Leikfélag Selfoss frumsýnir í kvöld Skilaboðaskjóðuna eftir Þorvald Þorsteinsson í leikstjórn Gunnars Gunnsteinssonar í leikhúsinu við Sigtún. Það hefur verið í mörg horn að líta síðustu vikurnar hjá Jónheiði Ísleifsdóttur, sem er formaður Leikfélags Selfoss og annar af framkvæmdastjórum sýningarinnar.
Fullt nafn: Jónheiður Ísleifsdóttir.
Fæðingardagur, ár og staður: Ég er fædd 6. júní árið 1977 í Reykjavík.
Fjölskylduhagir: Ég er gift F. Ella Hafliðasyni (Don Ellione) og við eigum tvo svanga bröndótta ketti sem heita Litríkur og Smjörvi.
Hverra manna ertu: Foreldrar mínir eru Ísleifur Árni Jakobsson og Laufey Hrönn Þorsteinsdóttir.
Menntun: Ég er með meistaragráðu í Tölvunarfræði.
Atvinna: Ég vinn sem vörustjóri hjá hugbúnaðarfyrirtæki sem heitir LS Retail. Við seljum verslunarlausnir ofan á Business Central bókhaldskerfið og minn hópur sér um viðskiptagreindar lausnina okkar.
Besta bók sem þú hefur lesið: Hvítfeld eftir Kristínu Eiríksdóttur er uppáhalds bókinn mín. Um leið og ég var búin að lesa hana byrjaði ég upp á nýtt af því að ég hafði aldrei lesið bók sem kom mér svona mikið á óvart.
Uppáhalds sjónvarpsþáttur: Þessa daganna er það Diplomat á Netflix.
Hvaða bíómynd getur þú horft á aftur og aftur: Sense and Sensibility eða Sense and Sensdibilides eins og hún hét í vídeóbókinni okkar. Það er bara allt gott við þessa mynd. Frábær saga og geggjaður leikur. Lætur mér alltaf líða vel.
Te eða kaffi: Ég drekk kaffi, svart.
Uppáhalds árstími: Sumarið er uppáhalds árstíminn minn því þá getur maður verið úti á peysunni og allt verður svo fallegt í sól.
Besta líkamsræktin: Mér finnst best að gera stuttar HIIT æfingar og svo öndun og teygjur.
Hvaða rétt ertu best að elda: Ég er best í að elda það sem mér finnst gott, til dæmis Hvítlaukspasta með risarækjum. Ég elska að standa yfir pottum og pönnum og smakka og hræra og steikja og njóta.
Við hvað ertu hrædd: Ég er hrædd við að við séum að fjarlægjast hvort annað og hverfa inn í tækin okkar og þess vegna finnst mér svo mikilvægt að eiga áhugamál þar sem ég verð að hitta fólk augliti til auglitis.
Klukkan hvað ferðu á fætur: Alla virka daga fer ég á fætur kl. 7:25 svo ég sé örugglega mætt á morgunfundinn minn í Kópavoginum kl. 9. Um helgar finnst mér svo voða gott að kúra lengur nema það sé leikæfing.
Hvað gerir þú til að slaka á: Kúri uppi í sofa, undir teppi með kött í fanginu.
Hvað finnst þér vanmetið: Mér finnst mikilvægi þess að skapa vera vanmetið. Þó að sköpunarferlið geti verið erfitt er það svo ótrúlega gefandi og kennir okkur að prófa og þróa. Sérstaklega þegar við sköpum með öðrum.
En ofmetið: Franskar makkarónur og allskonar raftæki sem verið er að telja okkur trú um að við þurfum.
Hvaða lag kemur þér alltaf í stuð: Livin’ on a Prayer með Bon Jovi.
Besta lyktin: Besta lykt í heimi er lykt af þvotti sem hefur fengið að þorna úti á snúru.
Bað eða sturta: Ég er sturtukona, baðkarið mitt er kisudrykkjarstöð
Leiðinlegasta húsverkið: Vá mér finnst öll húsverk svakalega leiðinleg þó þau séu nauðsynlegt. Ef þarf að velja það mest leiðinlegasta þá er það örugglega að skúra.
Besta ráð sem þér hefur verið gefið: Best ráð sem mér hefur verið gefið er að vera hér, núna og að leyfa öllu og öllum, líka mér, að vera eins og þeir eru, núna og núna og núna.
Nátthrafn eða morgunhani: Það fer eftir ýmsu. Mér finnst best að vinna á morgnanna en það er stundum erfitt að koma sér upp í á kvöldin.
Fallegasti staður sem þú hefur komið á: Fallegustu staðir sem ég hef komið á eru skógar. Ég elska að ganga í gegnum skóg þar sem sólin kíkir í gegnum laufin. Og af öllu skógum eru ævintýra skógar fallegastir því þar getur allt gerst.
Hvað fer mest í taugarnar á þér: Að bíða eftir öðrum.
Neyðarlegasta atvik sem þú hefur lent í: Að gleyma texta á sviði er mjög vandræðalegt og það hefur alveg komið fyrir mig nokkrum sinnum. En þá er gott að vera með góðu fólki á sviðinu sem bjargar manni.
Hvað ætlaðir þú að verða þegar þú yrðir stór: Ég ætlaði alltaf að verða hárgreiðslukona. Mér fannst fátt skemmtilegra en að greiða vinkonum mínum.
Fyndnasta manneskja þú veist um: Mér finnst Ari Eldjárn ógeðslega fyndinn.
Ef þú fengir að vera einhver annar í einn dag hver þá: Ég myndi vilja vera Þórir Leo frændi minn. Hann hefur endalausa orku og trú á sjálfan sig.
Hvaða samfélagsmiðil notar þú mest: Ég nota Facebook lang mest bæði persónulega og í leikhúsinu við að halda utan um allskonar hópa.
Ef þú værir alvaldur í einn dag: Þá myndi ég eyða kvíða og hræðslu.
Eitthvað sem fæstir vita um þig: Að ég er með svarta sól á hægri ökklanum.
Mesta afrek í lífinu: Ég held að mitt mesta afrek sé að elska og vera elskuð. Ástin kostar ekkert og klárast aldrei og enginn hefur nokkurtíman orðið verri við það að vera elskaður eins og hann er.
Ef þú mættir ferðast fram eða aftur í tímann, hvert myndir þú þá fara: Ég myndi fara og banka uppá hjá Jane Austen því hún var svo mikill snillingur.
Lífsmottó: Allt sem þú veitir athygli vex og dafnar.
Hvað ætlar þú að gera um næstu helgi: Það er geggjuð helgi framundan hjá mér. Á föstudaginn ætlum við í Leikfélagi Selfoss að frumsýna Skilaboðaskjóðuna og það verður sko veisla í lagi. Á laugardaginn ætla ég að sofa því þetta hefur verið góð 7 vikna törn og kannski elda einhvern góðan kvöldmat. Á sunnudaginn sýnum við svo aðra uppselda sýningu á Skilaboðaskjóðunni.
Sendu okkur tilnefningu að Sunnlendingi vikunnar á netfrett@sunnlenska.is