Verndarenglarnir á svið á Sólheimum

Æfingar eru nú í fullum gangi hjá Leikfélagi Sólheima á leikritinu Verndarenglarnir eftir Þórnýju Björk Jakobsdóttir. Frumsýning er á sumardaginn fyrsta.

Leikritið er samið sérstaklega fyrir Sólheima af Þórnýju Björk sem leikstýrir einnig verkinu. Rauði þráðurinn í leikritinu er einelti og koma ýmsar furðuverur við sögu, svo sem álfar, tröll og huldufólk, ásamt verndarenglunum sem leikritið heitir eftir.

Lárus Sigurðsson samdi tónlist við verkið en mikið er um söng og er leikritið við hæfi allra aldurshópa.

Þess má geta að leikfélag Sólheima verður 80 ára í ár og er þar með eitt elsta starfandi áhugamannaleikfélag á landinu.

Verkið verður frumsýnt á sumardaginn fyrsta, þann 21. apríl, sem í ár ber upp á skírdag. Aðrir sýningardagar eru:

Laugardaginn 23. apríl klukkan 15:00
Mánudaginn 25. apríl klukkan 15:00
Laugardaginn 30. apríl klukkan 15:00
Sunnudaginn 1. maí klukkan 15:00 – Lokasýning

Hægt er að panta miða í síma 847 5323.