Alls útskrifuðust 52 nýstúdentar úr Menntaskólanum að Laugarvatni á dögunum við hátíðlega athöfn. Svo bar við að tveir útskriftarnemendur dúxuðu og annar stúdentanna er Óskar Ingi Eyþórsson frá Selfossi. Hann hlaut einnig styrk úr Styrktarsjóði Kristins og Rannveiga fyrir framúrskarandi frammistöðu í námi og félagsstörfum.
Fullt nafn: Óskar Ingi Eyþórsson.
Fæðingardagur, ár og staður: Fæddur 13. maí 2007 í Danmörku.
Fjölskylduhagir: Ég bý hjá kærustu minni vegna skóla í haust.
Hverra manna ertu: Pabbi minn heitir Eyþór Sigurðsson, hann er frá Laugarvatni. Mamma mín heitir Nanna Rún Sigurðardóttir og hún er úr Hrunamannahreppnum. Ég á svo tvo litla bræður.
Menntun: Stúdentspróf á náttúruvísindabraut úr Menntaskólanum að Laugarvatni.
Atvinna: Ég vinn hjá Eimskip á bílavöllum í sumar en ég fer í háskóla í haust.
Besta bók sem þú hefur lesið: Ég les allt of lítið af bókum en uppáhaldið mitt hingað til er Hin helga kvöl eftir Stefán Mána.
Uppáhalds sjónvarpsþáttur: Game of Thrones er algerlega uppáhaldið.
Hvaða bíómynd getur þú horft á aftur og aftur: Ég get horft endalaust á allar myndirnar í trílógíunni How to Train Your Dragon.
Te eða kaffi: Kaffi.
Uppáhalds árstími: Sumar og vetur eru í jafntefli hjá mér.
Besta líkamsræktin: Fer oftast bara í World Class.
Hvaða rétt ertu bestur að elda: Að elda hamborgara er mín sérfræðigrein.
Við hvað ertu hræddur: Ég er pínu lofthræddur.
Klukkan hvað ferðu á fætur: Fyrir vinnuna í sumar fer ég á fætur klukkan 7.
Hvað gerir þú til að slaka á: Mér finnst gott að setjast í sófann og horfa á einhverja þætti.
Hvað finnst þér vanmetið: Íslendingar, að minnsta kosti á mínum aldri, vanmeta alltaf fegurðina í íslenskri náttúru.
En ofmetið: Módernisk húsa-hönnun.
Hvaða lag kemur þér alltaf í stuð: Dear Maria, Count Me In með All Time Low.
Besta lyktin: Af tvígengisvélum.
Bað eða sturta: Sturta.
Leiðinlegasta húsverkið: Mér finnst leiðinlegast að þvo þvottinn.
Besta ráð sem þér hefur verið gefið: Stundum er betra að hugsa minna áður en maður gerir hluti.
Nátthrafn eða morgunhani: Ég er mesti nátthrafn sem fyrirfinnst.
Fallegasti staður sem þú hefur komið á: Seljalandsfoss eða gamla góða Laugarvatn.
Hvað fer mest í taugarnar á þér: Þegar fólk tyggur hátt.
Neyðarlegasta atvik sem þú hefur lent í: Þegar ég fór óvart með símann í vasanum út í sjóinn úti á Spáni og fattaði það ekki í 20 mínútur að hann hafi verið þar.
Hvað ætlaðir þú að verða þegar þú yrðir stór: Ég ætlaði mér alltaf að verða húsasmiður, þangað til nýlega.
Fyndnasta manneskja þú veist um: Kærastan mín.
Ef þú fengir að vera einhver annar í einn dag hver þá: Victor Wembanyama, mig langar að prófa alla NBA upplifunina, ásamt því að vera jafn stór og hann.
Hvaða samfélagsmiðil notar þú mest: Snapchat eða TikTok.
Ef þú værir alvaldur í einn dag: Ég myndi gera heiminn eins mikið betri og ég mögulega get.
Eitthvað sem fæstir vita um þig: Ég er frekar latur.
Mesta afrek í lífinu: Að vera ég og að ná öllum þeim markmiðum sem ég hef sett mér er besta afrekið mitt.
Ef þú mættir ferðast fram eða aftur í tímann, hvert myndir þú þá fara: Fram í tímann og skoða verðbréfamarkaðinn, svo ég geti orðið ríkur þegar ég færi til baka.
Lífsmottó: Alltaf að halda áfram að synda (Just keep swimming).
Hvað ætlar þú að gera um helgina: Ég er í útskriftarferð í Mexico og ég verð í sólbaði á ströndinni um helgina!
Sendu okkur tilnefningu að Sunnlendingi vikunnar á netfrett@sunnlenska.is