Helga Margrét Höskuldsdóttir, frá Stóra-Ármóti í Flóahreppi, tók í vetur við keflinu sem spyrill í Gettu betur, spurningakeppni framhaldsskólanna. Hún hefur um árabil verið tengd Gettu betur sem spurningahöfundur og dómari – og einnig fyrrum keppandi en hún var á sínum tíma í liði Fjölbrautaskólans í Garðabæ. Helga Margrét verður í eldlínunni í kvöld þegar úrslitaviðureign Gettu betur fer fram í beinni á RÚV þar sem turnarnir tveir, MR og Verzló mætast.
Fullt nafn: Helga Margrét Höskuldsdóttir.
Fæðingardagur, ár og staður: 8. nóvember 1997 á Akureyri.
Fjölskylduhagir: Bý með Bergi Einari Dagbjartssyni og eins og hálfs árs dóttur okkar.
Hverra manna ertu: Foreldrar mínir eru Hilda Pálmadóttir og Höskuldur Gunnarsson, bændur á Stóra-Ármóti í Flóahreppi.
Menntun: Ég er með BA gráðu í stjórnmálafræði frá Háskóla Íslands og meistaragráðu í fjölmiðla- og boðskiptafræðum frá London School of Economics.
Atvinna: Íþróttafrétta- og dagskrárgerðarkona á RÚV.
Besta bók sem þú hefur lesið: Ég hef lesið Harry Potter bókaflokkinn oftar en góðu hófi gegnir en önnur sem mér dettur í hug er bókin This is Going to Hurt eftir Adam Kay, hló upphátt yfir henni.
Uppáhalds sjónvarpsþáttur: Held að Brooklyn Nine-Nine taki vinninginn hér.
Hvaða bíómynd getur þú horft á aftur og aftur: Aftur verð ég að segja Harry Potter.
Te eða kaffi: Hvorugt takk.
Uppáhalds árstími: Svona þegar haustið er að taka við af sumrinu, rútína að byrja en veðrið ennþá frekar næs.
Besta líkamsræktin: Góður heitur tími hjá Matthildi vinkonu minni í Hreyfingu.
Hvaða rétt ertu best að elda: Ég held að ég sé bara nokkuð góð í flestum svona klassískum heimilismat, steiktum fiski, lasagna og gúllasi til dæmis.
Við hvað ertu hrædd: Ég er enginn sérstakur aðdáandi þess að vera hátt uppi.
Klukkan hvað ferðu á fætur: Oftast svona um hálf átta/átta.
Hvað gerir þú til að slaka á: Les bók, elda eitthvað sem tekur langan tíma, eða horfi á eitthvað heilalaust raunveruleikasjónvarp.
Hvað finnst þér vanmetið: Að hjóla í vinnuna.
En ofmetið: Hlaup…inni, úti, uppi á fjöllum, mun aldrei verða hlaupatýpa.
Hvaða lag kemur þér alltaf í stuð: Inspector Norse með Todd Terje er lag sem ég uppgötvaði fyrir einhverja algjöra tilviljun og ég gírast alltaf svakalega þegar ég heyri það.
Besta lyktin: Nýslegið gras í heyskap.
Bað eða sturta: Ég barðist fyrir baði þegar við gerðum baðherbergið okkar upp en sturtan er vissulega oftar notuð.
Leiðinlegasta húsverkið: Það er hræðilega leiðinlegt að skúra.
Besta ráð sem þér hefur verið gefið: Að stundum þarf maður bara að láta sér leiðast.
Nátthrafn eða morgunhani: Alls ekki nátthrafn en ég er samt bara svona léttur morgunhani.
Fallegasti staður sem þú hefur komið á: Gríska eyjan Paros hefur held ég vinninginn hérna.
Hvað fer mest í taugarnar á þér: Fólk sem treður sér fremst í umferðarteppum.
Neyðarlegasta atvik sem þú hefur lent í: Lenti í því nýlega að síminn minn dó áður í þann mund sem ég var að fara að borga í apóteki eftir að hafa verið á Læknavaktinni. Var með kort með mér en það þurfti pin númer sem ég mundi ekki, var heldur ekki á bíl og það bólaði ekkert á mömmu sem ætlaði að pikka mig upp. Ég endaði á að þurfa að stoppa konu á bílastæðinu og hringja hjá henni í mömmu sem hafði farið á vitlausa læknavakt. Þetta blessaðist nú allt saman á endanum og ég lagði pin-ið á minnið í kjölfarið.
Hvað ætlaðir þú að verða þegar þú yrðir stór: Leikkona var lengst af efst á listanum.
Fyndnasta manneskja þú veist um: Ætli ég hlæi ekki almennt mest af sambýlismanni mínum.
Ef þú fengir að vera einhver annar í einn dag hver þá: Simone Biles, prófa að vera ógeðslega góð í fimleikum.
Hvaða samfélagsmiðil notar þú mest: Instagram.
Ef þú værir alvaldur í einn dag: Held ég myndi slökkva á öllum samfélagsmiðlum, bara svona til að láta okkur öll taka smá pásu.
Eitthvað sem fæstir vita um þig: Ég hata tannkrem og kúgast þegar fólk setur stórar slummur á tannburstana sína (bursta samt alveg tennurnar, bara með mjög litlu tannkremi).
Mesta afrek í lífinu: Að fæða barn.
Ef þú mættir ferðast fram eða aftur í tímann, hvert myndir þú þá fara: Ég er einhvern veginn miklu forvitnari um það hvernig hlutirnir verða í framtíðinni heldur en hvernig þeir voru áður fyrr, segjum að ég myndi hoppa svona 100 ár fram í tíman og taka stöðuna þar.
Lífsmottó: Pæla hæfilega lítið í því sem aðrir eru að gera og því sem öðru fólki finnst um það sem ég er að gera.
Hvað ætlar þú að gera um næstu helgi: Það eru tvær útsendingar framundan um helgina. Fyrst úrslit Gettu betur í Háskólabíó á föstudagskvöld og svo á sunnudaginn ætlum við vonandi að fylgjast með íslenska kvennalandsliðinu í handbolta tryggja sér sæti á EM með sigri á Portúgal á Ásvöllum.
Sendu okkur tilnefningu að Sunnlendingi vikunnar á netfrett@sunnlenska.is