Halla Sif Svansdóttir Hölludóttir garðyrkjubóndi á Hverabakka í Hrunamannahreppi hefur verið valin í hóp fyrstu 100 kvenhetja Matvæla- og landbúnaðarstofnunar Sameinuðu þjóðanna (FAO) í landbúnaði og byggðaþróun. Tilnefningar með nöfnum 600 kvenna frá 131 landi bárust til FAO. Sérstök athöfn verður haldin í Róm í október þar sem hinar 100 tilnefndu konur verða heiðraðar.
Fullt nafn: Halla Sif Svansd. Hölludóttir.
Fæðingardagur, ár og staður: 4. október 1991. Fæddist á Akranesi en er uppalin í Eyja- og Miklaholtshreppi á Snæfellsnesi.
Fjölskylduhagir: Einhleyp.
Hverra manna ertu: Pabbi minn hét Svanur Guðmundsson og var bóndi heima í Dalsmynni á Snæfellsnesi og alinn upp þar. Mamma heitir Halla Guðmundsdóttir, var grunnskólakennari og er frá Hlemmiskeiði á Skeiðum.
Menntun: Ég er með BA-gráðu í heimspeki og Mið-Austurlandafræðum frá Háskóla Íslands og er garðyrkjufræðingur frá Garðyrkjuskólanum að Reykjum.
Atvinna: Garðyrkjubóndi og framkvæmdastjóri hjá Sólskins grænmeti.
Besta bók sem þú hefur lesið: Uppáhaldsbókin mín frá því ég var lítil er alltaf Mómó. Ég held líka að fólk hefði almennt gott af því að lesa hana reglulega. Ég kíki svo reglulega í, eða hlusta á eitthvað úr, Braiding Sweetgrass eftir Robin Wall Kimmerer, sem er önnur bók sem myndi örugglega gera mörgum gott að glugga í.
Uppáhalds sjónvarpsþáttur: 30 Rock og Brooklyn Nine-Nine fá mig alltaf til að hlæja. Svo er ég líka skuggalega veik fyrir breskum þáttum þar sem fólk þarf að vera gott í að ljúga, eins og The Traitors og Would I Lie to You?
Hvaða bíómynd getur þú horft á aftur og aftur: Almennt er þolinmæðin kannski of takmörkuð til að horfa aftur og aftur á sömu myndina. En ég hef örugglega ekki horft jafn oft á neina mynd á ævinni og Pocahontas, þó það sé orðið ansi langt síðan síðast.
Te eða kaffi: Hrifin af báðu en drekk klárlega mun meira kaffi. Ég er svo heppin að fá geggjað kaffi í vinnunni í Sólskinsbúðinni, frá lítilli kaffibrennslu í Skagafirði sem heitir Kaffi Korg.
Uppáhalds árstími: Mér líður alltaf mjög vel á haustin og hef líka alltaf verið mjög hrifin af litapallettunni á þeim árstíma.
Besta líkamsræktin: Að lyfta þungt og fara í fjallgöngur.
Hvaða rétt ertu best að elda: Ég hef eiginlega óbilandi trú á sjálfri mér í eldhúsinu og finnst ég almennt góð í að elda nánast allt (nema kjöt því ég er grænmetisæta). En ég er oft að vinna með einhverja núðlurétti með hnetusósu, grænmeti og tófu eða einhverja indverska pottrétti eins og dal eða annað curry.
Við hvað ertu hrædd: Að Vestlendingar fari í fýlu yfir því að ég hafi tekið þátt í einhverju sem heitir Sunnlendingur vikunnar.
Klukkan hvað ferðu á fætur: Einhvern tímann á milli 6 og 7. Ég er alveg ótrúlega léleg í að sofa út.
Hvað gerir þú til að slaka á: Það hjálpar mér eiginlega mest að slaka á ef ég hreyfi mig. Svo klikkar náttúrulega ekki að fara í sund og saunu til að trappa sig niður.
Hvað finnst þér vanmetið: Að borða tómata.
En ofmetið: Að borða kjöt alla daga.
Hvaða lag kemur þér alltaf í stuð: Það er klárlega eitthvað reggaeton sem hjálpar mér að gleyma því að ég fæddist í landi með svona lágt meðalhitastig.
Besta lyktin: Náttúran rétt eftir rigningu. Það lyktar eiginlega allt vel eftir rigningu. Nema kannski hundar.
Bað eða sturta: Það er eiginlega bara best að fara í sund.
Leiðinlegasta húsverkið: Ég er með algjöra meinloku fyrir því að fara út með endurvinnsluna.
Besta ráð sem þér hefur verið gefið: Föðuramma mín, Margrét, var mjög lífsglöð og æðrulaus og reitti reglulega af sér alls konar ráð og lífsmottó. Hún fór oft með þessa vísu:
Öðrum kenna ef illa fer,
er það flestra siður.
En sannast mun að sérhver er
sinnar gæfu smiður.
Svo sagði hún reyndar líka oft að henni væri alveg sama hvað aðrir gerðu, svo lengi sem þeir ældu og slefuðu ekki utan í sig. Mér finnst þetta hvort tveggja bara mjög góð ráð inn í lífið.
Nátthrafn eða morgunhani: Ég er alveg ótrúlega óspennandi kvöldsvæf og vil helst vera komin upp í rúm fyrir klukkan 22:00.
Fallegasti staður sem þú hefur komið á: Það er alltaf best og fallegast að vera heima í sveitinni fyrir vestan. En til að hampa Suðurlandinu líka finnst mér Gjáin í Þjórsárdal, sérstaklega á haustin, Kerlingarfjöll og Brúarárskörð allt alveg ótrúlega fallegir staðir.
Hvað fer mest í taugarnar á þér: Örugglega eitthvað sem ég geri sjálf.
Hvað ætlaðir þú að verða þegar þú yrðir stór: Ég ætlaði allavega örugglega ekki að rækta svona mikið af tómötum.
Fyndnasta manneskja sem þú veist um: Ég á svo ótrúlega margar fyndnar vinkonur og svo einn frekar fyndinn vin, en ég má eiginlega ekki gera upp á milli þeirra allra.
Ef þú fengir að vera einhver annar í einn dag, hver þá: Væri til í að prófa að vera Kim Kardashian eða kannski Lauren Sánchez. Bara svona upp á að fá aðeins annað perspektív.
Hvaða samfélagsmiðil notar þú mest: Algoritmarnir mínir á Instagram vita nákvæmlega hvað ég vil sjá, svo ég þarf reglulega að taka detox frá því.
Ef þú værir alvaldur í einn dag: Ég myndi láta mig hafa það að fjarlægja snjallsíma.
Eitthvað sem fæstir vita um þig: Ég er með smá taugagalla og þar af leiðandi mjög skemmtilegan krónískan skjálfta í fingrunum og tungunni.
Mesta afrek í lífinu: Almennt bara að gleyma ekki fleiri hlutum yfir daginn en ég geri nú þegar.
Ef þú mættir ferðast fram eða aftur í tímann, hvert myndir þú þá fara: Ég væri til í að hoppa svona rétt rúman mánuð fram í tímann svo káluppskeran okkar væri búin í bili.
Lífsmottó: Vísa bara í svörin frá ömmu hér að ofan!
Hvað ætlar þú að gera um næstu helgi: Ég ætla að hitta skemmtilegt fólk, kjósa gáfulega og kíkja í fjallgöngu.
Sendu okkur tilnefningu að Sunnlendingi vikunnar á netfrett@sunnlenska.is