Tónar tveggja alda er yfirskrift næstu tónleika á tónlistarhátíðinni Englar og menn í Strandarkirkju sem haldnir verða sunnudaginn 19. júlí næstkomandi klukkan 14:00.
Þar koma fram okkar þjóðþekktu stórsöngvarar Dísella Lárusdóttir, sópran og Kolbeinn Jón Ketilsson, tenór, ásamt Matthildi Önnu Gísladóttur, píanóleikara. Þau flytja fjölbreytta og spennandi dagskrá úr heimi tónbókmenntanna, m.a. eftir Sigvalda Kaldalóns, Grieg, Sibelius, Bohm og Lehár.
Dísella Lárusdóttir hefur komið víða við sögu í tónleikahaldi og plötuútgáfu. Hún hefur starfað mest á óperusviðinu og hefur starfað m.a. við Metropolitan Óperuna í New York. Árið 2022 vann hún Grammy verðlaun fyrir bestu óperuupptöku og varð annar Íslendingurinn til að vinna verðlaunin. Hún hefur komið fram á tónlistarhátíðum víða um Bandaríkin og Evrópu og hlotið margar viðurkenningar fyrir söng sinn. Þá hefur hún tvisvar verið valin Söngkona ársins á Íslensku tónlistarverðlaununum.
Kolbeinn Jón Ketilsson tenór hefur sungið mörg stærstu tenórhlutverk óperubókmenntanna, komið fram í óperum á öllum Norðurlöndunum, í Norður Ameríku og víðsvegar um Evrópu. Auk þess kemur Kolbeinn kemur einnig reglulega fram á tónleikum sem ljóðasöngvari og einsöngvari í hljómsveitarverkum.
Matthildur Anna Gísladóttir lauk meistaranámi í meðleik frá Royal Academy of Music í London árið 2009 og árið 2014 lauk hún meistaranámi í óperuþjálfun frá Royal Conservatoire of Scotland. Matthildur hefur komið fram á fjölda tónleika hérlendis sem erlendis og komið að fjölda óperuuppsetninga. Matthildur starfar nú við tónlistardeild Listaháskóla Íslands.
Miðasala er við innganginn.
Tónlistarhátiðin Englar og menn stendur yfir í júlímánuði með tónleikum kl. 14. Nánar upplýsingar um tónlistarhátíðina og næstu viðburði er á Facebooksíðu hátíðarinnar.