Helga Guðrún Lárusdóttir hefur verið ráðin markaðs- og kynningarfulltrúi Rangárþings ytra og hefur hún störf í næstu viku. Helga er búsett á Selfossi, þekkir vel til á Suðurlandi öllu og hefur sterka tengingu við svæðið og nærsamfélagið. Hún hefur umfangsmikla reynslu af textagerð, ritstjórn, efnissköpun og vefumsjón auk þess að hafa reynslu af viðburða- og verkefnastjórn sem meðal annars eru á borði markaðs- og kynningarfulltrúans.
Fullt nafn: Helga Guðrún Lárusdóttir.
Fæðingardagur, ár og staður: 26. júní 1989 á Sjúkrahúsi Suðurlands, eins og mér skilst að það hafi heitið þá.
Fjölskylduhagir: Ég tilheyri fullkominni vísitölufjölskyldu. Ég er gift dalvíska Hafnfirðingum Árna Reyni Óskarssyni og saman eigum við Lárus Henrý, tíu ára, Maríu Júlí sem er næstum átta og tíkina Emmí, tveggja ára.
Hverra manna ertu: Þegar stórt er spurt! Ég er yfirleitt bara frænka hans Gumma Kalla en mamma mín er systir hans og heitir Guðbjörg Helga. Þar af leiðandi er ég barnabarn Helgu R. Einarsdóttur frá Garði í Hrunamannahreppi og Sigurdórs Karlssonar sem fæddist í Götu í sama hreppi. Í föðurætt eru amma mín og afi Svanhildur Jónsdóttir frá Seyðisfirði og Bjarni Þórarinsson frá Reyðarfirði, einnig þekktur sem Bjarni krabbi, blessuð sé minning þeirra. Ég ólst upp hjá mömmu og pabba mínum, Lárusi Helga Helgasyni, húsasmið á Selfossi, sem hefur verið pabbi minn frá því ég var tveggja ára en amma mín og afi hans megin eru Bára Berndsen frá Skagaströnd og Helgi Þór Jónsson úr Reykjavík.
Menntun: Ég er snyrtifræðingur, hálfur hársnyrtir og með diplómu í skapandi greinum frá Háskólanum á Bifröst.
Atvinna: Í gær lauk ég síðasta vinnudeginum mínum hjá ÞH Blikk, þar sem ég hef beygt ófáar áfellurnar síðustu tvö árin en eyddi síðasta mánuðinum í setja upp nýja vefsíðu fyrirtækisins, thblikk.is, sem ætti einmitt að detta í loftið sirka í dag! Í næstu viku tek ég svo við nýju starfi sem markaðs- og kynningarfulltrúi í Rangárþingi ytra og er eiginlega alveg æsispennt fyrir því.
Besta bók sem þú hefur lesið: Ég hef lesið og hlustað á rooosalega margar bækur, það er einmitt mjög þægileg afþreying við beygjuvélina. Ég er lúmskur nörd og er mjög hrifin af bókum sem snúast á einn eða annan hátt um tímaferðalög og sú sem kom fyrst upp í hausinn á mér er bókin Wrong Place Wrong Time eftir Lesley Sharp. Hún hreyfði við einhverju í mömmuhjartanu mínu og ég gæti ekki mælt meira með henni við bókaunnendur. Síðan verð ég líka að fá að mæla með bókaflokknum 1986 eftir sænska höfundinn Jesper Ersgård og The Book of Doors eftir Miranda Raison.
Uppáhalds sjónvarpsþáttur: Black Mirror.
Hvaða bíómynd getur þú horft á aftur og aftur: Stellu í orlofi, Notting Hill og Shaun of the Dead. Miklir kontrastar, ég veit.
Te eða kaffi: Te, ég er ekki enn komin upp á lagið með kaffidrykkju en kannski breytist það þegar ég fer að sitja alla þessa fundi í Rangárþingi ytra, hver veit?
Uppáhalds árstími: Sumar. Alltaf sumar.
Besta líkamsræktin: Allt sem hlífir mér við harðsperrum. Ég er með ofnæmi fyrir þeim.
Hvaða rétt ertu best að elda: Nauta tataki.
Við hvað ertu hrædd: Kóngulær og silfurskottur en ekki geitunga.
Klukkan hvað ferðu á fætur: Eins seint og ég kemst upp með hverju sinni.
Hvað gerir þú til að slaka á: Ég hlusta á hljóðbók á meðan ég elda, baka, teikna, lita, mála, prjóna, skrifa eða sinni einhverju af þúsundum áhugamála minna en þegar ég nenni ekki brasinu sem fylgir þeim þá „dúmskrolla“ ég.
