Samtök sunnlenskra sveitarfélaga, Sinfóníuhljómsveit Suðurlands og Þjóðaróperan hafa undirritað viljayfirlýsingu um áframhaldandi samstarf um óperusýningar og þróun tónlistarstarfs á Suðurlandi.
Ingunn Jónsdóttir framkvæmdastjóri SASS, Guðmundur Óli Gunnarsson hljómsveitarstjóri og listrænn stjórnandi og Finnur Bjarnason óperustjóri undirrituðu yfirlýsinguna í Skálholtskirkju síðastliðinn sunnudag. Undirritunin fór fram áður en opnunarviðburður Þjóðaróperunnar Undir sömu stjörnu hófst. Þar komu fram, auk Sinfóníuhljómsveitar Suðurlands, söngvarar Þjóðaróperunnar, leikarar frá Þjóðleikhúsinu, Skálholtskórinn, Kammerkór Rangæinga og Kammerkór Norðurlands undir stjórn Guðmundar Óla Gunnarssonar.
Sýnir metnaðinn í sunnlensku listafólki
Markmiðið með viljayfirlýsingunni er að efla klassíska tónlist og óperu í landshlutanum, fjölga tækifærum til að njóta hennar í heimabyggð og færa fjölbreytt menningarstarf nær fólki. Með viljayfirlýsingunni vilja aðilar undirstrika mikilvægi þess að nýta þekkingu og jákvæða reynslu af verkefninu Undir sömu stjörnu til áframhaldandi góðra verka.
„Við hjá SASS erum afar stolt af því að sjá Sinfóníuhljómsveit Suðurlands fá vængi með þessu stóra samstarfsverkefni. Við höfum stutt þétt við bakið á hljómsveitinni nánast frá upphafi og það er gríðarlega ánægjulegt að sjá hana nú spila jafn stórt hlutverk og raun ber vitni í þessu samstarfi við Þjóðaróperuna. Þetta eflir ekki bara menningarlífið á Suðurlandi heldur sýnir landinu öllu þann mikla metnað sem býr í sunnlensku listafólki,“ segir Ingunn Jónsdóttir framkvæmdastjóri SASS.
Óperan verði virkur hluti af menningarlífi Suðurlands
„Þetta er einstaklega ánægjulegt á allan hátt,“ segir Guðmundur Óli Gunnarsson hljómsveitarstjóri „og sýnir svo ekki verður um villst mikilvægi hljómsveitarinnar fyrir menningarlífið á Suðurlandi. Við erum bæði afar glöð með þessa viljayfirlýsingu og hlökkum sannarlega til næstu verkefna með Þjóðaróperunni.“
Finnur Bjarnason, óperustjóri tekur í sama streng. „Það var mjög ánægjulegt að hafa lokið þessu fyrsta, stóra samstarfsverkefni með Sinfóníuhljómsveit Suðurlands með svo farsælum hætti. Eins og kemur fram í viljayfirlýsingunni sem undirrituð var á viðburðinum er mikilvægt að nýta þá dýrmætu reynslu sem fékkst í ferlinu og það er mikill vilji hjá okkur til að rækta þetta samstarf, skapa, fleiri tækifæri fyrir tónlistarfólk og gera óperuna að virkum hluta menningarlífsins á Suðurlandi.“
Ný menningarupplifun
Aðilar stefna að samráðsfundi þar sem farið verður yfir reynslu af samstarfinu og næstu skref mótuð. Í yfirlýsingunni kemur fram að mikilvægt sé að fylgja þessum áfanga eftir með samfellu í árlegu samstarfi sem skipulagt er í samvinnu Þjóðaróperunnar og Sinfóníuhljómsveitar Suðurlands. Samstarfið verður liður í að efla starf Þjóðaróperunnar um landið allt um leið og til verður ný menningarupplifun á Suðurlandi.
Viljayfirlýsingin gildir til þriggja ára og felur ekki í sér fjárhagslegar skuldbindingar.
