Tómas sýnir rennda gripi

Í dag kl. 17 opnar Tómas Guðmundsson, einn af elstu íbúum Þorlákshafnar, sýningu í Gallerí undir stiganum, sýningarými bókasafnsins í Þorlákshöfn.

Tómas hefur lengi dundað sér við að renna timbur í allskyns nytjagripi. Hann hefur notað margvíslegt timbur og segir það geta verið erfitt að fá gott timbur til að vinna úr.

Meðal þess sem Tómas mun sýna, eru lampafætur þar sem hann hefur límt saman mismunandi gerðir af timbri með ólíka áferð og lit, en einnig hefur hann leikið sér að því að renna skálar, staup, krúsir og fleira.

Formleg opnun sýningar verður í dag kl. 17 og verður Tómas sjálfur á staðnum og tekur á móti gestum.

Boðið verður upp á kaffi og súkkulaði af tilefni opnunar. Sýningin stendur yfir til maíloka og er sölusýning.