Í dag eru tuttugu ár síðan stórstjörnurnar í hljómsveitinni Foo Fighters heimsóttu félaga sína í hljómsveitinni Nilfisk á Stokkseyri.
Þetta var í annað skiptið sem Foo Fighters heimsótti Stokkseyri en tveimur árum áður höfðu þeir uppgötvað Nilfisk í bílskúr í þorpinu og boðið þeim í kjölfarið að koma fram á tónleikum í Laugardalshöllinni.
Þeir sem voru viðstaddir heimsókn hljómsveitarinnar á Draugasetrið þann 4. júlí 2005 munu seint gleyma þessum degi. Dave Grohl, söngvari og gítarleikari, og trommarinn Taylor heitinn Hawkins stigu á stokk og léku af fingrum fram með þeim Jóhanni Vigni og Sigurjóni Dan úr Nilfisk. Nokkur fjöldi fólks varð vitni að þessu, meðal annars unglingastrengjasveit frá Wisconsin í Bandaríkjunum sem hélt tónleika á Stokkseyri fyrr sama dag og ætluðu ungmennin varla að trúa sínum eigin augum þegar goðin birtust í þorpinu. Í föruneyti þeirra voru einnig meðlimir hljómsveitanna Queens of the Stone Age og Mínus.
Að loknu kröftugu djammi á Draugasetrinu þerruðu erlendu gestirnir af sér svitann og fóru hring á Draugasetrinu og sagðist Grohl hafa haft mikið gaman af, enda hrökk hann í kút hvað eftir annað. Hljómsveitarmeðlimir slökuðu síðan á, fengu sér öl og brennivín og virtu fyrir sér sólarlagið við varðeld í fjöruborðinu. Reyndar stóð sú gleði fram á nótt.
Blaðamaður Sunnlenska fréttablaðsins og sunnlenska.is var á staðnum og hér fyrir neðan má sjá nokkrar áður óbirtar myndir frá þessari heimsókn. Þar má meðal annars sjá Crossfit-kempuna Björgvin Karl Guðmundsson og fleiri góða Stokkseyringa með stjörnur í augum að fylgjast með Grohl.
Ljósmyndir/Guðmundur Karl
