Síðustu dagar hafa verið Bíódagar í Sunnulækjarskóla á Selfossi. Þetta er í sjöunda sinn sem þeir eru haldnir og lauk þeim með uppskeruhátíð í Bíóhúsinu Selfossi í gær.
Bíódagar er þróunarverkefni sem byrjaði í Sunnulækjarskóla árið 2018 og er hluti af Kviku, sem er námsgrein sem stuðlar að lykilhæfni nemenda.
„Bíódagar eru stuttmyndakeppni sem nemendur í 9. og 10. bekk taka þátt í á ári hverju og endar með uppskeruhátíð þar sem veitt eru verðlaun fyrir framúrskarandi verkefni – okkar eigin Óskarsverðlaun,“ segir Unnur Björk Hjartardóttir, umsjónarkennari í Sunnulækjarskóla, í samtali við sunnlenska.is.
Foreldrasýning 5. og 7. maí
Bíódagar hafa alltaf ákveðið þema, sem að þessu sinni var Lykillinn. Í ár barst 21 mynd í keppnina og fengu margar myndir tilnefningar. Sigurvegarar Bíódaga í ár voru stelpur í 9. bekk með myndina Klukkan þrjú.
„Nemendur eru fimm til átta saman í hóp og það má blandast milli bekkja og árganga til að mynda hópa. Myndirnar voru sýndar í gærmorgun á uppskeruhátíð Kviku í Bíóhúsinu Selfossi. Áhorfendur voru nemendur í 9. og 10. bekk og starfsfólk skólans. Sú nýjung er núna að foreldrasýningar verða haldnar í Bíóhúsinu 5. maí fyrir 9. bekk og 7. maí fyrir 10. bekk klukkan 20:00 og rennur ágóði í ferðasjóð árganganna.“
Nemendur blómstra í sköpun
Unnur segir að þetta verkefni hafi heppnast vel fram til þessa. „Það hefur vaxið ár frá ári og er orðið að hápunkti skólastarfsins í unglingadeild. Það hefur verið gaman að fylgjast með nemendum blómstra í sköpun, sýna frumkvæði, öðlast hæfni í samskiptum og bera ábyrgð á námi sínu í sjálfstæðri vinnu.“
„Mikil vinna liggur að baki gerð stuttmyndar og sinna nemendur hinum ýmsu hlutverkum til þess að gera stuttmyndina að veruleika, þar á meðal ábyrgðarmaður handrits, leikstjóri, upptökustjóri, leikarar, búningahönnuður, förðun, leikmyndahönnuður, hljóð- og myndvinnsla, upplýsingafulltrúi og fleira. Lögð var áhersla á að allir nemendur fái hlutverk við hæfi,“ segir Unnur ennfremur.