Þorsteinn Haukur Harðarson á Selfossi gerði sér lítið fyrir og hljóp sitt fyrsta maraþonhlaup í Reykjavíkurmaraþoninu á dögunum til styrktar Píeta-samtökunum. Þorsteinn er með CP vinstra megin í líkamanum hafði glímt við mikla ofþyngd en fann sig í hlaupum eftir dvöl á Heilsustofnun í Hveragerði fyrir rúmum þremur árum. Maraþonhlaupið var sannkölluð þrekraun fyrir hann en hann kláraði það stoltur á seiglunni.
Fullt nafn: Þorsteinn Haukur Harðarson.
Fæðingardagur, ár og staður: 9. október 1990, Reykjavík.
Fjölskylduhagir: Ég er þriggja barna fjölskyldufaðir.
Hverra manna ertu: Foreldrar mínir heita Þórunn Gunnarsdóttir og Hörður Valdimarsson. Ég er að mestu alin upp í Garðabæ og Hafnarfirði. Bjó líka í nokkur ár í Ólafsvík sem er gjörsamlega dásamlegur staður. Bjó svo reyndar stuttlega á Selfossi í kringum eins árs aldur þegar pabbi var kokkanemi á Hótel Selfossi svo það má með sanni segja að ég hafi verið að snúa aftur heim þegar við fjölskyldan fluttum á Selfoss fyrir fimm árum síðan.
Atvinna: Starfa á skrifstofunni hjá Vinnumálastofnun á Suðurlandi. Shout-out á stelpurnar sem vinna með mér á skrifstofunni!
Besta bók sem þú hefur lesið: Besta bók sem ég hef lesið er án nokkurs vafa Þúsund bjartar sólir eftir Khaled Hosseini. Las hana á Tene árið 2008. Átti erfitt með að sofna og greip einhverja bók frá mömmu og ætlaði að athuga hvort 2-3 blaðsíður myndu ekki svæfa mig. Ég átti eftir að klára bókina áður en ég lagðist til svefns.
Uppáhalds sjónvarpsþáttur: Ég horfði nýlega á allar White Collar seríurnar aftur og fannst þær geggjaðar. Er síðan af kynslóðinni sem ólst upp við Friends og það væri eiginlega guðlast að minnast ekki á þá líka hér.
Hvaða bíómynd getur þú horft á aftur og aftur: Þegar ég var yngri varð það Pearl Harbour með Ben Affleck. Tók hana síðan um daginn og hún eldist ekkert bilaðslega vel.
Te eða kaffi: Það er klárlega kaffi. Drekk líklega alltof mikið af því
Uppáhalds árstími: Vorið. Þegar dagurinn fer að lengjast og tilhugsunin um að allt sumarið sé framundan yljar manni.
Besta líkamsræktin: Hérna verð ég klárlega að setja hlaupin. Tek rispur í styrktaræfingum og lyftum en gæti klárlega verið duglegri þar.
Hvaða rétt ertu bestur að elda: Ég er búinn að eiga nokkra stórleiki á grillinu í sumar.
Við hvað ertu hræddur: Ókunnuga hunda. Tek stóran sveig þegar ég mæti þeim úti á hlaupum. Og eiginlega bara dýr yfir höfuð.
Klukkan hvað ferðu á fætur: Vekjaraklukkan er stillt á 6:58 alla virka daga. Væri að ljúga ef ég segði að ég hoppi alltaf á fætur við fyrsta píp. Að sofa út um helgar er síðan eitthvað sem líkamsklukkan mín virðist alveg vera búin að taka af dagskrá.
Hvað gerir þú til að slaka á: Það kann að hljóma skrítið en oftast fer ég út að hlaupa til að slaka á. Finn einhverja ró frá amstri dagsins við að „Zone-a“ út í smá tíma í hlaupum. Síðan er alltaf gott að láta líða úr sér í heita pottinum eftir gott hlaup.
Hvað finnst þér vanmetið: Mér finnst chaos persónulega vanmetið. Fúnkera einhvern veginn best þegar allt er á milljón. Helst ef ég er að falla á deadline með eitthvað.
En ofmetið: Ofurhetjur og ofurhetjumyndir. Ég hef aldrei dottið á þann vagn. Vinum mínum til mikils ama. Er bara svo einfaldur að ég hef ekki þolinmæði í að horfa á myndir um eitthvað sem gæti ekki gerst í alvörunni.
Hvaða lag kemur þér alltaf í stuð: Ég var í miklum vandræðum með svar við þessari spurningu en svo allt í einu byrjaði „Livin on a prayer“ með Bon Jovi að óma í hausnum á mér og það rifjast upp fyrir mér augnablik þar sem ég hef öskursungið viðlagið í góðum gír
Besta lyktin: Nýsleginn knattspyrnuvöllur að vori. Það er ekkert betra.
Bað eða sturta: Klárlega sturtan. Síðan er alltaf næs að kíkja í heita pottinn á pallinum.