Hvað finnst þér vanmetið: Heilbrigðisstarfsfólk.
En ofmetið: Kaffi.
Hvaða lag kemur þér alltaf í stuð: Walking on Sunshine með Katrina and the Waves.
Besta lyktin: Nýslegið gras.
Bað eða sturta: Sturta. Ég hef ekki eirð í að sitja í baði svo ég hætti að nenna því um það leyti sem ég hætti að taka barbídúkkur með mér í bað.
Leiðinlegasta húsverkið: Að ganga frá þvotti.
Besta ráð sem þér hefur verið gefið: Að halda inni gæsalappatakkanum á iPhone til að fá upp íslenskar gæsalappir.
Nátthrafn eða morgunhani: Nátthrafn. Hélt það myndi eldast af mér en ég er farin að tapa voninni um að það gerist úr þessu.
Fallegasti staður sem þú hefur komið á: Mýrin, ættarjörðin mín í Hrunamannahreppi, um hásumar.
Hvað fer mest í taugarnar á þér: Fordómafullt fólk.
Neyðarlegasta atvik sem þú hefur lent í: Ég get ekki skrifað um það á opinberum vettvangi en ég lendi óþægilega oft í því að reyna að opna dyr eða skott á vitlausum bílum, sem er alltaf mjög neyðarlegt.
Hvað ætlaðir þú að verða þegar þú yrðir stór: Hárgreiðslukona.
Fyndnasta manneskja sem þú veist um: Erfitt val á milli móðurbræðra minna. Ég segi því Dóri DNA.
Ef þú fengir að vera einhver annar í einn dag, hver þá: Ég væri til í að vera hundurinn minn. Ég er mjög forvitin að vita hvernig litapallettu hún sér, myndi vilja finna allar lyktirnar sem hún finnur og reyna að skilja hvað það er sem fær hana til að gelta á flugur, fugla, ketti, vindinn og meira og minna allt sem hreyfist.
Hvaða samfélagsmiðil notar þú mest: Instagram.
Ef þú værir alvaldur í einn dag: Ég myndi sigta út allt valdagráðugt og illa innrætt fólk og heilaþvo það svo það fengi sömu sýn á heiminn og ég. Svo myndi ég laga Golfstrauminn, gróðursetja fleiri og stærri tré á Íslandi til að bæta veðurkerfið okkar og redda fleiri hreinum vatnsuppsprettum og almennilegum menntastofnunum þar sem þeirra er þörf í þriðjaheims ríkjum. Svo myndi restin bara græja sig sjálf í kjölfarið.
Eitthvað sem fæstir vita um þig: Mér líður best í búbblunni minni. Það halda margir að því sé þveröfugt farið, því ég á auðvelt með að tala fyrir framan fullt af fólki, en mér líður bara langbest í mínum innsta hring og ég finn rosalega sjaldan löngun til að fara út meðal ókunnugs fólks. Svo er ég líka með blesu á enninu sem sést bara þegar ég er nýbúin í sólbaði.
Mesta afrek í lífinu: Að ná bílprófinu í fyrstu tilraun var lengi vel mitt helsta afrek. Svo eignaðist ég tvö börn sem eru svo framúrskarandi dásamlegar manneskjur að ég trúi eiginlega ekki að ég hafi búið þau til og get bara alls ekki annað en fært þau töluvert ofar á listann en bílprófið. Þar á eftir kemur svo að sjálfsögðu að fá loksins að vera Sunnlendingur vikunnar!
Ef þú mættir ferðast fram eða aftur í tímann, hvert myndir þú þá fara: Ég myndi fara aftur í tímann og hitta ömmur mínar og afa þegar þau voru á sama aldri og ég, eyða með þeim tíma, kynnast þeim á nýjan hátt og hitta foreldra mína sem börn. Ég held það væri stórkostleg upplifun. Annars, eins og gefur að skilja, eru mörg merkileg tímabil í heimssögunni og í lífi mínu sem ég myndi vilja heimsækja en þetta verður það fyrsta sem ég geri þegar ég kem höndunum yfir tímavél.
Lífsmottó: Ekki taka lífinu of alvarlega, þú lifir það hvort sem ekki af.
Hvað ætlar þú að gera um næstu helgi: Ef hann hangir þurr ætla ég að mála skjólveggina á pallinum mínum. Svo ætla ég að mynda eitt fermingarbarn og slæ líklega botninn í helgina með því að sjá Tindastól taka Stjörnuna í körfubolta á sunnudaginn!
Sendu okkur tilnefningu að Sunnlendingi vikunnar á netfrett@sunnlenska.is