Í dag, laugardaginn 13. september kl. 15, mun Margrét Elísabet Ólafsdóttir sýningarstjóri ræða við gesti um verkin á sýningunni Snertipunktar í Listasafni Árnesinga.
Verkin á sýningunni eru eftir listamennina Önnu Eyjólfsdóttur, Birgi Snæbjörn Birgisson, Helga Hjaltalín Eyjólfsson, Helga Þorgils Friðjónsson, Ragnhildi Stefánsdóttur, Þórdísi Öldu Sigurðardóttur og Þuríði Sigurðardóttur.
Um helgina lýkur þessari skemmtilegu og jarnframt margslungnu sýningu, þar sem gestir hafa líka verið þáttakendur í sumum verkanna. Fjölbreytt verkin eru eftir sjö íslenska myndlistar-menn sem fæddir eru á árunum 1948-1966. Viðfangsefni og efnisnotkun þeirra er ólík og endurspegla gróskuna í íslenskri samtímamyndlist.
Allir listamennirnir eiga það sameiginlegt að hafa verið virkir í íslensku listalífi og jafnframt skapað sér vettvang erlendis. Þeir hafa sýnt verk sín sem sem tveir aðskildir listamannahópar en listamennirnir hafa einnig staðið að rekstri sýningarýma svo sem Gallerí Gangur, StartArt galleríið, Gallerí Skilti og galleríð 20m2.
Sýningarstjórinn Margrét Elísabet Ólafsdóttir valdi saman verkin á sýningunni og hefur einnig ritað grein í sýningaskrána þar sem hún fjallar um félagslegt samhengi myndlistar í sögulegu ljósi og starfsumhverfi íslenskra myndlistarmanna. Margrét sem ólst upp á Selfossi varði nýlega doktorritgerð sína frá list- og fagurfræðideild Sorbonne háskólans í París. Hún hóf starfsferil sinn sem blaðamaður árið 1987 og skrifaði fyrir ýmis dagblöð og tímarit á námsárunum, aðallega um listir og menningu.
Frá árinu 2002 hefur hún fengist við rannsóknir á raf- og stafrænum listum með áherslu á sögu þessara lista á Íslandi. Margrét var skipuleggjandi raflistahátíðarinnar Pikslaverk árið 2010 og 2011 og ein af sýningarstjórum sýningarinnar Sjónarmið – á mótum myndlistar og heimspeki í Listasafni Reykjavíkur árið 2011. Árið 2013 skipulagði hún gjörninginn Power Struggle eftir Olgu Kisseleva í Nýlistasafninu og sýninguna Íslensk vídeólist frá 1975-1990 í Listasafni Reykjavíkur sem var byggð á rannsóknum hennar.
Um helgina eru síðustu sýningardagar Snertipunkta og gott tækifæri gefst í dag til að velta fyrir sér mismunandi snertipunktum hennar í spjalli við sýningarstjórann.
Listasafn Árnesinga er opið kl. 12 – 18, allir velkomnir, líka börn og aðgangur er ókeypis. Tvær nýjar sýningar verða síðan opnaðar laugardaginn 27. september.