Í lok janúar fóru fram kosningar til nýrrar stjórnar Mímis, nemendafélags Menntaskólans að Laugarvatni. Nýr stallari var kjörinn Rangæingurinn Fannar Óli Ólason. Það er nóg að gerast í félagslífinu í menntaskólanum og nemendur eru þessa dagana meðal annars að æfa leikritið Gauragangur, sem verður frumsýnt í Aratungu þann 12. mars næstkomandi.
Fullt nafn: Fannar Óli Ólafsson.
Fæðingardagur, ár og staður: Ég fæddist þann 26. júní árið 2008 á Landspítalanum við Hringbraut.
Fjölskylduhagir: Við erum fimm manna fjölskylda, ég bý með foreldrum mínum heima en svo á ég tvíbura sem eru fædd árið 2003 og þau búa í bænum.
Hverra manna ertu: Pabbi minn heitir Ólafur Örn Oddsson og mamma mín heitir Gréta Helgadóttir og þau eru frá Hafnarfirði.
Menntun: Ég var í Hvolsskóla, grunnskólanum á Hvolsvelli og er núna á öðru ári í Menntaskólanum að Laugarvatni á náttúruvísindabraut.
Atvinna: Ég vinn aðra hverja helgi á N1 á Hvolsvelli.
Besta bók sem þú hefur lesið: Hef lesið allt eftir Þorgrím Þráins og Eva Björg Ægisdóttir er líka mjög góð, það er erfitt að velja bara eina bók.
Uppáhalds sjónvarpsþáttur: Uppáhalds þættir eru Breaking Bad eða Better Call Saul. Get ekki valið á milli.
Hvaða bíómynd getur þú horft á aftur og aftur: Ég horfi voða lítið á bíómyndir en Love Actually er tekin öll jól.
Te eða kaffi: Te.
Uppáhalds árstími: Sumarið er alltaf algjör stemning.
Besta líkamsræktin: Það er fínt að fara í ræktina inn á mill.
Hvaða rétt ertu bestur að elda: Ég á minn eigin rétt sem ég kalla „Fannar Special“ sem er ristað brauð, smjör, ostur og eggjahræra. Það er það sem ég hef gerst oftast og geri best.
Við hvað ertu hræddur: Klikkaða hunda…
Klukkan hvað ferðu á fætur: Skólinn byrjar 8:30 og oftast er ég að vinna með 8:20 nema þegar ég nenni að fara í morgunmat þá er það svona 8:00.
Hvað gerir þú til að slaka á: Ég spila á píanó eða gítar til að róa taugarnar.
Hvað finnst þér vanmetið: Facebook Reels.
En ofmetið: Í þessum töluðu orðum er ég er koma frá Tene, það er alveg næs en aaaðeins of ofmetið finnst mér.
Hvaða lag kemur þér alltaf í stuð: Vængjalaus með Sálinni og Uppvakningar með Nýdönsk og í rauninni hvað sem er með Nýdönsk kemur mér alltaf í gírinn.
Besta lyktin: Hmmm… ætli það sé ekki bara góður rakspíri eða gott ilmvatn.
Bað eða sturta: Í fyrri tíð var það bað en í seinni tíð jafnast ekkert á við góða sturtu.
Leiðinlegasta húsverkið: Ætli það sé ekki bara að skúra.
Besta ráð sem þér hefur verið gefið: Besta ráð sem ég hef fengið er „ákvörðunin sem maður tekur er alltaf rétt á þeirri stundu sem hún er tekin“ eða eitthvað svoleiðis. Man ekki alveg hvernig þetta er orðað en boðskapurinn finnst mér góður.
Nátthrafn eða morgunhani: Ég er klárlega nátthrafn.
Fallegasti staður sem þú hefur komið á: Það er bara Ísland í allri sinni heild og fegurð. Sá reyndar Stuðlagil fyrir nokkrum árum það var geðveikt flott.
Hvað fer mest í taugarnar á þér: Ætli það sé ekki bara lélegir mannasiðir.
Neyðarlegasta atvik sem þú hefur lent í: Hmmm… ekkert sem mér dettur í hug en það detta alltaf inn einhver vandræðaleg og óþægileg móment.
Hvað ætlaðir þú að verða þegar þú yrðir stór: Fótboltamaður var alltaf markmiðið og hvort það var ekki bara balletdansari eða eitthvað álíka ef ég man rétt.
Fyndnasta manneskja þú veist um: Þórður Kalman vinur minn er ekkert eðlilega fyndinn.
Ef þú fengir að vera einhver annar í einn dag hver þá: Ég myndi vilja vera Jacob Collier, mesti tónlistar gúrú sem ég veit um og það væri geðveikt að komast inn í heilann hans og fá að vera hann í einn dag.
Hvaða samfélagsmiðil notar þú mest: Líklegast Facebook, Facebook Reels er geðveikt stöff!
Ef þú værir alvaldur í einn dag: Leysa allan vanda í heiminum.
Eitthvað sem fæstir vita um þig: Ég hef ekki misst af FM95BLÖþætti síðustu fjögur ár.
Mesta afrek í lífinu: Það toppaði öll fyrri afrek að vera kjörinn stallari Menntaskólans að Laugarvatni.
Ef þú mættir ferðast fram eða aftur í tímann, hvert myndir þú þá fara: Ég myndi fara nokkur ár aftur í tímann og upplifa ’80s-’90s stemminguna.
Lífsmottó: „You miss all the shots you don’t take“ finnst mér gott. Mér finnst vera djúp hugsun á bakvið þetta og mikið til í þessu.
Hvað ætlar þú að gera um næstu helgi: Við á Laugarvatni erum að setja upp söngleikinn Gauragang sem er frumsýnt 12. mars og næsta helgi er svokölluð leiklistar helgi og þá eru allir sem koma að því upp frá alla helgina að æfa og allt á fullu.
Sendu okkur tilnefningu að Sunnlendingi vikunnar á netfrett@sunnlenska.is