Söguskilti um kanadísku hersveitina Les Fusiliers Mont-Royal, sem hafði höfuðstöðvar í Hveragerði árið 1940 verður vígt við Lystigarðinn Fossflöt í dag kl. 16. Fulltrúar frá kanadísku hersveitinni gerðu sér ferð til Íslands til að taka þátt í vígslunni og einnig verður sendiherra Kanada á Íslandi, Jenny Hill, viðstödd og ávarpar samkomuna.
Árið 1940 urðu skyndilega breytingar á daglegu lífi Hvergerðinga þegar 124 kanadískir hermenn settust að í bænum í kjölfar hernáms Breta á Íslandi. Nú, 86 árum síðar, verður sögu þeirra og dvöl í Hveragerði gerð skil með nýju söguskilti.
Söguskiltið er sett upp í tilefni af 80 ára afmæli Hveragerðisbæjar og segir frá hersveitinni Les Fusiliers Mont-Royal sem hafði höfuðstöðvar í Hveragerði til að annast varnir Suðurlands eftir að Bretar hernámu Ísland í maí 1940. Þegar Kanadamennirnir yfirgáfu bæinn í október sama ár voru öll mannvirki hersins rifin og fjarlægð. Herdeildin hafði sett mikinn svip á samfélagið meðan á dvölinni stóð enda voru þeir næstum jafnmargir og íbúar þess tíma. Þeir settu upp tjaldbúðir á bökkum Varmár og víðar, stunduðu skotæfingar, marseruðu um götur þorpsins og hlóðu vígi.
Einnig skapaði vera hermannanna ný atvinnutækifæri fyrir heimamenn s.s. við þvotta, rakstur og sölu á „fish and chips“ svo eitthvað sé nefnt.
Gaman er að segja frá því að sams konar skilti verður sett upp á frönsku í Montreal í Kanada síðar á árinu og mun þannig saga hersveitarinnar og tengsl hennar við Hveragerði verða varðveitt á báðum stöðum.
Við vígslu söguskiltisins munu bæjarstjóri, sendiherra Kanada og fulltrúi frá kanadísku hersveitinni flytja ávörp. Þá verður farið í stuttu máli yfir söguna og loks verður skiltið afhjúpað.