Valgerður Kr. Brynjólfsdóttir á Leirubakka í Landsveit hlaut í vikunni viðurkenningu Hagþenkis árið 2025 en viðurkenningin er veitt fyrir fræðirit, námsgögn eða aðra miðlun fræðilegs efnis til almennings. Viðurkenninguna hlaut Valgerður fyrir bókina Meyjar og völd – Rímur og saga af Mábil sterku.
Fullt nafn: Valgerður Kristín Brynjólfsdóttir.
Fæðingardagur, ár og staður: Ég fæddist 21. apríl 1956, Bíldudal.
Fjölskylduhagir: Gift Anders Hansen og við eigum með þrjú uppkomin börn, tengdabörn og fjögur barnabörn.
Hverra manna ertu: Dóttir Brynjólfs Eiríkssonar og Fríðu Pétursdóttur frá Bíldudal.
Menntun: Ég gekk í Kvennaskólann í Reykjavík og tók Landspróf þaðan 1972. Fór svo í Verzlunarskóla Íslands og lauk Verzlunarprófi 1974. Næsta ár var ég í Bretlandi í The London School of Foreign Trade. Síðan liðu nokkur ár þangað til ég byrjaði í Öldungadeild MH og þaðan tók ég stúdentspróf 1990. Fór beint í Íslensku í Háskóla Íslands og lauk BA-prófi 1993. Ég útskrifaðist svo með MA-próf í íslenskum bókmenntum 2004.
Atvinna: Sjálfstætt starfandi fræðimaður með meiru.
Besta bók sem þú hefur lesið: Sjálfstætt fólk eftir Halldór Laxness.
Uppáhalds sjónvarpsþáttur: Ég hef mjög gaman af breskum og sænskum glæpa- og gamanþáttum.
Hvaða bíómynd getur þú horft á aftur og aftur: Home Alone með barnabörnunum.
Te eða kaffi: Kaffi (og mikið af því).
Uppáhalds árstími: Vorið.
Besta líkamsræktin: Að fara í gönguferðir og njóta kyrrðar með fuglasöng og árniði.
Hvaða rétt ertu best að elda: Mér finnst gaman að elda bæði kjöt og fisk af öllu tagi en uppáhaldsréttur hjá mér er samt gamaldags soðin nætursöltuð ýsa með lauksmjöri.
Við hvað ertu hrædd: Mér er meinilla við jarðskjálfta.
Klukkan hvað ferðu á fætur: Venjulega einhvern tíma milli sjö og átta.
Hvað gerir þú til að slaka á: Best finnst mér að sitja í heitu vatni.
Hvað finnst þér vanmetið: Þögn.
En ofmetið: Síbylja
Hvaða lag kemur þér alltaf í stuð: Ég er frjáls með Facon frá Bíldudal.
Besta lyktin: Af reyrgresi í sumarbyrjun.
Bað eða sturta: Bað.
Leiðinlegasta húsverkið: Baðherbergisþrif.
Besta ráð sem þér hefur verið gefið: Að njóta stundanna meðan þær gefast.
Nátthrafn eða morgunhani: Ég var lengi mikill nátthrafn en með árunum er ég að breytast í morgunhana.
Fallegasti staður sem þú hefur komið á: Að Dynjanda við Arnarfjörð.
Hvað fer mest í taugarnar á þér: Þegar ég týni línum úr wordskjalinu sem ég er að vinna í.
Neyðarlegasta atvik sem þú hefur lent í: Að ganga út af salerni á veitingahúsi og inn í fullan sal af fólki með wc-pappírslengju fasta í skóhælnum.
Hvað ætlaðir þú að verða þegar þú yrðir stór: Skrifstofustúlka með rauðan varalit og langar neglur.
Fyndnasta manneskja þú veist um: Silla kórsystir mín.
Ef þú fengir að vera einhver annar í einn dag hver þá: Það væri áhugavert að vera geimfari og sjá utan frá hve fáránlegt mikilmennskubrjálæði og yfirgangur mannkyns er í smæð sinni.
Hvaða samfélagsmiðil notar þú mest: Facebook.
Ef þú værir alvaldur í einn dag: Ég mundi reyna að koma viti fyrir þjóðarleiðtogana og stöðva heimskuleg stríð.
Eitthvað sem fæstir vita um þig: Ég er mikill sælkeri.
Mesta afrek í lífinu: Að hætta að reykja.
Ef þú mættir ferðast fram eða aftur í tímann, hvert myndir þú þá fara: Það væri mjög skemmtilegt að komast aftur á 15. öld til að hitta höfund Rímnanna af Mábil sterku.
Lífsmottó: Þolinmæði þrautir vinnur allar.
Hvað ætlar þú að gera um næstu helgi: Syngja og gleðjast með skemmtilegum konum í Kvennakórnum Ljósbrá.
Sendu okkur tilnefningu að Sunnlendingi vikunnar á netfrett@sunnlenska.is