Leiðinlegasta húsverkið: Að hengja upp þvott. Það er kannski sjálfskapað víti en ég lét einhverntímann einhvern sannfæra mig um að þurrkarar væru vond uppfinning sem færu illa með föt. Það fer ótrúlega mikill tími í að hengja þetta allt á snúru.
Besta ráð sem þér hefur verið gefið: „Stick to it“ hefur reynst mér ákaflega vel í hlaupum og heilsueflingu seinustu misserin.
Nátthrafn eða morgunhani: Ég er nátthrafn í bata. Var einu sinni skelfilegur hvað þetta varðar en með hækkandi aldri og fleiri börnum er ég orðinn betri hvað þetta varðar.
Fallegasti staður sem þú hefur komið á: Heiðarvatn við Vík í Mýrdal er falin perla. Margar af mínum bestu æskuminningum eru þaðan.
Hvað fer mest í taugarnar á þér: Að leita að hlutum. Á t.d. í stöðugu stríði við yngstu heimilis meðlimina sem geta ómögulega vanið sig á að geyma sjónvarpsfjarstýringuna á sama stað. Hef fundið hana inni í ísskáp, í þvottakörfunni og og úti á trampólíninu.
Neyðarlegasta atvik sem þú hefur lent í: Hér er margt sem kemur upp í hugann en sumt að því kæri ég mig eiginlega ekki um að deila opinberlega. Ætli að besta dæmið sé ekki þegar ég var 18-19 ára og bauð stelpu sem ég var voða spenntur fyrir í bíó. Stefnumótið gekk vel framan af en þegar myndin var búin fann ég ekki bíllyklana mína. Eftir dauðaleit gafst ég upp og sá fram á að þurfa að láta að sækja okkur. Þegar við gengum út úr bíóinu tók ég síðan eftir því að lyklarnir voru í bílnum sem hafði verið í gangi alla myndina. Stefnumótastressið varð þess valdandi að ég gleymdi að drepa á bílnum.
Hvað ætlaðir þú að verða þegar þú yrðir stór: Draumurinn var alltaf að verða íþróttafréttamaður. Starfaði sem slíkur í nokkur ár.
Fyndnasta manneskja þú veist um: Ætli það sé ekki Haukur sonur minn. Hann er eins og pabbi sinn, elskar að fá fólk til að hlæja og rembist við að reyna að vera fyndinn frá því hann opnar augun að morgni og þar til hann lokar þeim aftur að kvöldi.
Ef þú fengir að vera einhver annar í einn dag hver þá: Væri til í að vera pólitískur ráðgjafi Bandaríkjaforseta í einn dag og hann yrði að hlusta á mig. Hugsa að heimurinn væri í aðeins betri málum eftir þann dag.
Hvaða samfélagsmiðil notar þú mest: Instagram.
Ef þú værir alvaldur í einn dag: Væri ekki bara sniðugast að nýta það tækifæri til að koma á heimsfriði í eitt skipti fyrir öll? Síðan myndi ég reyndar líka setja lög sem kveða á um að allir yfir 50 ára aldri sem ætla að eiga snjallsíma og önnur snjalltæki þurfi fyrst að sitja námskeið (sorry pabbi!).
Eitthvað sem fæstir vita um þig: Ég er með gott svona partý trix að geta kippt einum puttanum mínum í og úr lið að vild. Það hefur reyndar komið fyrir að ég nái ekki að kippa honum sjálfur aftur í lið svo ég er eiginlega hættur að leika þær listir.
Mesta afrek í lífinu: Fyrir utan börnin þá myndi ég telja að það hafi verið að taka heilsuna föstum tökum. Missa 60 kg með bættu mataræði, hreyfingu og sjálfsaga og svo hlaupa maraþon núna um daginn.
Ef þú mættir ferðast fram eða aftur í tímann, hvert myndir þú þá fara: Það væri alveg áhugavert að sjá hvernig hlutirnir í heiminum verða eftir 100 ár. Annars er ég bara nokkuð góður í núinu.
Lífsmottó: „Things turn out the best for those who make the best of the way things turn out“ er setning sem ég hef alltaf reynt að hafa svolítið að leiðarljósi. Síðan heyrði ég setningu sem mér finnst hafa komið mér langt á undanförnum árum. Það er einfaldlega „choose your attitude“.
Hvað ætlar þú að gera um næstu helgi: Um næstu helgi ætla ég að skella mér á leik Hauka og Selfoss í 2. deild karla þar sem mínir menn í Selfossi taka vonandi skref í átt að því að tryggja sér sæti í Lengjudeildinni að ári. Að sama skapi eru vinir mínir og fjölskylda ákaflega samstíga þegar kemur að því að fjölga mannkyninu og haustið er mikið „barnaafmælis-season“ Reiknast til að mér sé boðið í afmæli hjá fjórum börnum um helgina.
Sendu okkur tilnefningu að Sunnlendingi vikunnar á netfrett@sunnlenska.is