Fjölskylduhátíðin Fjör í Flóa hófst síðastliðinn miðvikudag og stendur fram á laugardagskvöld. Hápunktur hátíðarinnar verður í og við félagsheimilið Þingborg eftir hádegi á laugardag, þar sem boðið verður upp á fjölbreytta fjölskyldudagskrá. Þar verður meðal annars hin sívinsæla landbúnaðartækjasýning sem Rúnar Magnússon í Súluholti, nefndarmaður í mennningarnefnd Flóahrepps, hefur haldið utan um í áraraðir.
Fullt nafn: Rúnar Magnússon.
Fæðingardagur, ár og staður: 18. janúar 1978, í Reykjavík.
Fjölskylduhagir: Í sambúð með Maríu Hödd Lindudóttir. Eigum tvo stráka, þá Hjörleif Mána 18 ára og Jón Oliver 16 ára.
Hverra manna ertu: Sonur Sigrúnar Sigurðardóttir sauðfjárbónda og listamanns í Súluholti.
Menntun: Húsasmiður og sjálfmenntaður reddari.
Atvinna: Vinn hjá SG Húsum stærsta timburhúsaframleiðanda á Íslandi. Rek einnig eigið verkstæði í Súluholti. Þar er ég helst að ryðverja bíla og laga ryðskemmdir. Einnig ýmis smíði sem falla til og lagfæringar.
Besta bók sem þú hefur lesið: Allar Útkallsbækurnar.
Uppáhalds sjónvarpsþáttur: Ég er meira fyrir bíómyndir.
Hvaða bíómynd getur þú horft á aftur og aftur: James Bond.
Te eða kaffi: Alltaf kaffi.
Uppáhalds árstími: Vorið ekki spurning. Því þá vaknar lífið.
Besta líkamsræktin: Að vera alltaf að.
Hvaða rétt ertu bestur að elda: Ég er bestur í að grilla kjöt.
Við hvað ertu hræddur: Er ekki hræddur við neitt sérstakt.
Klukkan hvað ferðu á fætur: Klukkan 6:35.
Hvað gerir þú til að slaka á: Fer í tónslökun og kannski í eigin verkefni í skemmunni.
Hvað finnst þér vanmetið: Heiðarleiki í pólitík.
En ofmetið: Að maður viti allt eftir menntun.
Hvaða lag kemur þér alltaf í stuð: Summer of 69 með Bryan Adams.
Besta lyktin: Besta lyktin er engin lykt.
Bað eða sturta: Sturta.
Leiðinlegasta húsverkið: Að fægja silfrið.
Besta ráð sem þér hefur verið gefið: Að vera sammála mér.
Nátthrafn eða morgunhani: Hvorugt. Ég er furðufugl.
Fallegasti staður sem þú hefur komið á: Fallegasti staðurinn er skemman í Súluholti.
Hvað fer mest í taugarnar á þér: Að bíða í biðröð.
Neyðarlegasta atvik sem þú hefur lent í: Fór á útihátíð fyrir 31 ári síðan með félögum mínum. Óðum yfir á til að koma okkur ókeypis inn á svæðið en við urðum við gegndrepa. Vorum komnir út í bíl til baka að rembast við að komast úr blautum gallabuxum og þá bankar löggan á gluggan. Það leit sannarlega ekki vel út.
Hvað ætlaðir þú að verða þegar þú yrðir stór: Það stóð alltaf til að verða bifvélavirki.
Fyndnasta manneskja þú veist um: Laddi, engin spurning.
Ef þú fengir að vera einhver annar í einn dag hver þá: Væri fróðlegt að vera Trump. Komast að því hvað er að gerast í kollinum á honum.
Hvaða samfélagsmiðil notar þú mest: Myndi segja Facebook.
Ef þú værir alvaldur í einn dag: Myndi koma á heimsfriði.
Eitthvað sem fæstir vita um þig: Að ég fæ mér yfirleitt Cheerios í morgunmat.
Mesta afrek í lífinu: Að verða pabbi.
Ef þú mættir ferðast fram eða aftur í tímann, hvert myndir þú þá fara: Ég myndi fara til 10. september 1998 og afstýra því að ég seldi fyrsta bíllinn minn. Sá alltaf eftir honum.
Lífsmottó: Að lifa fyrir líðandi dag.
Hvað ætlar þú að gera um helgina: Vera á Fjöri í Flóa, engin spurning, og þar ætla ég meðal annars að setja upp vélasýningu.
Sendu okkur tilnefningu að Sunnlendingi vikunnar á netfrett@sunnlenska.is