Nemendasýning Dansakademíunnar á Selfossi var haldin hátíðlega á Stóra sviði Borgarleikhússins um helgina. Sýningin bar yfirheitið Er ég verð stór og söguþráður sýningarinnar snerist um kennara sem lagði fyrir verkefnið Hvað langar mig að verða þegar ég verð stór?.
Alls komu 250 sunnlensk börn fram og um 1.100 áhorfendur lögðu leið sína í leikhúsið. Útkoman var töfrandi leikhússtund þar sem nemendur spreyttu sig í söng, leik og dansi.
„Skólaárið sem er að líða hefur verið einstaklega viðburðaríkt og gleðileg. Við erum ótrúlega þakklátar fyrir alla nemendurna sem dansa með okkur vikulega og það leyndi sér ekki að uppskeran var í samræmi við vinnuna sem bæði kennarar og nemendur höfðu lagt á sig síðasta árið.
Við viljum þakka foreldrum fyrir mjög gott samstarf, jákvæð samskipti og stuðning við nemendur heima fyrir. Það er okkur hjartans mál að nemendum okkar líði vel og vegni vel, því eru góð samskipti við foreldra ómetanleg. Við vonum að við sjáumst að ári liðnu á Stóra sviðinu!“ segir í tilkynningu frá kennarateymi Dansakademíunnar.
Hér fyrir neðan eru nokkrar myndir frá Laufeyju Ósk Magnúsdóttur og Sverri Erni Hlöðverssyni.
