Í tilefni útgáfu bókarinnar Together in Iceland eftir Selfyssinginn Roar Aagestad efnir Gallerí Fold til sýningar á völdum ljósmyndum úr bókinni.
Roar Aagestad hefur komið víða við í ljósmyndun sinni en fyrstu myndavélina, Kodak Instamatic, eignaðist hann við fermingu . Ungur myndaði hann heimahagana á Suðurlandi; gróðurhús, sveitir og landslag.
Hálfri öld síðar er hann enn að með nútíma tækni, stafrænum myndavélum og dróna, og hafa myndir hans birst á helstu fréttamiðlum landsins og unnið til verðlauna auk þess að vera gefnar út á póstkort og segla. Roar hefur verið í samstarfi við Gallerí Fold frá 2022.
Bókin Together In Iceland inniheldur ljósmyndir frá síðustu fimmtán árum, sumar af þekktari perlum landsins en aðrar af stöðum langt utan alfaraleiðar sem sjaldnar sjást á prenti.
Sýningaropnun og útgáfuhóf bókarinnar verður þann 12. mars kl. 17:00. Sýningin stendur til 1. apríl og verður bókin á sérstöku tilboðsverði í Gallerí Fold.
