Það verður sannkölluð söngveisla af bestu gerð í Salnum í Kópavogi þann 30. maí næstkomandi. Tilefni tónleikanna er stofnun sjóðs í nafni tónlistarsnillingsins Jónasar Ingimundarsonar.
Jónas fæddist 30. maí 1944 á Bergþórshvoli í Vestur-Landeyjum, sonur þeirra Guðrúnar Kristjánsdóttur og Ingimundar Guðjónssonar. Jónas ólst að mestu upp á Selfossi og síðar í Þorlákshöfn. Hann lést þann 14. apríl í fyrra.
Jónas bjó á Selfossi um 1970 og var þá driffjöður í tónlistarlífi bæjarins. Hann kenndi tónlist, stjórnaði kórum og var órjúfanlegur hluti af tónlistarlífi landsins. Árið 2010 fékk Jónas Ingimundarson Selfosssprotann – viðurkenningu fyrir framlag sitt til menningarmála í bænum. Tónlist fyrir alla – tónleikahald sem einnig hófst undir forystu Jónasar – var honum mjög hugleikið.
Nýlega hefur Kristín Sigmundsson, óperusöngvari við Metropolitan-óperuna, haft frumkvæði að minningartónleikum til að stofna sjóð í nafni Jónasar Ingimundarsonar sem mun styrkja unga söngvara og píanóleikara til náms og á annan hátt. Allur hagnaður af tónleikunum rennur í nýstofnaðan sjóð.
Á tónleikunum kemur fram fjölbreyttur hópur klassískra söngvara sem hefur sungið víða á Íslandi og erlendis með frábærum árangri.
„Við vonumst til að geta fylgt ástríðu Jónasar Ingimundarsonar og trú hans á að tónlist sé fyrir alla. Við hlökkum til að sjá ykkur Sunnlendinga í Kópavogi þann 30. maí klukkan 14, á afmælisdegi Jónasar Ingimundarsonar. Það verður sannkölluð hátíðarstemning,“ segir í tilkynningu frá söngvinum Jónasar.