Ingimar Guðmundsson er nýr bæjarstjóri Hvergerðinga en hann tók við starfinu í kjölfar sveitarstjórnarkosninganna í vor. Ingimar er fæddur og uppalinn í Hveragerði og þar verður nóg um að vera um helgina. Bæjarhátíðin Blómstrandi dagar er nú haldin í 31. sinn, dagskráin hófst í gær og stendur fram á sunnudagskvöld með alls kyns viðburðum og uppákomum.
Fullt nafn: Ingimar Guðmundsson.
Fæðingardagur, ár og staður: 21. ágúst 1994. Ég er vissulega fæddur á Selfossi þó ég segist vera fæddur og uppalinn í Hveragerði.
Fjölskylduhagir: Giftur Eddu Björk og saman eigum við þrjá stráka, hund og tvo ketti.
Hverra manna ertu: Foreldrar mínir eru Guðmundur og Margrét sem eru bæði tvö miklir Sunnlendingar. Ég á ættir að rekja út um allt Suðurland en við fjölskyldan höfum náð að festa rætur ágætlega hér í Hveragerði þar sem foreldrar mömmu minnar fluttu hingað fyrir um 50 árum.
Menntun: Tómstunda- og félagsmálafræðingur.
Atvinna: Bæjarstjóri Hveragerðisbæjar.
Besta bók sem þú hefur lesið: Besta nýlega bókin sem ég hef lesið er Allar litlu lygarnar eftir Evu Björgu. Undanfarin tvö ár hafa svona glæpasögur verið í mestu uppáhaldi.
Uppáhalds sjónvarpsþáttur: Sherlock þættirnir með Benedict Cumberbatch í aðalhlutverki eru líklega í uppáhaldi hjá mér. En svo hef ég alltaf gaman af þægilegu efni eins og The Office eða New Girl.
Hvaða bíómynd getur þú horft á aftur og aftur: Ætli það séu ekki þessar stóru klassísku myndir eins og Lord of The Rings, Star Wars, Indiana Jones og þannig myndir.
Te eða kaffi: Klárlega kaffi en hef trú á því að teið muni koma sterkt inn á næstu árum.
Uppáhalds árstími: Enginn sérstakur árstími þannig séð en ég er bara alltaf þakklátur að fá alvöru árstíð. Mikinn snjó um vetur og sól yfir sumarið.
Besta líkamsræktin: Í grunninn finnst mér göngutúrarnir bestir en svo kemur allskonar í bylgjum hjá mér, hvort sem það eru hjólaferðir, hlaupatúrar eða lyftingar.
Hvaða rétt ertu bestur að elda: Ég hef ótrúlega gaman af því að elda og á marga rétti sem mér finnst skemmtilegt að gera. En ég held að ég sé bestur þegar ég er með eitthvað á grillinu eða þegar ég hendi í pottrétt.
Við hvað ertu hræddur: Ég hélt alltaf að ég væri ekki hræddur við til dæmis geitunga og köngulær þangað til að ég sá alvöru skordýr þegar ég bjó erlendis og áttaði mig á því að okkar eru frekar smágerð.
Klukkan hvað ferðu á fætur: Ég er hræðilegur á morgnana og vakna alltaf of seint. Draumurinn er að geta bara vaknað klukkan 06:00 og byrjað daginn en eftir mörg ár af svefnlitlum nóttum með lítil börn hef ég aldrei náð að koma mér á þann stað.
Hvað gerir þú til að slaka á: Fer út í göngutúr eða hreyfi mig eitthvað, fer í pottinn heima eða kíki í sund. Svo finnst mér oft skemmtilegra að spila tölvuleiki frekar en að horfa á sjónvarp ef ég þarf að kúpla mig út. En í daglegu lífi með börn og dýr reynir maður að finna slökun í litlu hlutunum eins og þegar maður er að elda eða svæfa.
Hvað finnst þér vanmetið: Kannski ekki endilega vanmetið en að ganga til vinnu eða í búðina í stað þess að keyra.
En ofmetið: Að vera fullorðinn og þurfa að ákveða hvað á að vera í kvöldmat á hverjum einasta degi. Þegar maður er barn er það draumurinn en svo er það bara hið endalausa verkefni.
Hvaða lag kemur þér alltaf í stuð: Paradise City með Guns N’ Roses.
Besta lyktin: Nýslegið gras.
Bað eða sturta: Sturta er betri en bað en potturinn er bestur.
Leiðinlegasta húsverkið: Að brjóta saman þvott verður oft þreytt með stóra fjölskyldu en það er á sama tíma húsverk sem auðvelt er að gera betra með hlaðvarpi eða tónlist.
Besta ráð sem þér hefur verið gefið: Að það séu tækifæri í öllum aðstæðum.
Nátthrafn eða morgunhani: Nátthrafn sem vill vera morgunhani.
Fallegasti staður sem þú hefur komið á: Það toppar ekkert Hveragerði.
Hvað fer mest í taugarnar á þér: Samfélagsmiðlar eiga það til að stuða mig. Annað hvort rekst maður á leiðinlega umræðu eða eyðir alltof miklum tíma í að skoða ekki neitt.
Neyðarlegasta atvik sem þú hefur lent í: Þegar það kom einstaklingur og var að selja happdrættismiða fyrir heyrnarlausa. Ég talaði við hann á íslensku en skipti svo yfir í ensku þegar hann heyrði ekki í mér. Skammast mín í hvert skipti sem ég hugsa um þetta atvik.
Hvað ætlaðir þú að verða þegar þú yrðir stór: Ég sá stundum fyrir mér að vera ljósmyndari sem myndi ferðast um heiminn og taka myndir.
Fyndnasta manneskja þú veist um: Konan mín er án efa fyndnasta manneskja sem ég þekki en yngsti sonur okkar virðist ætla að veita henni harða samkeppni.
Ef þú fengir að vera einhver annar í einn dag hver þá: Ég myndi líklega vilja vera einhver afreksíþróttamaður eins og Messi og reyna að skilja hvernig er að vera einn af bestu í einhverju í heiminum.
Hvaða samfélagsmiðil notar þú mest: Ætli það sé ekki Instagram og Facebook.
Ef þú værir alvaldur í einn dag: Breyta klukkunni á Íslandi.
Eitthvað sem fæstir vita um þig: Ég er hálfblindur á einu auga.
Mesta afrek í lífinu: Ætli það sé ekki samblanda af mörgu síðustu ár, eins og búa erlendis, stofna fjölskyldu, eignast börn, klára nám og allt það. Að þroskast og lifa lífinu finnst mér alltaf vera afrek.
Ef þú mættir ferðast fram eða aftur í tímann, hvert myndir þú þá fara: Ef ég ætti að ferðast og lifa á öðrum tíma myndi ég líklega fara aftur í tímann. Ef þetta væri stutt hopp og svo til baka myndi ég fara 300-500 ár fram í tímann.
Lífsmottó: Treystu innsæinu.
Hvað ætlar þú að gera um helgina: Framundan eru Blómstrandi dagar í Hveragerði sem ég ætla að njóta. Stórkostleg dagskrá og nóg um að vera alla helgina.
Sendu okkur tilnefningu að Sunnlendingi vikunnar á netfrett@sunnlenska.is