Sigurjón Andrésson hóf störf sem sveitarstjóri Skaftárhrepps í síðasta mánuði. Hann hefur víðtæka reynslu af stjórnun og sveitarstjórnarmálum en hann starfaði áður sem bæjarstjóri Sveitarfélagsins Hornafjarðar og hefur jafnframt langa reynslu úr atvinnulífinu. Skaftárhreppur er víðfeðmt sveitarfélag með dreifða byggð og fjölbreytt atvinnu- og mannlíf. Þar eru framundan bæði mikilvæg verkefni og spennandi tækifæri, meðal annars á sviði innviða, þjónustu, húsnæðis, atvinnu- og byggðaþróunar.
Fullt nafn: Sigurjón Andrésson.
Fæðingardagur, ár og staður: 10. desember 1970 í Vestmannaeyjum. Fæddur Eyjamaður og orðinn Sunnlendingur vikunnar, svo þetta er allt að smella saman.
Fjölskylduhagir: Giftur Margréti Söru Guðjónsdóttur og við eigum dæturnar Hrafnhildi Svölu og Heklu Sif. Kærasti Hrafnhildar er Helgi Snær og saman eiga þau hundinn Kviku. Svo er Bella okkar auðvitað fullgildur fjölskyldumeðlimur og sú sem stjórnar heimilinu.
Hverra manna ertu: Foreldrar mínir eru Hrafnhildur Ástþórsdóttir og Andrés Sigmundsson.
Menntun: Ég er iðnmenntaður bakari í grunninn, með diplómu í mannauðsstjórnun frá Háskóla Íslands, alþjóðlega verkefnastjórnunargráðu frá Bandaríkjunum og meistaragráðu í viðskiptafræði, Executive MBA, frá Háskólanum í Reykjavík. Svo hefur lífið sjálft verið kröftugur skóli.
Atvinna: Sveitarstjóri Skaftárhrepps og formaður körfuknattleiksdeildar Sindra á Hornafirði. Tvö hlutverk þar sem maður þarf samstillt lið, skýra leikáætlun og slatta af seiglu.
Besta bók sem þú hefur lesið: Býr Íslendingur hér? – minningar Leifs Muller.
Uppáhalds sjónvarpsþáttur: Ég horfi ekki mikið á sjónvarpsþætti en ColdFusion á YouTube er í uppáhaldi. Þar kemur nýr þáttur um það bil einu sinni í viku.
Hvaða bíómynd getur þú horft á aftur og aftur: The Shawshank Redemption. Svo endum við fjölskyldan aðfangadag alltaf á því að horfa á Love Actually.
Te eða kaffi: Kaffi.
Uppáhalds árstími: Sumarið.
Besta líkamsræktin: Að hjóla enduro á torfæruhjólinu mínu um fallega landið okkar. Það æfir líkamann, einbeitinguna og hæfileikann til að standa snöggt aftur upp eins og ekkert hafi í skorist.
Hvaða rétt ertu bestur að elda: Kjöt og gott grill eiga vel við mig.
Við hvað ertu hræddur: Ég hef aldrei orðið hræddur – hjólavinir mínir skilja þennan. En ég er mest hræddur við að eitthvað komi fyrir þau sem ég elska.
Klukkan hvað ferðu á fætur: Ég fer á fætur klukkan sjö á morgnana, fæ mér kaffi og fer yfir dagskrá dagsins – sem svo stenst aldrei í mínu tilfelli.
Hvað gerir þú til að slaka á: Að keyra vélknúið ökutæki hefur alltaf veitt mér hugarró, hvort sem það er bíll eða mótorhjól. Svo finnst mér auðvitað gott að slaka á með fjölskyldu og góðum vinum.
Hvað finnst þér vanmetið: Að hlusta og heyra áður en maður svarar.
En ofmetið: Að hafa skoðun á öllu strax.
Hvaða lag kemur þér alltaf í stuð: Otherside með Red Hot Chili Peppers.
Besta lyktin: Lyktin af íslensku sumri eftir rigningu eða bensíni á góðum mótorhjóladegi.
Bað eða sturta: Bað.
Leiðinlegasta húsverkið: Við höldum tvö heimili, annað í Flóahreppi og hitt á Klaustri. Í Hvítholti dugar oft að bíða og hlutirnir eiga það til að gerast. Á Klaustri gengur það hins vegar ekki. Annars finnst mér ekkert húsverk sérlega leiðinlegt.
Besta ráð sem þér hefur verið gefið: Segðu VIÐ en ekki ÉG!
Nátthrafn eða morgunhani: Morgunhani í vinnunni en síðastur heim á Þjóðhátíð.
Fallegasti staður sem þú hefur komið á: Meðalland og Landbrot í Skaftárhreppi eru í algjörum sérflokki hjá mér og voru það löngu áður en ég gerðist sveitarstjóri.
Hvað fer mest í taugarnar á þér: Hroki í samskiptum.
Neyðarlegasta atvik sem þú hefur lent í: Í hvert skipti sem ég man ekki nöfn vinkvenna dætra minna til margra ára.
Hvað ætlaðir þú að verða þegar þú yrðir stór: Ég man ekki eftir því að hafa haft sérstaka áætlun um það – enda er ég eiginlega ekki enn búinn að ákveða það!
Fyndnasta manneskja sem þú veist um: Ég hef alltaf kosið að vera nálægt fólki sem hefur húmor og það koma margir upp í hugann. Einn þeirra er Brói, vinur minn frá Hornafirði. Hann hefur beinskeyttan, svartan húmor og kann að segja sögur.
Ef þú fengir að vera einhver annar í einn dag, hver þá: Einar Benediktsson. Það væri gaman að upplifa skáldagáfu Einars Ben og sýn hans á framtíð okkar Íslendinga.
Hvaða samfélagsmiðil notar þú mest: Facebook.
Ef þú værir alvaldur í einn dag: Úff, þegar stórt er spurt. Ég myndi ganga frá stærstu innviðamálum landsbyggðarinnar og skipa svo öllum að lesa Býr Íslendingur hér?
Eitthvað sem fæstir vita um þig: Ég hef mjög mikinn áhuga á örnefnum og á fimmtán eintök af stórmerkilegri bók sem heitir Örnefni í Vestmannaeyjum.
Mesta afrek í lífinu: Fjölskyldan mín, án nokkurs vafa. Starfsheitin koma og fara en fólkið manns er það sem skiptir máli.
Ef þú mættir ferðast fram eða aftur í tímann, hvert myndir þú þá fara: Ég myndi vilja fara aftur til um árið 900 og virða Suðurlandið fyrir mér eins og það var við hið svokallaða landnám.
Lífsmottó: Ég á mér ekkert sérstakt lífsmottó en ég er bjartsýnn og jákvæður að eðlisfari, legg rækt við það og það hefur reynst mér vel.
Hvað ætlar þú að gera um helgina: Ég verð í mínu „hinu heima“ í Flóahreppi og nýt þess að verja tíma með fjölskyldunni.
Sendu okkur tilnefningu að Sunnlendingi vikunnar á netfrett@sunnlenska.is