Bjartmar og Bergrisarnir verða með tónleika á Sviðinu í miðbæ Selfoss laugardaginn 4. febrúar og hefjast þeir klukkan 21.
Í samtali við sunnlenska.is sagðist Bjartmar vera spenntur fyrir kvöldinu en þetta er í fyrsta skipti sem hann spilar með Bergrisunum á Selfossi.
„Gestir eiga von á góðu, þarna verður farið yfir ferilinn í yfir 40 ár og við erum meira að stíla inn á lögin sem fólk þekkir. Við viljum fá stemningu og söng úr salnum. Svo verðum við auðvitað með nýju lögin sem ég hef gefið út með Bergrisunum á síðustu tveimur árum,“ segir Bjartmar.
Afköstin hafa verið mikil upp á síðkastið en Bjartmar og Bergrisarnir gáfu út fjögur ný lög á síðasta ári, meðal annars Á ekki eitt einasta orð og Af því bara sem hafa hlotið afburða vinsælda.
„Við erum búnir að vera mjög duglegir að spila á síðasta ári og höfum allstaðar fengið gífurlega góðar undirtektir. Svo höldum við bara áfram í sumar og erum að taka upp ný lög núna. Það er ekkert í boði að slá af,“ segir Bjartmar og hlær.
Hljómsveitina Bergrisana skipa ásamt Bjartmari þeir Júlíus Freyr Guðmundsson á bassa, Birkir Rafn Gíslason á gítar, Daði Birgisson á hljómborð og Arnar Gíslason á trommur.
„Þetta verður bara rokk og ról. Við erum spenntir fyrir kvöldinu, þetta er í fyrsta skipti sem ég kem með Bergrisana á Selfoss og ég hlakka mikið til að sjá þennan nýja tónleikastað, Sviðið, sem fer svo gott orð af,“ sagði Bjartmar að lokum.
Miðasala er í fullum gangi á tix.is