Tómatar og Tangó í Friðheimum

Sunnudaginn 25. ágúst verður sannkölluð menningarveisla í Friðheimum í Reykholti. Þar mun nýstofnaður Piazzolla Quintet leika tónlist argentínska snillingsins Astor Piazzolla auk þess sem léttur matseðill kvöldsins er suðrænn og seiðandi ásamt argentískum vínum.

Húsið opnar klukkan 19:00. Miðasala á tónleikana fer fram á tix.is og einnig er hægt að kaupa miða við innganginn á Friðheimum.

Tónlist Piazzolla er hinn svokallaði nýi tangó (nuevo tango) og er afar áhugaverð samsuða af tangó, djass og klassískri tónlist – sem greinilega má heyra í verkum hans.

Meðal verka á tónleikunum má nefna Adios Nonino, sem Piazzolla samdi í minningu föður síns og hinn sívinsæla Libertango sem flestir áhugamenn um tónlist ættu að kannast við. Að auki má nefna Árstíðirnar í Buenos Aires – verk í fjórum köflum sem túlkar árstíðirnar í argentínsku höfðuborginni.

Hljóðfæraleikarar kvintettsins eru margreyndir; Jón Þorsteinn Reynisson á harmoniku, Joaquin Páll Palomares á fiðlu, Jón Bjarnason á píanó, Ásgeir Ásgeirsson á rafgítar og Alexandra Kjeld á kontrabassa.

Þess má geta að fyrri tónleikar Piazzolla Quintet fara fram í Hofi á Akureyri þann 22. ágúst kl. 20.00.

Viðburður þessi hlaut styrk úr menningarsjóði SASS