VOX hlýtur veglegan styrk

Birta Huld Halldórsdóttir, gjaldkeri VOX, tók við styrknum úr hendi Ragnars Þórs Ingólfssonar, félags- og húsnæðismálaráðherra. Mynd/Úr einkasafni

Fjölmenningarlegi kórinn VOX Rangárþing hlaut á dögunum styrk upp á 2 milljónir króna úr Þróunarsjóði innflytjendamála. Úthlutunin er á höndum Félags- og húsnæðismálaráðuneytisins og snýr sérstaklega að nýju verkefni á vegum kórsins sem nefndist Raddir saman – Íslenska, tengsl og inngilding í Rangárþingi.

Markmið verkefnisins er að efla íslenskukunnáttu kórfélaga sem hafa annað móðurmál en íslensku og styðja við virka þátttöku þeirra í kórstarfinu. Sem stendur eru meðlimir í kórnum í kringum fimmtíu og tuttugu prósent þeirra eru af erlendum uppruna, en það er sambærilegt hlutfall og hjá íbúum sveitarfélaganna í Rangárvallasýslu. Þá eru bæði kórstjóri og leikstjóri VOX innflytjendur sem hafa kosið að koma hingað til lands og starfa á sínu sérsviði í þágu tónlistar og menningar í Rangárþingi.

Þessi fjölmenningarlegi grunnur hefur mótað starfsemi VOX frá upphafi. Æfingar og sýningar fara fram á mörgum tungumálum og flytur kórinn gjarnan erlend og íslensk lög fléttuð saman í syrpur. Þá er mikið lagt upp úr því að móðurmál allra kórfélaga fái að heyrast bæði á æfingum og á sýningum og Íslendingar spreyti sig á öðrum málum í flutningi. Jafnframt fær fólk sem er að læra íslensku tækfæri til að prófa tungumálið í öruggu umhverfi þar sem það getur fengið aðstoð við framburð, þýðingar og fleira á jafningjagrundvelli.

VOX Rangárþing. Ljósmynd/Elías Rúni

Verkefnið mun fara fram á tíu mánaða tímabili sem tengt verður starfsemi kórsins.

Meðal þess sem boðið verður uppá, auk hefðbundinna æfinga, er vinnustofur í íslensku sem leiddar verða af íslenskukennara. Unnið verður með orðaforða, merkingu og framburð í íslensku söngtextunum sem kórinn æfir hverju sinni. Kórfélagar geta nýtt það sem þeir læra strax á æfingunni á eftir. Þá verða einnig nokkur kvöld helguð sviðsframkomu, framburði, leikrænni tjáningu og fleiru sem allir kórfélagar geta nýtt sér.

Meðal markmiða verkefnisins er að skila af sér efni sem fleiri sambærileg félagasamtök geta nýtt sér, auk þess sem niðurstöðurnar verða kynntar opinberlega í lokin. Harpa Rún Kristjánsdóttir, bókmenntafræðingur, hefur verið ráðin verkefnastjóri Raddir saman.

Birta Huld Halldórsdóttir, gjaldkeri VOX, tók við styrknum á Grand Hótel síðastliðinn miðvikudag. Í tilkynningu segist stjórn kórsins vera þakklát fyrir tækifærið og hlakkar til að fylgja þessu eftir með áframhaldandi eflingu og inngildingu allra kórfélaga, óháð uppruna og móðurmáli.

Fyrri greinMinntust fórnarlamba umferðarslysa