið og féll framtíðarsýn Halldórs og áhugi hans á eflingu félagsins, ekki síst innávið, vel að framkvæmdasýn stjórnarinnar. Halldór hefur starfað mest í kringum handknattleik síðustu árin, meðal annars sem meistaraflokksþjálfari, en hann er að ljúka námi í alþjóðaviðskiptum og verkefnastjórnun frá Háskóla Íslands – já, og svo á hann afmæli í dag!
Fullt nafn: Halldór Stefán Haraldsson.
Fæðingardagur, ár og staður: 17 apríl, 1990 í Vestmannaeyjum.
Fjölskylduhagir: Kvæntur Söru Guðjónsdóttur og saman eigum við tvö börn þau Hadd Garðar og Rannveigu Ösp.
Hverra manna ertu: Pabbi heitir Haraldur Halldórsson, veitingahúsaeigandi og vínsérfræðingur, móðir hans er Ásta Finnbogadóttir, innanhússarkitekt, og faðir Halldór Sigurðsson fyrrum skólastjóri í Þorlákshöfn sem er giftur Ester Hjartardóttur systur Jóhönnu Hjartardóttur körfuboltadrottningu í Þorlákshöfn. Halldór er síðan er sonur Sigurðar Guðmundssonar heitins, sem var sóknarprestur á Grenjaðarstað í Aðaldal og síðar vígslubiskup á Hólum í Hjaltadal. Sigurður var einnig aðalhvatamaður að stofnun sumarbúða ÆSK við Vestmannavatn í Aðaldal. Móðir mín heitir síðan Áslaug Rannveig Stefánsdóttir, ofurmamma, og klárlega besta móðir sögunnar. Hún er skrifstofustjóri hjá félagi vélstjóra og málmtæknimanna. Hennar foreldrar eru síðan Stefán Kárason og Margrét Haddsdóttir. Þau búa á Akureyri, ég hef alltaf litið mikið upp til þeirra enda ótrúlegur dugnaður í þeim báðum. Pabbi ömmu Möggubar þetta fallega Hadds (Haddur) nafn sem að sonur minn fékk, þeir eru fjórir sem hafa heitið þessu nafni, þrír sem ennþá eru á lífi og allir í sömu fjölskyldu. Síðan á ég auðvitað fjögur systkini og svo frábæra tengdafjölskyldu, Guðjón Gunnarsson og Kristjönu Garðarsdóttur, sem að búa á Eyrarbakka. Önnur systir konunnar minnar býr síðan á Eyrarbakka og hin í Magdeburg í Þýskalandi gift Elvari Erni Jónssyni.
Menntun: Ég er með B.Sc. í íþróttafræði frá Háskólanum í Reykjavík. Er svo að útskrifast núna eftir nokkrar vikur úr tvöföldu mastersnámi sem ég hef verið að dunda mér að síðustu ár. Það er þá M.Sc. í íþróttafræðum og M.Sc. í Alþjóðaviðskiptum og verkefnastjórnun frá Háskóla Íslands.
Atvinna: Nýbyrjaður sem framkvæmdastjóri Umf Selfoss og mjög spenntur fyrir komandi verkefnum.
Besta bók sem þú hefur lesið: Tvær bækur sem koma upp í hugann, Annarsvegar La de rette komme inn frá árinu 2024 sem fjallar um Bodø Glimt og þann ótrúlega árangur sem þar hefur náðst og síðan Barcelona Way frá 2018 sem fjallar um hvernig maður nær að búa til sterkan kúltúr í íþróttaliðum eða vinnustöðum. Eins og sést að þá les ég mér aðallega til þekkingar en ekki gamans.
Uppáhalds sjónvarpsþáttur: Ríkið, sem sýnt var á Stöð2 og fékk misjafna dóma… Eitt bris á mann.
Hvaða bíómynd getur þú horft á aftur og aftur: Get það yfirleitt ekki en eina myndin sem ég hef getað horft á nokkrum sinnum er Moneyball með Brad Pitt.
Te eða kaffi: Er nánast hættur að drekka koffíndrykki, en gríp kaffibolla öðru hverju.
Uppáhalds árstími: Sumar, 110% sumar.
Besta líkamsræktin: Elska Crossfit en ekki nógu duglegur. Göngutúr í góðu veðri.
Hvaða rétt ertu bestur að elda: Ég er frábær í eldhúsinu. Við hjónin erum eflaust best í Nautalundinni, Sara sér um bernaisinn.
