Hin árlega sumarhátíð Sumarhússins og garðsins, Stefnumót við Múlatorg, verður haldin á Selfossi næstkomandi laugardag, þann 16. júlí.
„Nú fögnum við. Tilefnið er ærið. Tímaritið Sumarhúsið og garðurinn hefur verið gefið út í 30 ár og sumarhátíðin okkar er tileinkuð tímamótunum,“ segir Auður I. Ottesen, sýningarstjóri.
„Við höfum boðið áskrifendum okkar, viðskiptavinum og þjóðinni allri í garðinn að Fossheiði 1 á Selfossi síðustu átta ár. Þar höfum við ætíð verið með einstaklega áhugaverð skemmtiatriði, fræðslu, sýningar og markaðstorg. Í ár er viðhafnarbragur á hátíðinni og markaðstorgið er fullbókað,“ segir Auður ennfremur, en á markaðstorginu verður hægt að kaupa vandað handverk, listmuni, vörur fyrir sumarhúsið og garðinn og ótal margt annað.
Fagrar raddir og framandi dýr
Sérstakur heiðursgestur hátíðarinnar er Elmar Gilbertsson, tenórsöngvari. Elmar er með eina fegurstu rödd landsins og mun syngja fyrir gesti í Fossheiðargarðinum. Raftónlistardúettinn Huldumaður og víbrasjón sem þau Hekla Magnúsdóttir og Sindri Freyr Steinsson skipa, spila áhugaverða tónlist á þeramín og gítar. Auk þessa verður Páll Jökull Pétursson ljósmyndari með glænýjuar myndir úr náttúru Íslands.
Einnig verður sýning á framandi dýrum. Froskasmalinn, Amanda MacQuin, leyfir gestum að skyggnast inn í allsérstakt áhugamál sitt. Goðlingar, afkvæmi Norrænna guða, bjóða seið og lækningajurtir undan rótum Yggdrasils og Páll Jakob Líndal, doktor í umhverfissálfræði, ræðir við gesti um samspil fólks og umhverfis.
„Þannig að í ár er hátíðin einstök, fræðslan mögnuð og tónlistaratriðin afar metnaðarfull og að sjálfsögðu verða kaffi og vöfflur eða pönnukökur í veitingatjaldinu,“ segir Auður að lokum.
