Verndargripur eftir Bolaño

Út er komin bókin Verndargripur eftir Roberto Bolaño (1953-2003). Ófeigur Sigurðsson rithöfundur þýddi úr spænsku. Útgefandi er Bókaútgáfan Sæmundur á Selfossi.

Bolaño er einn áhrifamesti höfundur sem komið hefur frá Rómönsku-Ameríku á undanförnum áratugum. Hann fæddist í Chile en bjó löngum í Mexíkó og á Spáni.

Hann var ljóðskáld að upplagi en ritaði á síðustu árum ævi sinnar skáldsögur í kapphlaupi við dauðann. Hann lést aðeins fimmtugur að aldri úr lifrarbilun.

Þetta verður hryllingssaga. Þetta verður glæpasaga, reyfari og frásögn af hryllingi.

Auxilio Lacouture er stödd á kvennasalerninu í Mexíkóháskóla þegar herinn ræðst til atlögu í september árið 1968. Hún ákveður að fela sig á meðan kennarar og stúdentar eru handteknir og hernámið stendur yfir.

Í tólf daga berst Auxilio við hungrið og minningarnar sem teygja sig jafnvel inn í framtíðina; hún sér hryllinginn sem bíður eftir að eiga sér stað: Blóðbaðið í Tlatelolco.

Verndargripur er myrkur en ástríðufullur lofsöngur til ungdómsins, ljóðlistarinnar og Mexíkóborgar.