Landsliðskonan Dagný Brynjarsdóttir frá Hellu tilkynnti það í vikunni að hún hefði lagt knattspyrnuskóna á hilluna. Dagný á glæstan feril að baki, hún er næst markahæsta landsliðskona Íslands frá upphafi en alls skoraði hún 38 mörk í 122 leikjum. Dagný fór á fjögur stórmót með íslenska landsliðinu og hefur leikið hér á landi með Selfossi og Val en erlendis með Bayern München, Portland Thorns og West Ham.
Fullt nafn: Dagný Brynjarsdóttir.
Fæðingardagur, ár og staður: 10. ágúst 1991 í Reykjavík.
Fjölskylduhagir: Ég er gift Ómari Páli Sigurbjartssyni og saman eigum við þrjá syni.
Hverra manna ertu: Ég er alin upp á Hellu í Rangárvallasýslu. Foreldrar mínir eru Brynjar Svansson ættaður úr Reykjavík og Sigrún Anna Ólafsdóttir ættuð frá Hellu.
Menntun: Ég er með BSc í Sport Management og Masters gráðu í heilsufræði og kennslu. Ég er einnig búin að mennta mig sem styrktarþjálfari og einkaþjálfari. Ég klára svo UEFA-B þjálfararéttindin snemma á nýju ári.
Atvinna: Ég er í fæðingarorlofi þessa dagana en annars er ég íþróttakennari í Sunnulækjarskóla. Ég þjálfa einnig 6. flokk karla hjá Selfoss.
Besta bók sem þú hefur lesið: Svona í fljótu bragði myndi ég segja Harry Potter bækurnar.
Uppáhalds sjónvarpsþáttur: Game of Thrones held ég bara. Annars horfi ég mjög lítið á sjónvarpið og á þar af leiðandi eftir að sjá mikið af sjónvarpsþáttum.
Hvaða bíómynd getur þú horft á aftur og aftur: Ætli það séu ekki bara teiknimyndirnar sem að komu út þegar ég var lítil. Erum svolítið að vinna með Toy Story og Lion King á heimilinu þessa dagana.
Te eða kaffi: Kaffi. Ég er tiltölulega ný farin að drekka það svo ég þarf enn nóg af mjólk og helst einhverja sætu með.
Uppáhalds árstími: Sumarið. Ég elska sól og gott veður.
Besta líkamsræktin: Fótbolti.
Hvaða rétt ertu best að elda: Ætli það sé ekki kjúklingarétturinn minn með beikoni og döðlum. Hann er allavega mjög vinsæll á mínu heimili og hjá þeim sem að fá að smakka.
Við hvað ertu hrædd: Myrkrið og að deyja snemma frá börnunum mínum.
Klukkan hvað ferðu á fætur: Ætli það sé ekki um svona 7:15.
Hvað gerir þú til að slaka á: Ætli það sé ekki bara að leggjast upp í sófa klukkan 21 á kvöldin eftir að allir eru sofnaðir og húsverkin búin og skrolla smá í símanum. Annars finnst mér góð sólarlandaferð með sundlaug og strönd best.
Hvað finnst þér vanmetið: Samvera með fjölskyldunni og að verja tíma með þeim sem að manni þykir vænt um.
En ofmetið: Djammið.
Hvaða lag kemur þér alltaf í stuð: Æii það er bara mismunandi. Get hlustað á svo margt. Held að það sé ekkert sérstakt lag.
Besta lyktin: Nýslegið gras.
Bað eða sturta: Sturta.
Leiðinlegasta húsverkið: Ég myndi segja að taka úr uppþvottavélinni sé það leiðinlegasta þessa dagana.
Besta ráð sem þér hefur verið gefið: Að vera ég sjálf í viðtölum en ekki segja það sem að ég held að fólk vilji heyra.
Nátthrafn eða morgunhani: Morgunhani.
Fallegasti staður sem þú hefur komið á: CocoCay á Bahamaeyjum í Karíbahafinu.
Hvað fer mest í taugarnar á þér: Þegar fólk reynir að vera eitthvað annað en það er og hagar sér öðruvísi til að þóknast öðrum.
Neyðarlegasta atvik sem þú hefur lent í: Ætli það sé ekki þegar ég pissaði á mig á hlaupabrettinu í World Class þegar ég var tiltölulega ný farin að hlaupa aftur eftir að hafa eignast elsta son minn. Hugurinn og líkaminn réð við meira en pissu blaðran.
Hvað ætlaðir þú að verða þegar þú yrðir stór: Fyrst kennari og seinna atvinnumaður í fótbolta. Náði að afreka bæði.
Fyndnasta manneskja þú veist um: Maðurinn minn.
Ef þú fengir að vera einhver annar í einn dag hver þá: Cristiano Ronaldo. Ég væri til í að sjá hvernig hann lifir, hugsar um sig og æfir.
Hvaða samfélagsmiðil notar þú mest: Instagram.
Ef þú værir alvaldur í einn dag: Ég myndi finna lækningar við öllum sjúkdómum svo að fólk myndi hætta að deyja vegna þeirra. Ég myndi einnig vilja bjarga öllum börnum og koma þeim á örugga staði hvort sem að þau væru að kljást við stríð, hungursneið, hættur, vanrækslu eða aðra hluti.
Eitthvað sem fæstir vita um þig: Ég hef aldrei drukkið áfengi, né notað nikótín, tóbak eða önnur sterkari vímuefni.
Mesta afrek í lífinu: Synir mínir.
Ef þú mættir ferðast fram eða aftur í tímann, hvert myndir þú þá fara: Ég væri til í að fara fram í tímann og sjá hvernig synir mínir eru að spjara sig í lífinu eftir 65 ár.
Lífsmottó: Láttu drauma þína verða að veruleika.
Hvað ætlar þú að gera um helgina: Njóta á Tenerife með fjölskyldunni.
Sendu okkur tilnefningu að Sunnlendingi vikunnar á netfrett@sunnlenska.is