Alls útskrifuðust 52 nýstúdentar úr Menntaskólanum að Laugarvatni síðastliðinn laugardag við hátíðlega athöfn. Svo bar við að tveir útskriftarnemendur dúxuðu og annar stúdentanna er Eva Rut Jóhannsdóttir frá Hveragerði. Hún hlaut einnig styrk úr Styrktarsjóði Kristins og Rannveiga fyrir framúrskarandi frammistöðu í námi og félagsstörfum.
Fullt nafn: Eva Rut Jóhannsdóttir.
Fæðingardagur, ár og staður: Ég er fædd 24. júlí árið 2007 á Akureyri.
Fjölskylduhagir: Ég bý hjá mömmu minni og bróður en ég á líka tvo hálfbræður og frábæran kærasta.
Hverra manna ertu: Mamma mín heitir Stella Hrönn Jóhannsdóttir og hann pabbi heitir Karl Jóhann Guðmundsson.
Menntun: Stúdentspróf af félags- og hugvísindabraut í Menntaskólanum að Laugarvatni.
Atvinna: Ég vinn í Shellskálanum í Hveragerði, besta sjoppan sko.
Besta bók sem þú hefur lesið: Kóralína eða Ljósa.
Uppáhalds sjónvarpsþáttur: Ég get ómögulega valið á milli Desperate Housewives, Jane the Virgin og Brooklyn 99. Þetta eru ómissandi þættir sem ég horfi á aftur og aftur.
Hvaða bíómynd getur þú horft á aftur og aftur: Ég hef örugglega séð Mamma Mia hundrað sinnum og er ekki ennþá komin með leið á henni.
Te eða kaffi: Bæði held ég nú bara.
Uppáhalds árstími: Ég get ekki gert upp á milli sumars og veturs.
Besta líkamsræktin: Skíði og sund.
Hvaða rétt ertu best að elda: Ég er mjög dugleg að elda allskonar pastarétti, en annars geri ég mjög gott pestó og samlokur.
Við hvað ertu hrædd: Ég er ótrúlega hrædd við köngulær og allt sem líkist þeim, meir að segja krabba og flugur.
Klukkan hvað ferðu á fætur: Kannski klukkan 8:00, kannski eftir hádegi.
Hvað gerir þú til að slaka á: Tek til í kringum mig, kveiki á góðu ilmkerti og horfi á sjónvarpið eða les.
Hvað finnst þér vanmetið: Sykurlaus Redbull.
En ofmetið: Að þrífa bílinn sinn.
Hvaða lag kemur þér alltaf í stuð: Kysstu mig með Í svörtum fötum.
Besta lyktin: Hrein rúmföt sem þornuðu úti á snúru í sólinni.
Bað eða sturta: Sturta, takk.
Leiðinlegasta húsverkið: Það er fátt verra en að brjóta saman hrúgu af þvotti, þá sérstaklega þykkar peysur sem vilja alls ekki passa ofan í skúffu.
Besta ráð sem þér hefur verið gefið: Mig rámar ekki í neitt. Kannski að spara pening núna, en maður fer nú varla eftir því.
Nátthrafn eða morgunhani: Bæði og það fer eiginlega eftir árstíðinni.
Fallegasti staður sem þú hefur komið á: Hegranesið í Skagafirði.
Hvað fer mest í taugarnar á þér: Allt smjatt og fólk sem fær sér núðlur eða harðfisk í flugi.
Neyðarlegasta atvik sem þú hefur lent í: Það eru til óteljandi mörg atvik, því miður. En á leiðinni í útskriftina mína stal ég óvart símanum hjá yfirmanninum þegar ég fyllti á bílinn og fattaði það ekki fyrr en ég var búin að sækja vinkonu mína og komin hálfa leið á Selfoss.
Hvað ætlaðir þú að verða þegar þú yrðir stór: Ég ætlaði í það stóra verkefni að verða tannálfur. Það var súrt að uppgötva sannleikann…
Fyndnasta manneskja þú veist um: Hann afi. Hann er svo lúmskur með húmorinn sem gerir hann enn fyndnari.
Ef þú fengir að vera einhver annar í einn dag hver þá: Jóna Fanney frænka mín. Hún býr úti á Ítalíu og það hljómar frekar næs.
Hvaða samfélagsmiðil notar þú mest: Tiktok.
Ef þú værir alvaldur í einn dag: Ég myndi gera eitthvað gott og gáfulegt.
Eitthvað sem fæstir vita um þig: Ég get alls ekki reiknað eitt né neitt í huganum.
Mesta afrek í lífinu: Stúdentsprófið í augnablikinu.
Ef þú mættir ferðast fram eða aftur í tímann, hvert myndir þú þá fara: Ég myndi fara heim til ömmu og afa um jólin þegar ég var 7 ára.
Lífsmottó: Þetta reddast.
Hvað ætlar þú að gera um helgina: Ég ætla að skella mér í útskriftarferð til Mexico!
Sendu okkur tilnefningu að Sunnlendingi vikunnar á netfrett@sunnlenska.is