Önnur fjölmennasta brautskráning í sögu Fjölbrautaskóla Suðurlands fór fram í síðustu viku í íþróttahúsinu Iðu á Selfossi. Ólafía Ragnheiður Þórðardóttir frá Hvolsvelli var dúx skólans og fékk styrk til frekara náms frá Hollvarðasamtökum FSu.
Fullt nafn: Ólafía Ragnheiður Þórðardóttir.
Fæðingardagur, ár og staður: Ég fæddist þann 6. janúar, árið 2007 á Selfossi.
Fjölskylduhagir: Ég bý heima hjá mömmu og pabba á Hvolsvelli. Ég á eina systur og þrjá bræður, þau Þóru Kristínu, Jón, Emil og Dag, sem eru öll uppkomin.
Hverra manna ertu: Pabbi minn er Þórður Jónsson frá Bakkakoti og mamma mín er Jónína Hildigunnur Ólafsdóttir frá Oddhól.
Menntun: Ég er með stúdentspróf af íþróttalínu frá Fjölbrautaskóla Suðurlands.
Atvinna: Ég starfa sem þjálfari hjá 6. og 7. flokki kvenna hjá KFR. Í sumar vinn ég einnig í sumarfrístund á Hvolsvelli og í haust stefni ég á að fara í fulla vinnu.
Besta bók sem þú hefur lesið: Ég hugsa að það sé Brennu-Njáls saga.
Uppáhalds sjónvarpsþáttur: Það er ómögulegt að velja á milli Desperate Housewives, Jane the Virgin og Grey’s Anatomy.
Hvaða bíómynd getur þú horft á aftur og aftur: Ég fæ aldrei nóg af Stellu í orlofi.
Te eða kaffi: Ég drekk bæði en hugsa að ég velji kaffi.
Uppáhalds árstími: Tvímælalaust íslenska sumarið.
Besta líkamsræktin: Góð fótboltaæfing toppar allt.
Hvaða rétt ertu best að elda: Ég er mikill matgæðingur og elda mikið, en það sem ég er best að elda er líklega fajitas með eplasalsa, pico de gallo og heimagerðu guacamole.
Við hvað ertu hrædd: Ég er alveg sjúklega hrædd við fiska, sama hversu stórir eða litlir þeir eru.
Klukkan hvað ferðu á fætur: Fyrir vinnu vakna ég klukkan sjö og reyni að vera komin fram úr fyrir hálf átta.
Hvað gerir þú til að slaka á: Góð sundferð í sundlaugina á Hvolsvelli klikkar aldrei.
Hvað finnst þér vanmetið: Klassísk íslensk sveitaballatónlist er gríðarlega vanmetin, sérstaklega af krökkum á mínum aldri.
En ofmetið: Að mínu mati er ofmetið að þurfa áfengi til að skemmta sér.
Hvaða lag kemur þér alltaf í stuð: Ábyggilega! með Sálinni klikkar seint.
Besta lyktin: Lyktin af gróðrinum þegar hann tekur við sér eftir rigningu á vorin.
Bað eða sturta: Við eigum bara sturtu heima, þannig að ég verð að segja sturta.
Leiðinlegasta húsverkið: Það er fátt verra en að brjóta saman þvottahrúgu og guð minn góður, enn verra að reyna að láta fötin passa ofan í skúffu.
Besta ráð sem þér hefur verið gefið: Besta ráð sem ég hef fengið er að vera sterk, standa með sjálfri mér og gefast ekki upp þó að á móti blási.
Nátthrafn eða morgunhani: Nátthrafn og algjör svefnpurka.
Fallegasti staður sem þú hefur komið á: Íslenska hálendið og Þórsmörkin eiga sérstakan stað í hjarta mínu.
Hvað fer mest í taugarnar á þér: Það fer fátt meira í taugarnar á mér en neikvæðni og þröngsýni.
Neyðarlegasta atvik sem þú hefur lent í: Það hlýtur að vera þegar eldri kona opnaði óvart á mig inni á klósetti í Kringlunni á meðan ég stóð og var að teygja mig í lásinn með buxurnar á hælunum.
Hvað ætlaðir þú að verða þegar þú yrðir stór: Ég ætlaði alltaf að verða vörubílstjóri eins og pabbi.
Fyndnasta manneskja þú veist um: Hún Þóra Kristín systir mín, þegar hún hlær að sínum eigin bröndurum.
Ef þú fengir að vera einhver annar í einn dag hver þá: Ég væri til í að vera 8 ára litla frænka mín, til þess að geta leikið mér í einn dag með engin heimsins vandamál.
Hvaða samfélagsmiðil notar þú mest: Ábyggilega TikTok eða Snapchat.
Ef þú værir alvaldur í einn dag: Myndi ég gera heiminn að miklu betri stað.
Eitthvað sem fæstir vita um þig: Ég man öll bílnúmer. Jafnvel hjá fólki sem ég þekki ekki persónulega.
Mesta afrek í lífinu: Það verður að vera stúdentsprófið og að hafa dúxað.
Ef þú mættir ferðast fram eða aftur í tímann, hvert myndir þú þá fara: Ég myndi fara aftur í tímann í sveitina til ömmu og afa beggja megin. Sjá hvernig allt var, eyða tíma með þeim og upplifa gamla tímann í sveitinni.
Lífsmottó: No regrets.
Hvað ætlar þú að gera um helgina: Ég er úti á Krít í útskriftarferð að njóta. Planið er að fara að versla, slaka á og njóta!
Sendu okkur tilnefningu að Sunnlendingi vikunnar á netfrett@sunnlenska.is