Tómas Guðbjartsson opnaði á dögunum glæsilega ljósmyndasýningu á Heilsustofnun NLFÍ í Hveragerði og færði stofnuninni um leið myndirnar að gjöf með þakklæti fyrir frábæra dvöl en hann þurfti sjálfur að nýta sér þjónustu Heilsustofnunar fyrr á árinu.
„Ég hef lengi látið mig dreyma um að halda sýningu með ljósmyndum frá Ketildölum við sunnanverðan Arnarfjörð. Markmið mitt er fyrst og fremst að kynna ótrúlega náttúrufegurð þessa fáfarna svæðis, en um leið er það von mín að komandi kynslóðir fái að njóta þessa fjársjóðar sem lítt snortnir Ketildalir eru,“ sagði Tómas við opnun sýningarinnar.
Myndirnar eru til sýnis í Kringlunni á Heilsustofnun og eru allir velkomnir að líta við og skoða sýninguna.
