Þrítugasta bók Þórðar kom út á 100 ára afmælisdaginn

Þórður spilar á orgelið í byggðasafninu. Ljósmynd/Aðsend

Bókin Stóraborg, staður mannlífs og menningar kom í verslanir í dag, 28. apríl sem er jafnframt afmælisdagur höfundarins, Þórðar Tómassonar, en hann varð hundrað ára í dag.

Fyrir hálfri öld tók brim að brjóta niður hinn forna bæjarhól Stóruborgar undir Eyjafjöllum og afhjúpaði um leið minjar um aldalanga búsetu.

Safnvörðurinn Þórður Tómasson fylgdist grannt með eyðingunni og bjargaði fjölda gripa sem sjórinn gróf úr hólnum uns Þjóðminjasafn hóf fornleifarannsókn á svæðinu árið 1978. Í bókinni stiklar höfundur á stóru um sögu Stóruborgar, segir frá fjölmörgum gripum sem hann fann í Borgarhól og dregur af þeim ályktanir um mannlíf, búskaparhætti og menningarsögu eins og honum einum er lagið.

Bókin er gefin út í tilefni af afmælinu og fylgir henni inngangur eftir Þór Magnússon fyrrverandi þjóðminjavörð sem segir þar m.a.:

„Þórð vil ég telja með beztu safnmönnum okkar á öllum tímum, og nefni ég hann í hópi með Sigurði Guðmundssyni og Sigurði Vigfússyni, sem fyrstir stýrðu Forngripasafninu í Reykjavík, svo og Matthíasi Þórðarsyni og Kristjáni Eldjárn þjóðminjavörðum.“

Stóraborg er 30. bók Þórðar sem auk þess hefur á löngum ferli ritað hundruð greina í blöð og tímarit. Bókinni fylgir heillaóskaskrá þar sem um 900 manns senda afmælisbarninu kveðju sína.

Bókarkápa Stóruborgar. Mynd/Sæmundur