Sigríður Harpa Jónsdóttir hefur verið ráðin byggðaþróunarfulltrúi Rangárþings og hefur þegar tekið til starfa. Sem byggðaþróunarfulltrúi Rangárþings sinnir hún byggðaþróunarverkefnum fyrir bæði Rangárþing ytra og Rangárþing eystra. Í starfinu felst meðal annars ráðgjöf og handleiðsla á sviði atvinnu- og byggðaþróunar og miðlun upplýsinga og svæðisbundin verkefni á sviði byggðaþróunar.
Fullt nafn: Sigríður Harpa Jónsdóttir, alltaf kölluð Harpa nema þegar mamma var að siða mig til.
Fæðingardagur, ár og staður: Ég er fædd 22. maí 1985 í Reykjavík.
Fjölskylduhagir: Bý með Jóni Ægi og tveimur hundum, Hektori og Skottu.
Hverra manna ertu: Ég er örverpið hans pabba, Jóns Inga Baldvinssonar og hennar elsku mömmu heitinnar, Gyðu Guðmundsdóttur frá Rangá. Ég á tvo gamla bræður, Grétar og Max.
Menntun: Lífið hefur skólað mig til, sérstaklega síðasta árið. Annars er ég með stúdentspróf frá Fjölbrautaskóla Suðurlands, stundaði viðskiptafræði um tíma, með ýmis starfstengd námskeið í pokahorninu ofl.
Atvinna: Ég er glæ-nýtekin við starfi sem Byggðaþróunarfulltrúi Rangárþings ytra og Rangárþings eystra. Áður var ég rúm 16 ár á Hótel Rangá.
Besta bók sem þú hefur lesið: Ég er nú ekki mikill bókaormur, en bækurnar um Morðin í Åre þóttu mér góðar.
Uppáhalds sjónvarpsþáttur: The Madison koma fyrst upp í hugann enda nýlegir. En á léttari nótunum nefni ég Ísskápastríð.
Hvaða bíómynd getur þú horft á aftur og aftur: Top Gun er klassík.
Te eða kaffi: Ég er í teinu, spurning hvort ég skipti í kaffi þegar ég verð stór.
Uppáhalds árstími: Ég elska maí, sérstaklega seinnipartinn. Oft svo gott veður og auðvitað afmælis. En september er líka í uppáhaldi með haustlitadýrðina.
Besta líkamsræktin: Góðir labbitúrar í fallegri náttúru. Ég get reyndar ekki sleppt því að nefna reglulegu tímana mína hjá Marcel stórvini mínum. Hann er algjör gúrú.
Hvaða rétt ertu best að elda: Bara þá sem hafa mjög nákvæma uppskrift með magni og aðferð. Er ekki góður brasari né dassari. Jón Ægir tekur það.
Við hvað ertu hrædd: Illskuna sem svo mikil um allan heim í dag.
Klukkan hvað ferðu á fætur: Nýverið er það svona um sjöleytið.
Hvað gerir þú til að slaka á: Hef verið að læra kosti þess að stunda hugleiðslu og öndunaræfingar. Það hjálpar með slökun.
Hvað finnst þér vanmetið: Eitt álegg á pizzu.
En ofmetið: Samfélagsmiðlar.
Hvaða lag kemur þér alltaf í stuð: Hugsanlega Pump It, Black Eyed Peas.
Besta lyktin: Náttúran, þegar allt er að lifna við eftir veturinn.
Bað eða sturta: Alltaf sturtan.
Leiðinlegasta húsverkið: Þau eru nokkur en á toppnum eru líklega baðherbergisþrifin.
Besta ráð sem þér hefur verið gefið: Að fullkomnun er ekki málið.
Nátthrafn eða morgunhani: Ég hef hingað til verið mikill nátthrafn.
Fallegasti staður sem þú hefur komið á: Þeir eru nokkrir hér á landi, en ég var svo heppin að hafa fengið að ferðast mjög mikið með foreldrum mínum þegar ég var yngri og sérstaklega um hálendið.
Hvað fer mest í taugarnar á þér: Frekja, yfirgangur og dónaskapur er ekki að gera sig.
Neyðarlegasta atvik sem þú hefur lent í: Það eru örugglega þó nokkur til að velja úr, t.d. frá menntaskólaárunum en ég man þau sem betur fer ekki. Nema kannski rámar mig í eitt þegar ég var að læra að spóla í áttur með vini mínum á Bílanaust planinu og rýmisgreindin var eitthvað að klikka…
Hvað ætlaðir þú að verða þegar þú yrðir stór: Ég held nú alltaf að ég sé ekki orðin stór ennþá, en það blundaði lengi í mér að verða flugmaður og seinna þyrluflugmaður.
Fyndnasta manneskja þú veist um: Ari Eldjárn er með þeim fyndnari.
Ef þú fengir að vera einhver annar í einn dag hver þá: Myndi vilja vera Dóra, stórvinkona mín. Þá gæti ég eldað mér hrikalega góðan mat og bakað djúsí góðar hnallþórur. Og litið vel út með fjólubláan varalit á meðan.
Hvaða samfélagsmiðil notar þú mest: Samkvæmt skjátíma-mælingu símans míns þá hefur Facebook vinninginn.
Ef þú værir alvaldur í einn dag: Æ það væri svo margt á listanum, ekki viss um ég gæti valið hvar ætti að byrja.
Eitthvað sem fæstir vita um þig: Ef ég upplýsi um það hér þá verður það líklega ekki mikið lengur á fárra vitund.
Mesta afrek í lífinu: Tja, kannski bara að vera þokkalega góð manneskja sem er umhugað um fólkið sitt.
Ef þú mættir ferðast fram eða aftur í tímann, hvert myndir þú þá fara: Kannski bara skreppa aftur um hálft ár eða svo og knúsa mömmu einu sinni enn og tengdamömmu líka. Og næla mér í smá meiri visku hjá þeim um lífið og tilveruna.
Lífsmottó: Eitt bros getur dimmu í dagsljós breytt.
Hvað ætlar þú að gera um næstu helgi: Það er alls óráðið.
Sendu okkur tilnefningu að Sunnlendingi vikunnar á netfrett@sunnlenska.is