Við hvað ertu hræddur: Að eitthvað slæmt komi fyrir fjölskylduna mína.
Klukkan hvað ferðu á fætur: Yfirleitt of seint. Vildi óska þess að ég væri A týpa en er því miður B týpa. Dreg mig upp kl 07:35 og kem litlu Rannveigu til dagmömmunar (sem hún dýrkar).
Hvað gerir þú til að slaka á: Eyði góðum tíma með fjölskyldunni.
Hvað finnst þér vanmetið: Svefn, algjör leikbreytir.
En ofmetið: Svona giftast og byrja saman raunveruleikaþættir, get ekki horft á þetta. Hef ekki efni á að missa heilasellur.
Hvaða lag kemur þér alltaf í stuð: Sálin kom mér alltaf í stuð, en hlusta voðalega lítið á tónlist.
Besta lyktin: Sumar-grill lyktin.
Bað eða sturta: Sturta, bað er… skrítið.
Leiðinlegasta húsverkið: Skúra gólf.
Besta ráð sem þér hefur verið gefið: Ekki eyða orku og kröftum í eitthvað sem þú ræður ekki við.
Nátthrafn eða morgunhani: Nátthrafn, þótt ég myndi vilja vera morgunhani.
Fallegasti staður sem þú hefur komið á: Volda, Noregi.
Hvað fer mest í taugarnar á þér: Neikvæðni, tuð og að tala um að eitthvað sé ekki hægt.
Neyðarlegasta atvik sem þú hefur lent í: Á ennþá mjög slæmar minningar frá því að ég var í svona fyrsta eða öðrum bekk. Það var frí í skólanum þannig ég fékk að fara með mömmu í vinnuna. Hún var að vinna á leikskóla og fór með hópinn niður að tjörninni í Reykjavík til að gefa öndunum brauð. Ég, stóri strákurinn í hópnum, ætlaði svo að sýna mig að mér tókst að detta ofan í tjörnina. Mamma greyið í vinnunni gat auðvitað ekki bara farið með mig heim þannig ég var hundblautur á Kaffi París með leikskólakrökkunum að drekka heitt súkkulaði. Skammast mín ennþá fyrir þetta.
Hvað ætlaðir þú að verða þegar þú yrðir stór: Atvinnumaður í handbolta.
Fyndnasta manneskja þú veist um: Sara Guðjónsdóttir (Hún sagði mér að skrifa þetta)
Ef þú fengir að vera einhver annar í einn dag hver þá: Dwayne The Rock Johnson. Frægur, Ríkur, Stór og massaður. Væri ekki fínt að prófa allt sem maður er ekki.
Hvaða samfélagsmiðil notar þú mest: Facebook/Messenger.
Ef þú værir alvaldur í einn dag: Ákveða að það sé alltaf gott veður á Íslandi. Síðan myndi ég skylda pólitíkina í að setja miklu meira fjármagn í íþróttamannvirki og byggja upp flottasta íþróttasvæði á norðurlöndunum á Selfossi við Tíbrá. Með íþróttamenntaskóla, íþróttaháskóla, íþróttahóteli og íþrótta-öllu. Að lokum væri svo frítt fyrir alla að æfa íþróttir. Þarf mögulega að finna út hvar við skerum niður á móti, en það er örugglega ekkert mál…
Eitthvað sem fæstir vita um þig: Kemur sem sagt fram hérna en ég fæddist í Vestmannaeyjum þrátt fyrir að eiga engar tengingar þangað og bjó þar í 10 daga eftir fæðingu áður en við fluttum norður til Akureyrar. Harður Eyjapeyji!
Mesta afrek í lífinu: Fyrir utan börnin mín tvö þá er það að vinna sæti í, og þjálfa í, einni sterkustu deild í heimi í kvennahandbolta.
Ef þú mættir ferðast fram eða aftur í tímann, hvert myndir þú þá fara: Fyrir utan hið augljósa að fara aftur í tímann til að græða peninga með því að kaupa hlutabréf, þá myndi ég örugglega fara svona 1000 ár fram í tímann. Er mjög forvitinn að sjá hvernig allt verður.
Lífsmottó: Að horfa áfram veginn.
Hvað ætlar þú að gera um næstu helgi: Á afmæli 17. apríl, þannig það er afmælishelgi. Ætla örugglega bara að bjóða mömmu og systkinum mínum í mat og slaka svo á.
Sendu okkur tilnefningu að Sunnlendingi vikunnar á netfrett@sunnlenska.is