Njálufélagið undir forystu Guðna Ágústssonar áformar mörg verkefni á næstunni. Í farvatninu er meðal annars Njálureið, málþing og útgáfa á viðhafnar útgáfu af Brennu Njálssögu Jóns Böðvarssonar, sem prýdd verður myndum af sögupersónunum, máluðum í lit af Þórhildi Jónsdóttur frá
Lambalæk.
Ennfremur verða Njálusýningar teknar upp á ný með haustinu en síðustu sýningar vorsins verða í Félagsheimilinu Hvoli Hvolsvelli sunnudaginn
10. maí kl. 14 og á Sviðinu Selfossi sunnudagskvöldið 10. maí kl. 20. Þau Guðni Ágústsson, Ólína Kjerúlf Þorvarðardóttir og Gissur Páll Gissurarson hafa flutt Njáluperlur í Salnum í Kópavogi fjórum sinnum við góðar undirtektir og góða aðsókn. Á sýningunni er Brennu-Njálssaga sett í nýjan og spennandi búning og skreytt með óperusöng Gissurar Páls Gissurarsonar sem syngur ramm íslensk lög við undirleik Matthildar Önnu Gísladóttur.