Vestfirðingar og Sunnlendingar stinga saman menningarnefjum

Í tengslum við Safnahelgi Suðurlands um helgina bjóða Vestfirðingar heima og heiman ásamt Sunnlendingum til fagnaðar í Hótel Selfoss í kvöld, föstudagskvöld kl. 21–01.

Þar munu Vestfirðingar og Sunnlendingar stinga saman menningarnefjum með ýmsum hætti.

Bækur, tónlist, söfn, mannlíf og menningarveita. Útgáfuhátíð hljómsveitarinnar Granít frá Vík í Mýrdal en þeir hafa tekið upp tvo diska í hljóðverinu Tankinum á Flateyri.

Hljómsveitin Granít og söngvararnir Hlín Pétursdóttir frá Stokkseyri og Jón Kr. Ólafsson frá Bíldudal koma fram.

Heiðruð verður minning listamannsins Hafliða Magnússonar frá Bíldudal sem lést í sumar en hann bjó á Selfossi frá árinu 1998.

Fjöldi Vestfirðinga og Sunnlendinga stíga á stokk og taka dansspor í lokin.

Allir eru hjartanlega velkomnir, enginn aðgangseyrir og aðgöngumiðinn er miði í veglegu happdrætti.