Undirbúningur fyrir sumarlestur í fullum gangi

Í sumar er þemað Egyptar. Ljósmynd/Aðsend

Sumarlestur hefur verið haldinn í lok hvers skólaárs frá árinu 1993 í Bókasafni Árborgar.

Sumarlestur er ókeypis lestrarhvetjandi námskeið fyrir krakka í 2. – 5. bekk, þau mega vera yngri eða eldri en viðmiðunin er að þau séu orðin stautfær í lestri. Tveir hópar hafa verið í sumarlestri og hittast þeir einu sinni í viku þar sem börnin fá ýmist fræðslu eða skemmtun. Í hverri viku er dregið úr happdrætti þar sem börnin fá skemmtilega vinninga.
Sumarlesturinn endar með miklu fjöri í ratleik þar sem krakkarnir leita að vísbendingum og leysa þrautir. Markmið sumarlestrar er að viðhalda lestrarhæfni yfir sumartímann og örva lestur bóka.

Í sumar er þemað Egyptar. Sumarlesturinn hefst þriðjudaginn 9. júni kl. 13:00 og þá mæta allir sem ætla að taka þátt í sumarlestrinum en síðan verður börnunum skipt upp í hópa fyrir og eftir hádegi eftir því hvað hentar. Sumarlesturinn er síðan alla þriðjudaga í júní frá og með 9. júní.

Skráning í sumarlestur er nauðsynleg. Þátttökublöð má nálgast í afgreiðslu bókasafnsins á Selfossi og Stokkseyri en einnig er hægt að skrá þátttöku á netfangið: afgreidsla@arborg.is