Það verður glatt á hjalla á Selfossi sunnudaginn 10. maí þegar Lúðrasveit Þorlákshafnar blæs til sannkallaðrar fjölskylduskemmtunar í sal Fjölbrautaskóla Suðurlands.
Um er að ræða tónleika sem bera hið gegnsæja heiti Teiknimyndatónleikar Lúðrasveitar Þorlákshafnar enda ekkert á efnisskránni nema úrvals lög úr vinsælum teiknimyndum sem flestir þekkja og elska. Lúðrasveitin hélt sambærilega tónleika í Þorlákshöfn í mars sl. og þar seldist upp. Ekki síst þess vegna var mikill vilji fyrir því að endurtaka leikinn og færa gleðina aðeins um set.
Lúðrasveitin er aldeilis ekki ein á ferð í þessu fjölbreytta prógrammi heldur hefur hún félaga úr Leikhópnum Lottu sér til fulltingis sem bregða á leik á milli tónlistaratriða með fjörugum og fyndnum kynningum eins og þeim einum er lagið. Í raun eru þau svo fyndin að hljóðfæraleikarar sem ætluðu að hvíla andlitsvöðva á milli laga á meðan kynningar fóru fram á tónleikunum í Þorlákshöfn, náðu ekki slökun vegna hláturs.
Eitt af markmiðum þessa efnisvals lúðrasveitarinnar þetta misserið er höfða til og vekja áhuga ungra einstaklinga á blásturshljóðfærum og hljóðfærum sem notuð er í lúðrasveitum og þá mögulega koma þeirri hugmynd í kollinn á þeim að það gæti væri gaman að læra á þau, bæði til að geta nýtt sér það sem einstaklingur en líka til geta tekið þátt í skemmtilegu og gefandi hópastarfi. Þess vegna fannst lúðrasveitinni líka tilvalið að fá enn fleiri gesti til liðs við sig þ.e. nemendur úr Tónlistarskóla Árnesinga en þeir munu spila með í nokkrum laganna og vonandi efla enn frekar áhuga sinn og getu við þátttöku í svona verkefni.
Lúðrasveitin, Lotta og TÁ nemendur vonast til að sjá ykkur sem flest þann 10. maí í FSu sem verður breytt í lítið ævintýraland þann dag. Verði er mjög stillt í hóf eða 2000 kr. og miðasala er á tix.is. Rétt er að taka fram að tónleikarnir eru tæpir tveir tímar með hléi og henta því ekki allra yngsta fólkinu.