Valgerður Kr. Brynjólfsdóttir á Leirubakka í Landsveit hlaut í gær viðurkenningu Hagþenkis árið 2025 en viðurkenningin er veitt fyrir fræðirit, námsgögn eða aðra miðlun fræðilegs efnis til almennings.
Viðurkenninguna hlýtur Valgerður fyrir bókina Meyjar og völd – Rímur og saga af Mábil sterku.
Í umsögn dómnefndar segir að bók Valgerðar hafi verið valið umfram tíu aðrar bækur vegna þess að þar sé brotið blað í rannsóknum á rímum hér á landi. „Vinnubrögðin eru einstaklega vönduð og höfundur hefur leitað víða fanga við að opna fyrir nútímafólki heim sem hefur verið okkur flestum lokaður. Hún hefur safnað saman ómetanlegum upplýsingum um þessar einstöku rímur – og um leið opnar hún augu lesenda fyrir hversu flókið ferli svona rannsókn getur verið.“
Opnar glugga til fortíðar
Í ávarpi við verðlaunaafhendinguna í gær sagðist Valgerður full þakklætis en bókin, sem gefin er út í ritröðinni Rit Árnastofnunar, er afrakstur áralangrar vinnu.
„Einhverjir kunna að spyrja hvaða erindi svona kveðskapur eigi til nútímafólks. Rímurnar af Mábil sterku opna glugga til fortíðar sem er ekki svo ólík okkar tíma. Þær segja sögu af kynjamisrétti, græðgi og siðleysi og líklega eru þær ortar sem níð um einhverja konu eða konur en á nútímamáli heitir það einelti. Við þekkjum þetta allt,“ sagði Valgerður.
Hagþenkir, félag höfunda fræðirita og kennslugagna, hefur frá árinu 1986 veitt þessa viðurkenningu. Að valinu stendur sérstakt viðurkenningarráð skipað fimm félagsmönnum á mismunandi fræðasviðum til tveggja ára í senn.