Það var heldur betur líf og fjör á Græna hattinum á Akureyri síðastliðinn laugardag þegar sunnlenska hljómsveitin Hr. Eydís ásamt Ernu Hrönn Ólafsdóttur hóf hausttúrinn ALVÖRU ’80s PARTÝ „Movie Hits“. Næsta stopp er Sviðið á Selfossi laugardaginn 17. október.
„Það var alveg tryllt stemning á Akureyri um helgina. Ég hef varla upplifað annað eins! Við hlökkum svakalega mikið til að halda fjörinu áfram á Sviðinu enda alltaf sérstök tilfinning að spila á Selfossi… okkar heimavelli,“ segir Örlygur Smári, söngvari og gítarleikari Hr. Eydísar.
„Það er svo ótrúlega gaman þegar salurinn tekur undir með okkur og allir syngja með. Þessi lög vekja svo margar góðar minningar hjá fólki og við ætlum sko að hafa alveg jafn gaman á Selfossi, er það ekki?“ segir Erna Hrönn Ólafsdóttir og hlær.
Að þessu sinni er kvikmyndatónlist níunda áratugarins (´80s) í aðalhlutverki. Á dagskránni eru ógleymanlegir smellir úr stórmyndum á borð við Top Gun, Back to the Future, Rocky III, Dirty Dancing, Flashdance, Ghostbusters og Footloose ásamt fjölda annarra kvikmyndalaga sem flestir ættu að kannast við.
Tónleikarnir á Sviðinu á laugardagskvöld hefjast kl. 21. Miðar eru seldir á tix.is.
