Verslunin Kappahl opnar á Selfossi á morgun, laugardag. Verslunarstjóri Kappahl er Selfyssingurinn Karen Ragnarsdóttir en hún er einnig verslunarstjóri í verslununum Ginu Tricot og Emil&Línu á Selfossi en þær hafa notið mikilla vinsælda frá því að þær opnuðu í Austurgarði síðasta sumar.
Fullt nafn: Karen Ragnarsdóttir.
Fæðingardagur, ár og staður: 17. júní 1991 á Selfossi.
Fjölskylduhagir: Í sambúð með Gísla Erni Þórissyni og saman eigum við synina Ragnar Storm og Þórir Jaka.
Hverra manna ertu: Foreldrar mínir eru Ragnar Pálsson og Herborg Anna Magnúsdóttir.
Menntun: Ég er með stílistagráðu frá Scandinavian Academy of Fashion Design og er í meistaranámi í mannauðs- og verkefnastjórnun.
Atvinna: Verslunarstjóri hjá Kappahl, Ginu Tricot og Emil&Línu á Selfossi.
Besta bók sem þú hefur lesið: Grafarþögn og Áður en ég sofna, annars fannst mér á tíma allt sem Arnaldur skrifaði topp eintök.
Uppáhalds sjónvarpsþáttur: Ég hata ekkert að horfa á Love Island og allt svona raunveruleika drama, en svo get ég horft á Gossip Girl og Grey’s aftur og aftur. Ég er eiginlega bara vandræðalega mikill hámhorfari en mér til varnar er ég yfirleitt að gera eins og tíu aðra hluti með því.
Hvaða bíómynd getur þú horft á aftur og aftur: Harry Potter, The Lord of the Rings og The Hobbit, klassískar jólamyndir á mínu heimili.
Te eða kaffi: Hvorugt nema það sé espresso martini.
Uppáhalds árstími: Haustið, litirnir, tískan, rútínan og allt sem því fylgir.
Besta líkamsræktin: Hot fit og hot yoga.
Hvaða rétt ertu best að elda: Þó ég segi sjálf frá þá er ég nú frekar góð í eldhúsinu. Ætli besti rétturinn um þessar mundir sé ekki pestó/piparosta kjúklinga-pastaréttur.
Við hvað ertu hrædd: Ég er mjög lofthrædd og svo hræðist ég alltaf það að missa fólkið mitt.
Klukkan hvað ferðu á fætur: Ef ég fæ að ráða þá frekar seint, en yfirleitt er það nú fyrr en ég kýs á virkum dögum, segjum svona 7:40 eftir nokkur góð snooze. Ég er ekki B týpa heldur eitthvað mun aftarlegra í stafrófinu.
Hvað gerir þú til að slaka á: Hitti fólkið mitt, spila, fara í nudd, það róar mig mikið að fara í gegnum dótið heima hjá mér og hreinsa til, helst losa það út af heimilinu. Svona þegar ég pæli í því þá er ég ekkert búin að slaka neitt rosalega mikið á upp á síðkastið.
Hvað finnst þér vanmetið: Þögnin og að koma fram við aðra af virðingu.
En ofmetið: Kaffi og bjór.
Hvaða lag kemur þér alltaf í stuð: Eins og er er það I Wanna Be Your Slave, en það er kannski svona meira að gíra mig upp lag. Eins og allt annað þá breytist það reglulega samt.
Besta lyktin: Af börnunum mínum þegar þau eru ungabörn og góð baksturs lykt. Riddler original olían er líka uppáhald.
Bað eða sturta: Sturta allan daginn, finnst bara ekkert notalegt við það að vera í baði.
Leiðinlegasta húsverkið: Ryksuga og þrífa klósettið.
Besta ráð sem þér hefur verið gefið: Að þurfa ekki að ákveða allt eða segja allt sem maður hugsar strax. Það er í lagi að sitja aðeins með hugsunum sínum og melta hlutina.
Nátthrafn eða morgunhani: Nátthrafn. Held bara að ég hafi aldrei nokkurntíman verið morgunhani.
Fallegasti staður sem þú hefur komið á: Austfirðirnir eiginlega bara í heild sinni, elska að keyra um þá og njóta útsýnisins. Mögulega spila tilfinngaböndin einhvað þar inn í en önnur amma mín er frá Austfjörðunum og við höfum verið mikið þar og ekkert nema góðar minningar.
Hvað fer mest í taugarnar á þér: Úff það er svo mismunandi og eftir skapi og þoli hvern dag, þoli ekki dónaskap almennt samt.
Neyðarlegasta atvik sem þú hefur lent í: Það mun eflaust ekki rata á internetið, svo eitt er víst. Hins vegar hefur hvatvísin í mér oft komið mér í ófá neyðarleg atvik.
Hvað ætlaðir þú að verða þegar þú yrðir stór: Lengi vel langaði mig að verða arkitekt.
Fyndnasta manneskja þú veist um: Kannski smá væmið svar en mér finnst ótrúlega spaugilegt oft að fylgjast með strákunum mínum, allt frá því hvað þeim dettur í hug að segja og eins hvernig þeir eru. Börn eru bara ótrúlega fyndin og skemmtileg þegar þau eru að uppgötva lífið. Minna væmið svar mér finnst allt sem Michael McIntyre segir og gerir bilaðslega fyndið.
Ef þú fengir að vera einhver annar í einn dag hver þá: Ég held ég hefði bara ekkert með það að gera að vera einhver önnur en ég er.
Hvaða samfélagsmiðil notar þú mest: Instagram.
Ef þú værir alvaldur í einn dag: Þá væru engin stríð og börn og eldra fólk, já og bara allir byggju við almennilegar aðstæður og væru elskuð.
Eitthvað sem fæstir vita um þig: Ég er ótrúlega ó-orðheppin, gæti ekki sagt rétt orðatiltæki þó mér væri borgað fyrir það eða sungið réttan texta. Hins vegar hefur það orðið til þess að mörg ný orðatiltæki hafa litið dagsins ljós. Svo er ég ótrúleg þegar kemur að mat, ég fæ æði fyrir einhverju og borða það í einhvern tíma, jafnvel ár og vill svo aldrei sjá það aftur því einhvað annað hefur tekið við, er samt öll að fullorðnast.
Mesta afrek í lífinu: Börnin mín.
Ef þú mættir ferðast fram eða aftur í tímann, hvert myndir þú þá fara: Aftur í tímann og eyða meiri tíma með fólkinu sem maður hefur misst í gegnum árin. Það sem ég gæfi ekki fyrir meiri tíma með ömmu og afa. Samt gef ég mér allt of lítinn tíma í það að hitta fólkið mitt sem er ennþá til staðar, alveg skammarlegt.
Lífsmottó: Lifa í núinu. Næ ég að fylgja því? Nei, bara alls ekki. Er oft búin að skipuleggja hin og þessi samtöl í hausnum á mér langt áður en þau eiga sér stað og oftar en ekki fara þau bara alls ekki eins og leikritið í hausnum á mér var búið að semja þau.
Hvað ætlar þú að gera um næstu helgi: Ég ætla að opna nýju Kappahl/Newbie búðina á Selfossi á slaginu 12 á laugardaginn! Mættu!
Sendu okkur tilnefningu að Sunnlendingi vikunnar á netfrett@sunnlenska.is